ইঞ্জিনবিহীন চলন্ত মালবাহী ৰে’লখন প্ৰত্যক্ষ কৰি স্থানীয় ৰাইজে খবৰ দিলে সাতগাঁও আৰক্ষী থানাত । মহানগৰীৰ সাতগাঁও সূৰ্য নগৰত ভয়ংকৰ ঘটনা ।
এক ভয়ংকৰ বিপদৰ পৰা ৰক্ষা পৰিল সাতগাঁও অঞ্চল । শুকুৰবাৰে নিশা নাৰেংগী সেনা শিবিৰৰ ৰে’ল ষ্টেচনৰ পৰা ইঞ্জিনবিহীন মালবাহী ৰে’ল এখন নিজে নিজে গুচি আহিল সাতগাঁও সূৰ্য নগৰলৈ । ইঞ্জিনবিহীন চলন্ত মালবাহী ৰে’লখন প্ৰত্যক্ষ কৰি স্থানীয় ৰাইজে খবৰ দিলে সাতগাঁও থানাত ।
আৰক্ষীৰ লোক ঘটনাস্থলীত উপস্থিত হৈ ৰাইজৰ সহযোগত জেক লগাই মালবাহী ৰে’লখন ৰখাবলৈ সক্ষম হয় । পিছত সাতগাঁও থানাৰ আৰক্ষীয়ে ঘটনা সন্দৰ্ভত সেনা বাহিনীক খবৰ দিয়ে । সেনা বাহিনীৰ লোক ইঞ্জিন লৈ আহি নিশাই পুনৰ ৰে’লখন নাৰেংগী সেনা শিবিৰৰ ষ্টেচনলৈ লৈ যায় ।
নাৰেংগী সেনা শিবিৰৰ ৰে’ল ষ্টেচনৰ পৰা ৰে’লখন প্ৰায় ৪ কিলোমিটাৰ গুচি অহাৰ ফলত কোনো ক্ষয়–ক্ষতি হোৱা নাই । নাৰেংগী সেনা শিবিৰৰ ৰে’ল ষ্টেচনৰ কৰ্মচাৰীৰ গাফিলতিৰ বাবেই এই ভয়ংকৰ ঘটনাটো সংঘটিত হোৱা বুলি স্থানীয় ৰাইজে অভিযোগ উত্থাপন কৰে।
