গুৱাহাটী,৯ মাৰ্চ: আজি এক গাম্ভীর্যপূৰ্ণ পৰিবেশত ৰমেশ চন্দ্ৰ বড়া আৰু লিচুমাই বড়া ন্যাসৰ উদ্যোগত গুৱাহাটী প্ৰেছ ক্লাবত এখনি গ্ৰন্থ উন্মোচনী সভা অনুষ্ঠিত হয়৷সভাত বিশিষ্টা লেখিকা, মাধ্যমিক শিক্ষা বিভাগৰ অৱসৰপ্ৰাপ্ত অতিৰিক্ত সঞ্চালক ড০ অসমী গগৈৰ প্ৰবন্ধ পুথি ‘মন সাগৰত চিন্তাৰ ঢৌ’ উন্মোচন কৰি ‘দৈনিক অসম’ৰ কাৰ্যবাহী সম্পাদক দিলীপ মহন্তই কয় – “অসমৰ পুথিভঁৰালত গ্ৰন্থৰ সংখ্যা কমিছে ৷ পাঠকো নোহোৱা হৈছে। আজিকালি সৰহ সংখ্যক লোকে ম’বাইলত বেছি ব্যস্ত থাকে । ম’বাইলৰ বাবে শোৱণ, খাৱন সকলোতে নেতিবাচক প্ৰভাৱ পৰিছে। আমি মনত ৰখা দৰকাৰ যে গ্ৰন্থ অধ্যয়ন অতীব প্ৰয়োজন।”
বিশিষ্ট সাংবাদিক মহন্তই আৰু কয় : “জীৱন বিচিত্র। প্ৰতিজন মানুহে সাঁচতিয়া অনুভৱবোৰ লিখি যাব লাগে। জীৱন কালতে গ্ৰন্থ ৰূপত ছপাব লাগে। আত্মজীৱনী লিখা টান কাম। নৈতিক ভাৱে সৱল ১লোকে আত্মজীৱনী লিখিব পাৰে। ন-প্ৰজন্মক গ্ৰন্থ অধ্যয়নৰ স্পৃহা শিক্ষক সমাজে আনিব পাৰে।” লেখক উমাকান্ত বুঢ়াগোঁহাইৰ ‘গ্ৰন্থ -জ্ঞানৰ স্বৰ্গ’ নামৰ পুথিখন উন্মোচন কৰি সু-সাহিত্যিক, প্ৰাগজ্যোতিষ মহাবিদ্যালয়ৰ প্ৰাক্তন অধ্যক্ষ ড০ দয়ানন্দ পাঠকে কয়- পিতা-মাতাৰ প্ৰতি মানুহ শ্ৰদ্ধাশীল হ’ব লাগে। আজিৰ একাংশ লোকে পিতা-মাতাক জীয়াই থাকোঁতে পাহৰি যায় ৷ বিশ্বৰ ভিতৰত ভাৰতীয় সাহিত্য বেছি আগবঢ়া।
কবিতা লিখাটো টান কাম। কিন্তু চেষ্টা কৰিলে সকলো সহজ হৈ পৰে।” দুর্গামণি বৰগোঁহাইয়ে আদৰণি গীত পৰিৱেশন কৰা সভাৰ আঁত ধৰে সাংবাদিক, কবি, লেখক দীপক শৰ্মাই। সভাত বিশিষ্ট অতিথি হিচাপে লেখিকা সংস্থা, অসমৰ সভানেত্ৰী মৃদুলা শৰ্মা আৰু কামৰূপ [মহানগৰ] জিলা সাহিত্য সভাৰ সভাপতি দাসো কলিতাই অংশ লৈ লেখক-লেখিকা দুগৰাকীৰ গ্ৰন্থ দুখনিয়ে জগৎ সভাত স্থান পাব বুলি উল্লেখ কৰে।
“প্ৰাগজ্যোতিষ” সাপ্তাহিক কাকতৰ সম্পাদক শশীপ্ৰভা দাস, অসম সাংস্কৃতিক মহাসভাৰ সভাপতি পবিত্র কুমাৰ শৰ্মা, বিশিষ্ট ভাষাবিদ প্ৰমোদ চন্দ্র ভট্টাচার্য, শিশু সুৰক্ষা আয়োগৰ প্ৰাক্তন অধ্যক্ষা ড০ সুচিত্রা কাকতী, লেখিকা সংস্থা, অসমৰ প্ৰাক্তন সভাপতি মঞ্জুলা শৰ্মা ভট্টাচার্য, ‘বহুবাক’ৰ সভাপতি তথা বিষ্ণুপ্ৰিয়া মণিপুৰী সাহিত্য পৰিষদৰ সভাপতি দিলস্ লক্ষ্মীন্দ্ৰ সিংহ, নেপালী সাহিত্য সভাৰ উপ-সভাপতি নিৰু শৰ্মা পৰাজুলী, সমাজকৰ্মী ঘনশ্যাম শইকীয়া, উত্তৰ গুৱাহাটী সাহিত্য সভাৰ সভাপতি গৌৰীকান্ত কাকতী, ৰমেশ চন্দ্র বড়া আৰু লিচুমাই বড়া ন্যায়ৰ সভাপতি মহেন্দ্র বড়া, কাৰ্যকৰী সভাপতি উমাকান্ত ভট্টাচার্যই সন্মানীয় অতিথি হিচাপে অংশ লৈ চমু বক্তব্য দাঙি ধৰে।
