চুৰাটত গেছ নির্গমনৰ ঘটনাত ৬ জনৰ মৃত্যু

গুজৰাটৰ চুৰাটৰ এটা কোম্পানীত গেছ নির্গমনৰ  ঘটনাত  কমেও ছয়জন লোকৰ মৃত্যু হৈছে ৷ তদুপৰি এই ঘটনাত আহত  ২০ জনক  চুৰাট অসামৰিক চিকিৎসালয়ত ভৰ্তি কৰোৱা হৈছে ৷  অসামৰিক চিকিৎসালয়ৰ ভাৰপ্ৰাপ্ত চিকিৎসা বিষয়া ওমকাৰ চৌধুৰীয়ে প্ৰকাশ কৰা অনুসৰি  চহৰখনৰ ছচিন জিআইডিচি অঞ্চলত এই ঘটনা  সংঘটিত হৈছে ৷ স্থানীয় আৰক্ষীয়ে অঞ্চলটোত সাহায্য আৰু উদ্ধাৰ অভিযান অব্যাহত ৰাখিছে ৷  জানিব পৰা মতে এজন টেংকাৰ চালকে প্ৰিণ্টিং মিলৰ ওচৰৰ নলাত ৰাসায়নিক পদাৰ্থ পেলাই থকাৰ সময়তে  এই  গেছ নির্গমনৰ ঘটনা সংঘটিত হয় ৷  লগে লগে  বিষাক্ত  গেছ বতাহত মিহলি হৈ পৰে আৰু  ৫জন লোকৰ মৃত্যু হয় ৷ এই  ঘটনাত আন এজন লোক গুৰুতৰ ভাৱে আঘাটপ্ৰাপ্ত হয় আৰু পৰৱর্তী সময়ত তেওঁৰ মৃত্যু ঘটে ৷ এই ঘটনাৰ বিষয়ে গম পোৱাৰ লগে লগে  চুৰাট আৰক্ষীয়ে ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে ৷