গুৱাহাটী,১৭ ছেপ্টেম্বৰ : আজি বৰ্ণিল কাৰ্যসূচীৰে অসমৰ বিশিষ্ট সাহিত্যিক, গৱেষক, ভাষাবিদ, অনুবাদক, অভিধান প্ৰণেতা দিলস্ লক্ষ্মীন্দ্ৰ সিংহৰ ৭০ সংখ্যক ওপজা দিন সম্ভ্ৰান্ত প্ৰকাশন অনুষ্ঠান “পৰাগজ্যোতি প্ৰকাশন”ৰ উদ্যোগত দিশপুৰ প্ৰেছ ক্লাবত আড়ম্বৰপূৰ্ণ পৰিবেশৰ মাজত অনুষ্ঠিত কৰে । আকাশবাণী আৰু দূৰদৰ্শনৰ বিশিষ্ট কন্ঠশিল্পী ডিজেন কাকতিয়ে পৰিৱেশন কৰা জ্যোতি সংগীতেৰে কাৰ্যসূচী শুভাৰম্ভ কৰা হয়। ইয়াৰ পিছতে বন্তি প্ৰজ্বলনেৰে সভা উদ্বোধন কৰি অসম সাহিত্য সভাৰ প্ৰাক্তন সহকাৰী সম্পাদক, “সাহিত্য কোঁৱৰ” কমল কলিতাই কয়- “জাতি- জনগোষ্ঠীৰ মাজত, ব্ৰহ্মপুত্ৰ -বৰাকৰ মাজত সমন্বয়ৰ সাঁকো গঢ়ি তুলিবলৈ অহৰহ সাহিত্য-সংগীতেৰে প্ৰয়াস কৰে দিলস্ লক্ষ্মীন্দ্ৰ সিংহই। সকলো ভাষা-সাহিত্যৰ প্ৰতি তেওঁৰ আছে অযুত প্ৰেম। সকলো কৰ্মতে উদাৰতা প্ৰকাশ ঘটে । দক্ষতাৰে কলম চলাই আলোকময় পথৰ সন্ধান কৰে।’ সাংবাদিক, লেখক দীপক শৰ্মা ৰচিত “সাহিত্যিক দিলস্ লক্ষ্মীন্দ্ৰ সিংহ : ব্যক্তি আৰু ব্যক্তিত্ব” গ্ৰন্থখনি উন্মোচন কৰি অসম নাট্য সন্মিলনৰ সভাপতি তথা প্ৰাক্তন সাংস্কৃতিক মন্ত্ৰী কুমাৰ দীপক দাসে কয়- ” স্বজাতিৰ লগতে অসমৰ সকলো জাতি-জনগোষ্ঠীৰ বিকাশ বিচৰা মানুহজন দিলস্ লক্ষ্মীন্দ্ৰ সিংহ । পৰিপক্ক চিন্তা, সাহিত্য -সাংস্কৃতিক পথাৰৰ অক্লান্ত যোদ্ধা সিংহৰ সৃষ্টিৰাজিত প্ৰকাশ পায় জীৱনৰ মাদকতা । ইংৰাজী, অসমীয়া, হিন্দী, বাংলা ভাষাৰ শক্তিশালী গ্ৰন্থ বিষ্ণুপ্ৰিয়া মণিপুৰী ভাষাত অনুদিত কৰি ভাষাটোৰ বিকাশত যথেষ্ট পৰিমাণে কাম কৰিছে সিংহই। তেওঁৰ পৰা শিকিব পাৰি জীৱনৰ অনুপম মাধুৰ্যতা।” সভাৰ মুখ্য অতিথি প্ৰথিতযশা সাহিত্যিক, সমালোচক, শিক্ষাবিদ ভবানী প্ৰসাদ অধিকাৰী কয়- “মনত পুহি ৰখা আবেগ- অনুভূতিবোৰ ন-ন মানদণ্ড বিশিষ্ট সাহিত্যৰে উজাৰি দিয়ে। দিলস্ লক্ষ্মীন্দ্ৰ সিংহই।অন্ত স্থলৰ পৰা নিভাজ যুক্ত অনাড়ম্বৰ কিন্তু মসৃণ, গভীৰ সৃষ্টিবোৰ। জীয়াই থাকোঁতে উপযুক্ত জনক উপযুক্ত ধৰণেৰে সন্মান, মৰ্যদা দিব লাগে। যি দিয়া যায় জীৱন কালতে পাব লাগে, দিব লাগে। মৃত্যুৰ পিছত সন্মান দি একো লাভ নাই। দীপক শৰ্মাৰ দৰে দুই -এজন ব্যক্তিয়ে প্ৰতিভাৰ মূল্যাংকন কৰিব জানে । প্ৰতিভাৰ কন্ঠস্বৰ বৰ নৰম ।হৃদয় গহ্বৰৰ পৰা অনুধাৱন কৰিব লাগিব। মানুহৰ জীৱন বৰ বিচিত্ৰ, অভিজ্ঞতা অৰ্জনবোৰ সাৱলীলভাৱে উপস্থাপন কৰিব জানিব লাগিব।”
পৰাগজ্যোতি প্ৰকাশনৰ সচিব, কবি-সাংবাদিক দীপক শৰ্মাই আত ধৰা অনুষ্ঠানত দেউৰী সাহিত্য সভাৰ সভাপতি তথা প্ৰশাসনিক বিষয়া ড০ ষড়ানন দেউৰী কয়- “কৰ্ম যোগী, সমন্বয়ৰ বাৰ্তা বাহক সু-সংগঠক দিলস্ লক্ষ্মীন্দ্ৰ সিংহ স্বভিমানেৰে বন্দিত, অনুভূতি প্ৰবণ, সমাজৰ দিক্ নিৰ্ণায়ক।”
ৰাষ্ট্ৰীয় অধ্যাপক শিক্ষা পৰিষদৰ পূব আঞ্চলিক কমিটীৰ অধ্যক্ষ ড০ দিব্যজ্যোতি মহন্তই কয়- সমাজত এতিয়া ভাল মানুহৰ অভাৱ ঘটিছে। তাৰ মাজত দিলস্ লক্ষ্মীন্দ্ৰ সিংহ, দীপক শৰ্মাৰ দৰে একাংশ ব্যক্তিয়ে সমাজৰ সৰ্বাংগীন বিকাশৰ বাবে কাম কৰি আছে।”
মমা গুপ্তা, নিকুঞ্জ মেধিয়ে গীত পৰিৱেশন কৰা সভাত অসম সাহিত্য সভাৰ প্ৰাক্তন কোষাধ্যক্ষ কিশোৰ কুমাৰ জৈন, অখিল ভাৰতীয় সাহিত্য পৰিষদৰ গুৱাহাটী জিলা সমিতিৰ সভাপতি নিশুতি মজুমদাৰ, নাথ সাহিত্য সভা, সভাপতি ড০ হৰ কুমাৰ নাথ, ত্ৰিপুৰা কেন্দ্ৰীয় বিশ্ববিদ্যালয়ৰ অৱসৰপ্ৰাপ্ত অধ্যাপক ড০ বীৰেন্দ্ৰ কুমাৰ ভট্টাচাৰ্য, অৰুণাচল প্ৰদেশৰ ৰাজীৱ গান্ধী বিশ্ববিদ্যালয়ৰ অৱসৰপ্ৰাপ্ত ডিন ড০ অৰূপ কুমাৰ দাস, ৰাভা হাছং স্বায়ত্ব শাসিত পৰিষদৰ প্ৰাক্তন মুখ্য কাৰ্যবাহী সদস্য ডা: শৰৎ চন্দ্ৰ ৰাভা, মাহেকীয়া আলোচনী “আজিৰ কবিতা”ৰ সম্পাদক বিনয় চলিহা, বঙাইগাঁওৰ অৱসৰপ্ৰাপ্ত অধ্যক্ষ শৈলেন্দ্ৰ প্ৰসাদ শৰ্মা, দুলিয়াজানৰ কবি ৰূপেশ্বৰ ফুকন, ড০ যতীন্দ্ৰ নাথ ডেকা, শচীন দাস, পলি গগৈ, বিপুল শৰ্মা, জ্যেষ্ঠ সাংবাদিক বিদ্যুৎ চক্ৰৱৰ্তী, কাঞ্চন কেজৰিৱাল, বয়োজ্যেষ্ঠ কবি দুৰ্গা প্ৰসাদ শৰ্মা, কেপ্টেইন অশ্বিনী কুমাৰ সিনহা প্ৰভৃতিয়ে সন্মানিত আলহী হিচাপে অংশ লয়।
