আগন্তুক বর্ষত অনুষ্ঠিত হ’বলগীয়া বিধানসভা নিৰ্বাচনৰ পূৰ্বে পট পৰিৱর্তন ঘটিছে নাগালেণ্ডৰ ৰাজনীতিত ৷ শুকুৰবাৰে নাগা পিপলছ ফ্ৰণ্টৰ (এনপিএফ)ৰ ২৫ জন বিধায়কৰ ভিতৰত ২১ জনে নেচনেলিষ্ট ডেমক্ৰেটিক প্ৰগ্ৰেছিভ পাৰ্টি (এনডিপিপি)ত যোগদান কৰে।
এনপিএফৰ ২১ জন বিধায়কৰ যোগদানৰ লগে লগে ৬০ জনীয়া বিধানসভাত মুখ্যমন্ত্ৰী নেইফিউ ৰিঅ’ৰ নেতৃত্বত এনডিপিপিৰ শক্তি ৪২ জনলৈ বৃদ্ধি পালে ৷ ইয়াৰ বিপৰীতে এনপিএফৰ বিধায়কৰ সংখ্যা চাৰিজনলৈ হ্ৰাস পালে ৷ বিজেপিৰ ১২ জন আৰু দুজন নিৰ্দলীয় দুজন বিধায়ক আছে।
এন পি এফৰ সভাপতি ছুৰহোজেলি লিজিয়েটচুৱে বৃহস্পতিবাৰে দলটোৱে অহা বছৰৰ বিধানসভা নিৰ্বাচনত অকলশৰীয়াকৈ প্ৰতিদ্বন্দিতা কৰিব বুলি ঘোষণা কৰাৰ পিছতে বিধায়কসকলে দলত্যাগ কৰে ৷
এনপিএফে যোৱা বছৰৰ আগষ্টত এনডিপিপি আৰু বিজেপিক লৈ গঠিত শাসনাধিষ্ঠ পিপলছ ডেমক্ৰেটিক এলায়েন্সত যোগদান কৰি নাগা ৰাজনৈতিক বিষয়টো আগুৱাই নিয়াৰ উদ্দেশ্যৰে ৰাজ্যখনৰ বিৰোধী বিহীন চৰকাৰ ইউনাইটেড ডেমক্ৰেটিক এলায়েন্স (ইউডিএ) গঠন কৰিছিল।
