বকো, ২ এপ্রিল : কামৰূপ জিলা সাহিত্য সভাৰ অন্তৰ্গত বকো বিধান সভা সমষ্টিৰ অধিনৰ “জলজলী আঞ্চলিক শাখা সাহিত্য সভা”ৰ সৌজন্যত আজি “ডেকাচাং আঞ্চলিক হাইস্কুল” প্ৰাংগণত এখনি কবি সন্মিলনৰ আয়োজন কৰে। সেই উপলক্ষে পুৱা ৯ বজাত সাহিত্য সভাৰ পতাকা উত্তোলন কৰে বিশিষ্ট ব্যক্তি আব্দুল ৰহিমে।
ইয়াৰ পিছত দিনৰ ১২ বজাত শিক্ষাবিদ মনচুৰ ৰহমান খানৰ সভাপতিত্বত আৰু মেঘালয়ৰ উত্তৰ গাৰোপাহাৰৰ বাংশী আপাল উচ্চতৰ মাধ্যমিক বিদ্যালয়ৰ জ্যেষ্ঠ শিক্ষক আলতাব মজুমদাৰৰ সঞ্চালনাত কবি সন্মিলন অনুষ্ঠিত হয়। শাখা সভাৰ সভাপতি আলাউদ্দিন আল আমিনে আদৰণি ভাষণ দিয়া, সম্পাদক আমিনুল হকে উদ্দেশ্য ব্যাখ্যা কৰা সভাত “বহুভাষিক সাহিত্য মঞ্চ, অসম”ৰ প্ৰধান সম্পাদক, সাংবাদিক, কবি দীপক শৰ্মাই মুখ্য অতিথি হিচাপে ভাষণ দি কয়- অসমত বৰ্তমান এক লাখ কবিয়ে কাব্য চৰ্চা কৰি আছে।
ই অসমীয়া জাতিটোৰ বাবে শুভ লক্ষণ। কবিৰ হৃদয় পবিত্র হ’ব লাগে। পবিত্র হৃদয়ত ঈশ্বৰ-আল্লা,গড- ফাদাৰে বাস কৰে। কবিৰ সংখ্যা বাঢ়িছে যদিও মানবিশিষ্ট কবিৰ সংখ্যা কম। অসমীয়া কবিতা সাহিত্যৰ বাবে সৌভাগ্য যে অসমৰ বৰেণ্য কবি নীলমণি ফুকনে এইবেলি জ্ঞানপীঠ বঁটা লাভ কৰিবলৈ সমৰ্থ হৈছে।ড০ বীৰেন্দ্ৰ কুমাৰ ভট্টাচার্য,ড০ মামণি ৰয়ছম গোস্বামীৰ পিছত তৃতীয় জন অসমীয়াই জ্ঞানপীঠ বঁটা লাভ কৰিছে।
” সভাত সোণতলী আঞ্চলিক মহাবিদ্যালয়ৰ প্ৰবক্তা ড০ আজমল হক, গৰৈমাৰী ফখৰুদ্দিন আলী আহমদ মহাবিদ্যালয়ৰ প্ৰবক্তা বেগম ৰুণা লাইলা মজুমদাৰ, গৰৈমাৰী ছোৱালী হাইস্কুলৰ প্ৰধান শিক্ষক দোস্ত হবিবুৰ ৰহমান, সমাজসেৱী গীতাঞ্জলি গগৈ, কবি নুৰ নাহাৰ জিয়া, সোণতলী সাহিত্য সভাৰ সভাপতি ছামছুল আলম ভূঞা, কবি স্বপ্না শৰ্মা, কবি সুৰেণ চন্দ্র বড়োই আমন্ত্রিত অতিথি হিচাপে অংশলৈ কবিতাৰ লগতে সাম্প্রতিক সময়ৰ সাহিত্য চৰ্চাৰ ওপৰত আলোকপাত কৰে।
কবি সন্মিলনত আব্দুল হক, এনী বাইদেউ, দীম্পি কলিতা, বৰষা কলিতা, ড০ আটাউৰ ৰহমান, আব্দুল কালাম আজাদ, ববিতুল ইছলাম, ৰেহেনা পাৰবিন, আব্দুল হালিম, গায়ত্রী কলিতা, ৰুণুমা পাৰবিন, জাহাংগীৰ শ্বাহ, নেকিবুজ জামান, জাহানুৰ ৰহমান, মইনুল হক আদি দক্ষিণ কামৰূপ, গুৱাহাটী, গোৱালপাৰা, বৰপেটা, মেঘালয়ৰ পৰা দুই শতাধিক কবিয়ে কবিতা পাঠ কৰে। কেইবাজনো ছাত্র-ছাত্ৰীয়ে গীত গোৱাৰ লগতে নৃত্য পৰিবেশন কৰি পৰিৱেশ সৌষ্ঠৱ বৰ্দ্ধন কৰে।
