গুৱাহাটী, ১৩ ফেব্ৰুৱাৰী: আজি ৰাজ্যৰ অন্যতম সমন্বয়-সংহতি-ঐকাতাৰ সাহিত্যানুষ্ঠান “বহুবাক” (বহুভাষিক সাহিত্য মঞ্চ, অসম) ৰ উদ্যোগত “বিষ্ণুপ্ৰিয়া মণিপুৰী ভাষাৰ অতীত, বৰ্তমান, ভৱিষ্যৎ” লগতে “গতি আৰু প্ৰকৃতি” বিষয়ক এখনি ৰাষ্ট্ৰীয় পৰ্যায়ৰ আলোচনাচক্র দিশপুৰ প্ৰেছ ক্লাবত এক আড়ম্বৰপূর্ণ পৰিবেশৰ মাজত অনুষ্ঠিত হৈ যায়।
“বহুবাক”ৰ সভাপতি তথা সাহিত্যিক পেঞ্চনাৰ দিলস্ লক্ষ্মীন্দ্ৰ সিংহই সঞ্চালনা কৰা সভাখনি উদ্ধোধন কৰে মিছিং জনগোষ্ঠীৰ অগ্ৰণী লেখক তথা গুৱাহাটী উচ্চ ন্যায়ালয় বাৰ এচচিয়েছনৰ সচিব প্রধান জিতেন পায়েঙে। বহুবাকৰ প্ৰধান সম্পাদক তথা সাংবাদিক, লেখক দীপক শৰ্মাই আঁত ধৰা সভাত “বিষ্ণুপ্ৰিয়া মণিপুৰী ভাষাৰ অতীত, বৰ্তমান, ভৱিষ্যৎ” সম্পর্কে নগাঁও ছোৱালী মহাবিদ্যালয়ৰ সংস্কৃত বিভাগৰ সহযোগী অধ্যাপিকা ড০ সঞ্জীতা সিংহই কয়- “ভাষা মানৱজাতিৰ এক মহামূল্যবান সম্পদ। ভাষা যোগাযোগৰ বাহক, ই চিন্তাৰ বহি:প্ৰকাশ। মানৱ মনৰ সকলো চিন্তা, অনুসন্ধিৎসাৰ বহি:প্ৰকাশ ঘটে ভাষাৰ মাধ্যমেৰে।
এইক্ষেত্রত মাতৃভাষাৰ গুৰুত্ব সৰ্বাধিক। ভাষা শিকাৰ বিশেষ চেষ্টা অনুভব নকৰাকৈয়ে ব্যৱহাৰৰ যোগেদি মানুহে ভাষাক আয়ত্ব কৰে আৰু আগুৱাই গৈ থাকে। বিষ্ণুপ্ৰিয়া মণিপুৰী এটি নব্য ভাৰতীয় আৰ্য ভাষা। সৰহ সংখ্যক নব্য ভাৰতীয় আৰ্য ভাষাৰ আধুনিক ৰূপ খ্ৰীষ্টীয় চতুৰ্দশ শতাব্দীত বিকশিত হৈছিল। বিষ্ণুপ্ৰিয়া মণিপুৰী ভাষাও সেই সময়তে বিকাশ লাভ কৰা বুলি বিভিন্ন পণ্ডিতে একেমুখে মতপোষণ কৰিছে।” অৰুণাচল প্ৰদেশৰ বিশিষ্ট সাহিত্যিক তথা নাহৰলগুণ উচ্চতৰ মাধ্যমিক বিদ্যালয়ৰ বিষয় শিক্ষক ৰবীকান্ত সিংহই ” বিষ্ণুপ্ৰিয়া মণিপুৰী ভাষাৰ গতি-প্ৰকৃতি” বিষয়ত বক্তব্য দাঙি ধৰি কয়- “বিষ্ণুপ্ৰিয়া মণিপুৰীসকলৰ আদি ভূমি মণিপুৰৰ বিষ্ণুপুৰ।
তেওঁলোকৰ মাতৃভাষা বিষ্ণুপ্ৰিয়া মণিপুৰী। প্ৰাচীন ভাৰতীয় আৰ্য ভাষা বিশেষ এক পৰিবৰ্তনৰ মাজেৰে আহি আজিৰ নিজস্ব ৰূপ ল’বলৈ সমৰ্থিত হৈছে। বিষ্ণুপ্ৰিয়া মণিপুৰীসকলৰ পাঁচটি জাতি- জনগোষ্ঠী আছে। তেওঁলোকক একত্রে পঞ্চ বিষ্ণুপ্ৰিয়া মণিপুৰী বুলি কোৱা হয়। এই পাঁচটি গোষ্ঠী ক্ৰমে- খুমল, লোৱাং, আঙ্গম, মৈৰাং আৰু মাঙাং।” সৰোজিনী সিংহ, মীনা সিংহ, আশুতোষ সিংহই গীত পৰিৱেশন কৰি সৌষ্ঠব বৃদ্ধি কৰা সভাত ত্ৰিপুৰা কেন্দ্রীয় বিশ্ববিদ্যালয়ৰ অৱসৰপ্ৰাপ্ত অধ্যাপক ড০ বীৰেন্দ্ৰ কুমাৰ ভট্টাচার্য, গুৱাহাটী অনাতাঁৰ কেন্দ্রৰ প্ৰাক্তন সঞ্চালক তথা সংগীতজ্ঞ অৱনী ৰঞ্জন পাঠক, বিশিষ্ট লেখক ইন্দ্ৰেশ্বৰ নাথ, অৱসৰপ্ৰাপ্ত প্ৰশাসনিক বিষয়া তথা গীতিকাৰ শচীন দাস, অখিল ভাৰতীয় সাহিত্য পৰিষদৰ অসম প্ৰদেশ কমিটিৰ উপ-সভাপতি দেৱেশ্বৰ কলিতা, “নোৱাৰ” আলোচনীৰ পৰিচালন সম্পাদক চিমু সিংহ, নিখিল বিষ্ণুপ্ৰিয়া মণিপুৰী মহাসভাৰ উপ-সভাপতি ৰসময় সিংহ, হলিউড- বলিউডৰ বলিষ্ঠ অভিনেতা জয়ন্ত সিংহ, নিখিল বিষ্ণুপ্ৰিয়া মণিপুৰী যুৱ পৰিষদৰ সভাপতি নৰেন্দ্ৰ নাথ সিংহই সভাত বিশিষ্ট অতিথি হিচাপে বক্তব্য দাঙি ধৰি বহুবাকে লোৱা প্ৰদক্ষেপক আদৰণি জনায়।
সমন্বয় তথা ঐকাতাৰ হকে কৰা প্ৰচেষ্টা অতি গঠনমূলক বুলি অভিহিত কৰে।
