কাষ চাপি আহিছে পৌৰ নির্বাচনঃ পুনৰ প্ৰতিশ্ৰুতিৰ বন্যা বোৱাই নির্বাচনী ইস্তাহাৰ, ভোট দিলে কি কি দিব বিজেপিয়ে ?

যিকোনো নির্বাচনৰ প্ৰাকক্ষণত  ৰাইজৰ আগত  ৰাজনৈতিক দলসমূহে প্ৰতিশ্ৰুতিৰ বন্যা বোৱাই দিয়াটো একপ্ৰকাৰ পৰম্পৰাত  পৰিণত হৈছে ৷ নির্ধাৰিত সময়ত নির্বাচনৰ আগতে দিয়া প্ৰতিশ্ৰুতি পূৰণ কৰিবলৈ সমর্থ  নহ’লেও নতুনকৈ নির্বাচন অহাৰ লগে লগে ৰাইজক  পুনৰ সপোন দেখুৱাই ভাষণৰ ফুলজাৰি মৰাতো ৰাজনৈতিক নেতাসকলৰ অভ্যাস ৷ ৰাজ্যত সমাগত পৌৰ সভাৰ নির্বাচন ৷ ইতিমধ্যে ৱার্ডে ৱার্ডে আৰম্ভ হৈছে প্ৰচাৰ অভিযান ৷ ইয়াৰ মাজতে আজি  শাসনাধিষ্ঠিত বিজেপিয়ে মুকলি কৰিছে সংকল্প পত্ৰ ৷ পৌৰ সভাৰ নির্বাচনত ভোট দি জয়যুক্ত কৰিলে বিজেপিয়ে   নগৰ-চহৰসমূহত ২৪ ঘণ্টাই খোৱা পানী যোগানৰ পৰা আৰম্ভ কৰি কৃত্ৰিম  বানমুক্ত কৰিব বুলি ইয়াৰ জৰিয়তে আশ্বাস প্ৰদান কৰিছে ৷ আজি হেঙেৰাবাৰীস্থিত বিজেপিৰ ৰাজ্যিক মুখ্য কার্যালয়ত মুখ্যমন্ত্ৰী ডঃ হিমন্ত বিশ্ব শর্মাই মুকলি কৰা এই ঘোষণা প্ত্ৰ অনুসৰি বিজেপি বিজয়ী হ’লে প্ৰতিখন চহৰত ১০০০ লোক বহিব পৰাকৈ এটাকৈ  প্ৰেক্ষাগৃহ নির্মাণ কৰিব ৷  জলজীৱন মিচনৰ দৰেই অমৃত ২.০ আঁচনিৰ অধীনত পৌৰ সভাৰ এলেকা সমূহত বিশুদ্ধ খোৱা পানীৰ যোগান ধৰিব ৷ তদুপৰি চহৰসমূহত লগোৱা হ’ব ষ্ট্ৰীট লাইট  ৷  সমান্তৰালভাৱে গুৰুত্বপূর্ণ  স্থানসমূহত সুৰক্ষাজনিত  নিৰীক্ষণৰ বাবে  সংস্থাপন কৰা হ’ব  চি চি টি ভি ৷  তদুপৰি আৱর্জনাৰ সুব্যৱস্থাপনা  কৰিব বুলিও বিজেপিয়ে আশ্বাস প্ৰদান কৰিছে ৷ চহৰসমূহত সেউজ  উদ্যান, খেলপথাৰ আৰু  ষ্টেডিয়াম প্ৰতিষ্ঠা  কৰা হ’ব বুলিও বিজেপিয়ে সংকল্প পত্ৰত  উল্লেখ কৰিছে ৷  আনহাতে ডিজিটেল প্লেটফর্মৰ জৰিয়তে সেৱা প্ৰদান , যাতায়ত ব্যৱস্থাৰ উন্নয়ন , কৃত্ৰিম বান মুক্ত কৰা আদিও বিজেপিৰ  ভোটাৰৰ প্ৰতি প্ৰদান কৰা প্ৰতিশ্ৰুতিসমূহৰ অন্যতম ৷