দেশৰ সেনা বাহিনীৰ মুৰব্বী হিচাপে আজি দায়িত্ব ভাৰ গ্ৰহণ কৰিলে জেনেৰেল মনোজ পাণ্ডেই ৷ তেওঁ হৈছে ২৯ তম সেনা প্ৰধান ৷ আজি জেনেৰেল এম এম নাৰাৱানে সেনা প্ৰধান হিচাপে অৱসৰ গ্ৰহণ কৰাৰ পাছতে তেওঁ দায়িত্ব গ্ৰহণ কৰে ৷ উপ- সেনা প্ৰধান হিচাপে কাৰ্যনিৰ্বাহ কৰি থকা জেনেৰেল পাণ্ডে কৰ্পছ অফ ইঞ্জিনিয়াৰৰ প্ৰথম বিষয়া হিচাপে বাহিনীটোৰ নেতৃত্ব দিব ৷
১ ফেব্ৰুৱাৰীত সেনাৰ উপ-প্ৰধান হিচাপে দায়িত্ব গ্ৰহণ কৰাৰ পূর্বে জেনেৰেল পাণ্ডে ইষ্টাৰ্ণ আৰ্মি কমাণ্ডৰ নেতৃত্ব দিছিল ৷ এই কামাণ্ডে ছিকিম আৰু অৰুণাচল প্ৰদেশত প্ৰকৃত নিয়ন্ত্ৰণ ৰেখা (এলএচি)ৰ পহৰাৰ দায়িত্ব পালন কৰি আহিছে ৷ পাকিস্তান আৰু চীনৰ আগ্ৰাসনৰ বাবে সীমান্তত সৃষ্টি হোৱা প্ৰত্যাহ্বানৰ মাজতে জেনেৰেল পাণ্ডেই ভাৰতীয় সেনাক নেতৃত্ব দিয়াৰ দায়িত্ব গ্ৰহণ কৰিছে ৷
জেনেৰেল পাণ্ডেই আন্দামান এণ্ড নিকোবৰ কমাণ্ডৰ (চিএনচিএএন) কমাণ্ডাৰ-ইন-চীফ হিচাপেও কাৰ্যনিৰ্বাহ কৰিছিল ৷ যি ভাৰতৰ একমাত্ৰ ত্ৰি-সেৱা কমাণ্ড।ৰাষ্ট্ৰীয় প্ৰতিৰক্ষা একাডেমীৰ প্ৰাক্তন ছাত্ৰ পাণ্ডেক ১৯৮২ চনৰ ডিচেম্বৰত কৰ্পছ অফ ইঞ্জিনিয়াৰচ (দ্য বম্বে চেপাৰছ)ত নিযুক্তি দিয়া হৈছিল।
