টলীউডৰ জনপ্ৰিয় অভিনেতা অভিষেক চেটাৰ্জিৰ ৫৭বছৰ বয়সত হৃদৰোগত আক্ৰান্ত হৈ মৃত্যু ঘটে ৷ পৰিয়ালৰ লোকে জানিবলৈ দিয়া মতে কিছুদিন পূৰ্বে শ্বাস-প্ৰশ্বাস জনিত সমস্যাই দেখা দিছিল অভিনেতাগৰাকীক ৷ সেই অৱস্থাৰেই শ্বুটিং কৰি আছিল অভিষেকে ৷ বুধবাৰে নিশা শ্বুটিং চলি থকাৰ সময়তে অসুস্থ হৈ পৰে অভিনেতা গৰাকী আৰু তাৰ পিছত প্ৰিন্স আনোৱাৰ শ্বাহ ৰোডৰ নিজ ঘৰলৈ উভতি অহাৰ পিছত বুকুৰ বিষ আৰম্ভ হয় তেওঁৰ ৷ অৱশেষত পিছদিনা অৰ্থাৎ বৃহস্পতিবাৰে পুৱা পৰিয়ালৰ লোকে নিথৰ অৱস্থাত প্ৰতক্ষ কৰে অভিনেতা গৰাকীক ৷ হৃদৰোগত আক্ৰান্ত হৈ তেওঁৰ মৃত্যু হোৱা বুলি ইতিমধ্যে জানিব পৰা গৈছে ৷
অভিষেক চেটাৰ্জী আছিল ৯০দশকৰ বাংলা চলচিত্ৰ জগতৰ অন্যতম ব্যস্ত ও জনপ্ৰিয় অভিনেতা ৷ বহুকেইখন জনপ্ৰিয় বাংলা ছবিত শক্তিশালী অভিনয়েৰে দৰ্শকৰ বিপুল সমাদৰ লাভ কৰা অভিনেতাগৰাকীয়ে আজি কিছু বছৰৰ পৰা সৰু পৰ্দাতো যথেষ্ট সমাদৰ লাভ কৰিছিল ৷ বিগত কেইবাবছৰ ধৰি দূৰদৰ্শনৰ ধাৰাবাহিকৰ যোগেদি দৰ্শকৰ মন মুহিছিল তেওঁ ৷ তেওঁৰ অকস্মিক বিয়োগত শোকস্তব্ধ হৈ পৰিছে তেওঁৰ অনুৰাগী সকলৰ লগতে সমগ্ৰ বাংলা চলচিত্ৰ জগৎ ৷
