ভেলেণ্টাইন ডে’ ৰ প্ৰাকক্ষণত বলীউডতো বলিছে প্ৰেমৰ বতাহ ৷ শেহতীয়াকৈ জয়ছলমেৰত সিদ্ধাৰ্থ আৰু কিয়াৰাই বিবাহ পাশত আৱদ্ধ হোৱাৰ সময়তে চর্চালৈ আহিছে বলিউডৰ আন এক যুটী ৷ তেওঁলোক হৈছে ছাৰা আলী খান আৰু কাৰ্তিক আৰিয়ান। ভেলেণ্টাইন ডে’ৰ পূৰ্বে দুয়োকে একেলগে দেখা গৈছিল। যাৰ বাবে চর্চা আৰম্ভ হৈছে যে তাৰকা দুগৰাকী পুনৰ ওচৰ চাপি আহিছে নেকি?
শেহতীয়াকৈ দুয়ো গৰাকী একেলগে থকা ছবি ছ’চিয়েল মিডিয়াত ভাইৰেল হৈছে। ছবিখনত চাৰা আৰু কাৰ্তিকক ইজনে সিজনৰ লগত কথা পাতি থকা দেখা গৈছে। দুয়োৰে মুখত হাঁহি। ছবিখনৰ পৰা স্পষ্ট হৈ পৰিছে যে দুয়োগৰাকী তাৰকাই ইজনে সিজনৰ সংগ উপভোগ কৰি আছে। বৰ্তমান ‘লাভ আজ কল’ যুটিটোৱে কোনো ছবিতে একেলগে কাম কৰা নাই। কিন্তু এই বৈঠক ব্যক্তিগত? কৌতুহলী হৈ পৰিছে অনুৰাগীসকল। ইতিমধ্যে ছ’চিয়েল মিডিয়াত দুয়োগৰাকী তাৰকাৰ সম্পৰ্কৰ কথা আৰম্ভ হৈছে। বহুতে কয় যে ছাৰা আৰু কাৰ্তিক ইজনে সিজনক ভাল পায়।
ইমতিয়াজ আলীৰ ছবি ‘লাভ আজ কাল ২’ ২০২০ চনত মুক্তি লাভ কৰিছিল। সেই ছবিখনত একেলগে কাম কৰাৰ সময়তে ছাৰা আৰু কাৰ্তিকৰ ৰোমাঞ্চৰ উৰাবাতৰি ওলাইছিল। ছবিখনে দৰ্শকৰ মনত কোনো সাচ বহুৱাব নোৱাৰিলেও অভিনেতা দুগৰাকীৰ মাজৰ কেমিষ্ট্ৰীয়ে যথেষ্ট জনপ্ৰিয়তা লাভ কৰিছিল। পিছত কৰণ জোহৰৰ ‘কফী উইথ কৰণ শ্ব’ত ছাৰাইও কাৰ্তিকৰ সৈতে থকা সম্পৰ্ক স্বীকাৰ কৰে। কিন্তু সেই সম্পৰ্ক বেছি দিন নাথাকিল। আন এক অনুষ্ঠানত কাৰ্তিকে প্ৰকাশ কৰে যে তেওঁ ডেৰ বছৰ ধৰি অকলশৰীয়া হৈ আছে। সম্পৰ্ক বিচ্ছিন্ন হোৱাৰ পিছতো কেইবাবাৰো একেলগে দেখা গৈছে ছাৰা আৰু কাৰ্তিকক। বিভিন্ন বঁটা প্ৰদান অনুষ্ঠানৰ পৰা পাৰ্টিলৈকে, দুয়োজন তাৰকাক হাঁহি মাতি কথা পাতি থকা দেখা গৈছিল ৷ ১৪ ফেব্ৰুৱাৰীৰ আগতে চাৰা আৰু কাৰ্তিকৰ জীৱনলৈ প্ৰেম ঘূৰি আহিছে নেকি? আশাবাদী তাৰকা যুটিৰ অনুৰাগী।
