আজি অসমীয়া গল্প-সাহিত্যত এক ব্যতিক্ৰমী ধাৰাৰ সূচনা কৰা বিশিষ্ট গল্পকাৰ সৌৰভ কুমাৰ চলিহাৰ স্মৃতি দিৱস । সৌৰভ কুমাৰ চলিহা আছিল তেওঁৰ ছদ্মনাম, তেওঁৰ প্ৰকৃত নাম আছিল সুৰেন্দ্ৰ নাথ মেধি । তেওঁ আছিল বিশিষ্ট সাহিত্যিক কালিৰাম মেধিৰ পুত্ৰ । ছাত্ৰ হিচাপে মেধাৱী আছিল তেওঁ । ১৯৬০ চনত তেওঁ গুৱাহাটীৰ অসম অভিযান্ত্ৰিক মহাবিদ্যালয়ত অধ্যাপক হিচাপে যোগদান কৰি ১৯৮৮ চনত স্বেচ্ছাই অৱসৰ গ্ৰহণ কৰে । পঞ্চাশৰ দশকত তেওঁ গল্প লিখিবলৈ আৰম্ভ কৰে । তেওঁৰ প্ৰথম গল্পটো আছিল ‘পঞ্জাব সীমান্তৰ সহযাত্ৰী’ । ৰামধেনুৰ পাতত তেওঁ ‘অশান্ত ইলেক্ট্ৰন’ নামৰ গল্পটোৰে অসমীয়া গল্প সাহিত্যলৈ এক নতুনত্বৰ ধাৰা বোৱাই আনে । ‘গোলাম’ নামৰ গল্প সংকলনটিৰ বাবে তেওঁ ১৯৭৪ চনত সাহিত্য অকাডেমি বঁটা লাভ কৰে । ১৯৯৫ চনত তেওঁ লাভ কৰে অসম উপত্যকা সাহিত্য বঁটা । কিন্তু ছদ্মনামেৰে পৰিচিত হ’বলৈ বিচৰা বাবে তেওঁ জীৱিত অৱস্থাত নিজ হাতে কোনো বঁটা-বাহন গ্ৰহণ কৰা নাছিল । এহাত ডবা, দুপৰীয়া আৰু অন্যান্য গল্প আদি তেওঁৰ গল্প সংকলন । অৱৰূদ্ধ চহৰ, মৰূদ্যান তেওঁৰ নাটক । ডক্টৰ জেকিল এণ্ড মিষ্টাৰ হাইভ, আশী দিনত পৃথিৱী পৰিভ্ৰমণ আদি তেওঁৰ অনূদিত গ্ৰন্থ । গল্প নহয়, ভাল খবৰ আদি তেওঁৰ অন্যান্য ৰচনা সংকলন । ২০১১ চনৰ আজিৰ দিনটোতে গুৱাহাটীত তেওঁৰ দেহাৱসান ঘটে । এইগৰাকী সাহিত্যিকলৈ আমাৰ প্ৰণাম ।
আজি বিশ্ববিখ্যাত ইংৰাজ ঔপন্যাসিক, প্ৰবন্ধকাৰ, সাংবাদিক তথা সমালোচক জৰ্জ অৰৱেলৰ ওপজা দিন । ১৯০৩ চনৰ আজিৰ দিনটোতে ব্ৰিটিছ ভাৰতৰ বেংগল প্ৰেছিডেন্সিৰ মোতিহাৰীত তেওঁৰ জন্ম হৈছিল । জৰ্জ অৰৱেল তেওঁৰ ছদ্মনাম আছিল, আচল নামটো আছিল এৰিক আৰ্থাৰ ব্লেয়াৰ । এনিমেল ফাৰ্ম (১৯৪৫) তেওঁৰ এখন বিখ্যাত উপন্যাস । তেওঁ বিবিচিত সাংবাদিকতা কৰিছিল । এইগৰাকী সাহিত্যিকলৈ আমাৰ প্ৰণাম ।
আজি জনপ্ৰিয় সংগীত শিল্পী মাইকেল জেকচনৰ স্মৃতি দিৱস । তেওঁ আছিল এগৰাকী আমেৰিকান গায়ক, গীতিকাৰ আৰু নৃত্যশিল্পী । তেওঁক কিং অব পপ বুলি কোৱা হয় । ১৯৬৪ চনত তেওঁ পেছাদাৰী শিল্পী হিচাবে আত্মপ্ৰকাশ কৰাৰ পিছৰে পৰাই আৰু উভতি চাবলগীয়া হোৱা নাছিল । ১৯৮২ চনত প্ৰকাশিত তেওঁৰ এলবাম ‘থ্ৰীলাৰ’ৰ গীতসমূহে আমেৰিকাৰ বৰ্ণবৈষম্যৰ বিৰুদ্ধে এক জাগৰণৰ সৃষ্টি কৰিছিল । তেওঁ ১৫টি গ্ৰেমী বঁটা লাভ কৰিছিল । ২০০৯ চনৰ আজিৰ দিনটোতে বিষক্ৰিয়াৰ ফলত কেলিফৰ্ণিয়াত তেওঁৰ মৃত্যু হয় । এইগৰাকী শিল্পীলৈ আমাৰ প্ৰণাম ।
