গুৱাহাটী বিশ্ববিদ্যালয়ৰ মাধৱ বেজবৰুৱা ছাত্ৰাৱাসৰ ন-পুৰণি সতীৰ্থ সন্মিলন

গুৱাহাটীঃ গুৱাহাটী বিশ্ববিদ্যালয়ৰ মাধৱ বেজবৰুৱা ছাত্ৰাৱাসৰ ন-পুৰণি সতীৰ্থ সন্মিলন ৭ আৰু ৮ এপ্ৰিলত অনুষ্ঠিত হ’ব। গুৱাহাটী বিশ্ববিদ্যালয়ৰ প্ৰথমটো ছাত্ৰাৱাস মাধৱ বেজবৰুৱা এক নং দুমহলীয়া ছাত্ৰাৱাসে ইতিমধ্যেই গৌৰৱোজ্জ্বল হীৰক জয়ন্তী বৰ্ষ অতিক্ৰম কৰিছে৷ ঐতিহ্যমণ্ডিত ছাত্ৰাৱাসটোৰ আৱাসীয়ে অসম তথা ভাৰতবৰ্ষৰ শিক্ষা-সাহিত্য-সংস্কৃতি-অৰ্থনীতি-ৰাজনীতি-সমাজনীতি ইত্যাদি ভিন্ন ক্ষেত্ৰত প্ৰতিষ্ঠাকালৰে পৰা বৰেণ্য অৱদান আগবঢ়াই আহিছে৷ গুৱাহাটী বিশ্ববিদ্যালয়ৰ প্ৰতিষ্ঠাৰ অন্যতম ব্যক্তি ডেকাবেজ খ্যাত মাধৱ চন্দ্ৰ বেজবৰুৱাৰ সন্মানাৰ্থে নামাকৰণ কৰা ছাত্ৰাবাসটোৰ ন- পূৰণি আবাসীসকলৰ মিলনৰ অৰ্থে ৭ আৰু ৮ এপ্ৰিলত এখনি ‘ সতীৰ্থ সন্মিলন’ৰ আয়োজন কৰা হৈছে৷ গুৱাহাটী প্ৰেছ ক্লাবত আজি অনুষ্ঠিত এখন সংবাদমেলত ন-পুৰণি সতীৰ্থ সন্মিলন উদযাপন সমিতিৰ উপদেষ্টা ড° অৱনী কুমাৰ ভাগৱতী, অৱসৰ প্ৰাপ্ত অধ্যাপক, গুৱাহাটী বিশ্ববিদ্যালয়, ড° হজৰত আলি, অধ্যাপক, পশ্চিম গুৱাহাটী মহাবিদ্যালয়, সভাপতি তথা গুৱাহাটী বিশ্ববিদ্যালয়ৰ শ্ৰেণীসমূহৰ সচিব ড° জগদীশ শৰ্মা,কাৰ্যকৰী সভাপতি ড° তপন দাস, পৰশ গাৰ্গ, সাধাৰণ সম্পাদক তথা সদৌ অসম ছাত্ৰ সন্থাৰ শিক্ষা সম্পাদক ভৱজিৎ বেজবৰুৱাই এই কথা সদৰি কৰে৷ লক্ষ্যনীয় যে মাধৱ বেজবৰুৱা ছাত্ৰাৱাসৰ অসংখ্য প্ৰাক্তন আৱাসীয়ে অসমৰ শৈক্ষিক, সামাজিক,সাংস্কৃতিক আৰু অৰ্থনৈতিক দিশত অতুজ্জল ভূমিকা গ্ৰহণ কৰি আহিছে৷ ছাত্ৰাৱাসৰ কেইবাজনো প্ৰাক্তন আৱাসীয়ে উপাচাৰ্যৰ পদ অলংকৃত কৰিছে৷ৰাজ্যৰ উন্নয়নৰ লগত জড়িত আৰু সামাজিক দিশৰ গুৰুত্বপূৰ্ণ বিষয়ত প্ৰাক্তন আৱাসীয়ে কাম কৰি আছে৷
উল্লেখ্য যে ৭ এপ্ৰিলৰ সতীৰ্থ সন্মলনৰ অনুষ্ঠানত গছপুলি ৰোপনৰে আৰম্ভ হ’ব৷গছপুলি ৰোপন কৰিব অসম চৰকাৰৰ তথ্য আৰু জনসংযোগ বিভাগৰ শীৰ্ষ বিষয়া মানবেন্দ্ৰ দেৱ ৰয় আৰু অসম গৌৰৱ ড° ধ্ৰুৱজ্যোতি শৰ্মাই । উক্ত দিনা খনেই অনুষ্ঠিত হ’বলগীয়া বিনামূলীয়া চিকিৎসা শিবিৰ উদ্বোধন কৰিব অধ্যাপক ড° হজৰত আলিয়ে, মিলানাভ গোস্বামী সোঁৱৰণী পাঞ্জা প্ৰতিযোগিতা উদ্বোধন কৰিব শিৱসাগৰ জিলাৰ পৰিবহন বিষয়া সিদ্ধাৰ্থ কৃষ্ণ শইকীয়াই, বিশ্ববিদ্যালয়ৰ শিক্ষাৰ্থীৰ মাজত পৰম্পৰাগত সাজপাৰ প্ৰতিযোগিতা উদ্বোধন কৰিব অসমৰ বিশিষ্ট অভিনেত্ৰী ভ্ৰান্তি মেধিয়ে ৷ ৮ এপ্ৰিলৰ কাৰ্যসূচী গুৱাহাটী বিশ্ববিদ্যালয়ৰ পতাকা উত্তোলনৰে আৰম্ভ হ’ব৷ বিশ্ববিদ্যালয়ৰ পতাকা উত্তোলন কৰিব গুৱাহাটী বিশ্ববিদ্যালয়ৰ পঞ্জীয়ক ড° হেমন্ত কুমাৰ নাথে ৷ আৱাসৰ পতাকা উত্তোলন কৰিব বিশ্ববিদ্যালয়ৰ শ্ৰেণী সমূহৰ সচিব ড° জগদীশ শৰ্মাই, ন- পুৰণি সতীৰ্থ সন্মিলনৰ পতাকা উত্তোলন কৰিব অসম ৰাজ্যিক পণ্যাগাৰ নিগমৰ উপাধ্যক্ষ ড° তপন দাসে, শ্বহীদ তৰ্পণ কৰিব সদৌ কামৰূপ মহানগৰ জিলা ছাত্ৰ সন্থাৰ সাধাৰণ সম্পাদক টুটুমণি কলিতাই৷ সেইদিনা মাধৱ বেজবৰুৱাৰ প্ৰতিচ্ছবিত মাল্যৰ্পণ, আমাৰ মাজৰ পৰা হেৰাই যোৱা প্ৰাক্তন আবাসীসকলৰ পৱিত্ৰ স্মৃতিত স্মৃতি তৰ্পণ, স্মৃতিগ্ৰন্থ উন্মোচন, সতীৰ্থ সন্মিলন, মুকলি সভা আৰু সাংস্কৃতিক সন্ধিয়া অনুষ্ঠান অনুষ্ঠিত হ’ব৷ মুকলি সভা উদ্বোধন কৰিব আবাসৰে প্ৰাক্তন আবাসী তথা গুৱাহাটী বিশ্ববিদ্যালয়ৰ উপাচাৰ্য অধ্যাপক প্ৰতাপ জ্যোতি সন্দিকৈয়ে। মুখ্য অতিথি হিচাপে উপস্থিত থাকিব অসমৰ মাননীয় মুখ্যমন্ত্ৰী ড° হিমন্ত বিশ্ব শৰ্মা, বিশিষ্ট অতিথি হিচাপে উপস্থিত থাকিব অতুল বৰা, কেবিনেট মন্ত্ৰী, অসম চৰকাৰ আৰু কেশৱ মহন্ত, কেবিনেট মন্ত্ৰী, অসম চৰকাৰ , নিমন্ত্ৰিত অতিথি ৰূপে উপস্থিত থাকিব ড° ননী গোপাল মহন্ত, শৈক্ষিক উপদেষ্টা, অসম চৰকাৰ আৰু চৈয়দ জাৰিৰ হুছেইন, মুখ্য পৰিচালন সম্পাদক, নিউজ লাইভ। স্মৃতিগ্ৰন্থৰ উন্মোচক হিচাপে উপস্থিত থাকিব সদৌ অসম ছাত্ৰ সন্থাৰ মুখ্য উপদেষ্টা ড° সমুজ্জ্বল কুমাৰ ভট্টাচাৰ্য। সাংস্কৃতিক সন্ধিয়াৰ উদ্বোধক হিচাপে উপস্থিত থাকিব আবাসৰে প্ৰাক্তন আবাসী তথা মৰিগাঁও জিলাৰ আৰক্ষী অধীক্ষক হেমন্ত কুমাৰ দাস। উক্ত অনুষ্ঠানত ৰাজ্যৰ বিভিন্ন ক্ষেত্ৰৰ বিশিষ্ট ব্যক্তি, শিল্পী, সাহিত্যিক , বিশ্ববিদ্যালয়ৰ শিক্ষক ছাত্ৰ-ছাত্ৰী আদিৰ লগতে ছাত্ৰাবাসৰ ন-পুৰণি সতীৰ্থ সকল উপস্থিত থাকিব৷