‘ডন ৩’ চিনেমাক লৈ বলিউডত সর্বত্ৰে চর্চা আৰম্ভ হৈছে ৷কাম আৰম্ভ হোৱাৰ আগতেই ইটোৰ পিছত সিটো জল্পনা-কল্পনাই ছবিখনক চর্চিত কৰি তুলিছে ৷ ‘ডন’ আৰু ‘ডন ২’ৰ পিছত শ্বাহৰুখ খানে ‘ডন ৩’লৈ ঘূৰি অহাৰ কথা আছিল। কিন্তু ‘ডন ৩’ ছবিখনৰ বাবে শ্বাহৰুখে সন্মতি প্ৰদান নকৰিলে ৷ ইয়াৰ পাছতে শ্বাহৰুখৰ স্থানত ডন -৩ ছবিৰ অভিনেতাৰ সন্ধান চলি আছে । কিছুদিন আগতে শুনা গৈছিল যে ফাৰহান আখতাৰে সেই অভিনেতাজন লাভ কৰিছে । ৰণবীৰ সিঙক ‘ডন ৩’ ছবিখনৰ বাবে চূড়ান্ত কৰা হৈছে বুলি খবৰ ওলাইছিল । কিন্তু নতুন খবৰ অনুসৰি পৰিচালক ফাৰহানেও ছবিখনত ‘ডন’ৰ চৰিত্ৰত অভিনয়ৰ বাবে আগ্ৰহ প্ৰকাশ কৰিছে ।‘ডন’ হৈছে পৰিচালক হিচাপে ফাৰহানৰ অন্যতম সফল ছবি । ২০০৬ চনত ‘ডন’, ২০১১ চনত মুক্তি লাভ কৰা ‘ডন ২’ই ব্যাপক জনপ্ৰিয়তা লাভ কৰিবলৈ সক্ষম হৈছিল । এই দুখন ছবিৰ জৰিয়তে ফাৰহানে বক্স অফিচত সফলতা লাভ কৰাৰ লগতে সমালোচকৰ প্ৰশংসাও লাভ কৰে। অমিতাভ বচ্চনৰ পিছত শ্বাহৰুখ খানে ‘ডন’ হিচাপে নিজৰ বাবে এক সুকীয়া পৰিচয় সৃষ্টি কৰিছিল। কিন্তু ২০১১ চনত মুক্তি পোৱা ‘ডন ২’ৰ পিছত তেওঁ এই ভূমিকাৰ পৰা দীঘলীয়া বিৰতি লৈছিল। এই বছৰত ‘ডন ৩’ পুনৰ নির্মাণ কৰাৰ কথা চিন্তা চর্চা কৰা হয় ৷ ফাৰহানে চিত্ৰনাট্য লিখাৰ কাম প্ৰায় শেষ কৰিছে।
‘ডন ৩’ ছবিখনৰ বাবে শ্বাহৰুখ খানে সন্মতি প্ৰদান কৰা নাই ৷ ‘পাঠান’ৰ সফলতা আৰু ‘জোৱান’ক কেন্দ্ৰ কৰি সৃষ্টি হোৱা উন্মাদনাৰ সাক্ষী হোৱাৰ পিছত, তেওঁৰ কেৰিয়াৰৰ এই পৰ্যায়ত শ্বাহৰুখে ‘মাছ এণ্টাৰটেইনাৰ’ ধাৰাৰ ছবিৰ প্ৰতি অধিক আগ্ৰহী। আঠৰ পৰা আশীজন লোকক মনোৰঞ্জন দিব পৰা ছবিত তেওঁ সময় কটাব বিচাৰে। ‘ডন ৩’ৰ চিত্ৰনাট্য পঢ়ি শ্বাহৰুখে অনুভৱ কৰিলে যে এই ছবিখন সেই ধাৰাটোৰ লগত খাপ নাখায়। সেইবাবেই তেওঁ ‘ডন ৩’ ছবিখন ঘূৰাই দিলে। আনহাতে, ‘দিল ধড়কনে দো’, ‘গোলি বয়’ আদি ছবিৰ বাবেই ফাৰহানে ইতিমধ্যে ৰণবীৰৰ সৈতে যথেষ্ট পৰিচিত। তাৰ ওপৰত ভিত্তি কৰি ফাৰহানে ৰণবীৰৰ কথা ভাবিলে। অৱশ্যে ‘ডন’ৰ চৰিত্ৰত ৰণবীৰ কিমান উপযোগী হ’ব সেই লৈ ছবিখনৰ নিৰ্মাতাসকলৰ দ্বিধা আতৰা নাই ৷আনহাতে ফাৰহানে ইতিমধ্যে ‘ৰক অন’, ‘জিণ্ডেগী না মিলেগী ড’বাৰা’ আদি ছবিৰে নিজকে প্ৰতিষ্ঠিত অভিনেতা হিচাপে প্ৰতিষ্ঠা কৰিছে। ‘ডন’ৰ চৰিত্ৰত তেওঁৰ বেয়া অনুভৱ নহ’ব বুলি নির্মাতাসকলে ভাবে।প্ৰায় এযুগ পূৰ্বে ফাৰহানে তেওঁৰ শেষৰখন ছবি পৰিচালনা কৰিছিল। ইয়াৰ পিছত তেওঁ অভিনয়ত ব্যস্ত হৈ পৰিল। এইবাৰ তেওঁ আকৌ কেমেৰাৰ পিছফালে ঘূৰি আহিব বিচাৰে। কিন্তু শেষত ‘ডন’ৰ চৰিত্ৰত কোনজন অভিনেতাক দেখা যাব সেই লৈ যথেষ্ট জল্পনা-কল্পনাৰ সৃষ্টি হৈছে।
