শুকুৰবাৰে নিশা অসমৰ ডিব্ৰুগড় জিলাৰ দুলীয়াজানত সংঘটিত হয় এক ভয়াবহ অগ্নিকাণ্ড।অগ্নিকাণ্ডটো যোৱা নিশা দুলীয়াজানৰ কুমুদ নগৰ গাঁৱৰ প্ৰৱেশদ্বাৰৰ ওচৰত সংঘটিত হৈছিল।জানিবপৰা মতে উক্ত অগ্নিকাণ্ডত প্ৰায় আঠটা ব্যৱসায়িক প্ৰতিষ্ঠান সম্পূৰ্ণৰূপে ভষ্মীভূত হয় ৷
স্থানীয় লোকসকলে বৈদ্যুতিক শ্বৰ্ট-চাৰ্কিটৰ পৰাই এই অগ্নিকাণ্ডৰ সূত্ৰপাত হোৱা বুলি সন্দেহ প্ৰকাশ কৰিছে যদিও এতিয়ালৈকে পোহৰলৈ অহা নাই অগ্নিকাণ্ডৰ প্ৰকৃত ৰহস্য ৷
অগ্নিকাণ্ড সংঘটিত হোৱাৰ কিছু সময়ৰ পিছতেই স্থানীয় আৰক্ষী ঘটনাস্থলীত উপস্থিত হয় আৰু এই ভয়ানক অগ্নিকাণ্ড সন্দৰ্ভত তদন্ত আৰম্ভ কৰে।
তদুপৰি, অইল ইণ্ডিয়া লিমিটেডৰ (অইএল) মুঠ তিনিখন অগ্নি নিৰ্বাপক গাড়ী ঘটনাস্থলীত উপস্থিত হয়। এঘণ্টাৰো অধিক সময় ধৰি অব্যাহত প্ৰচেষ্টাৰ পিছত তেওঁলোকে সফলতাৰে জুই নিয়ন্ত্ৰণলৈ আনিবলৈ সক্ষম হয়। অগ্নি নিৰ্বাপক বাহিনীৰ দ্ৰুত পদক্ষেপৰ বাবে জুইকুৰা ওচৰৰ আন ব্যৱসায়লৈ বিয়পি পৰাৰ পৰা ৰক্ষা পৰে।
অগ্নিকাণ্ডটোৰ ফলত কাৰো প্ৰাণহানি হোৱা নাই বুলি জানিব পৰা গৈছে যদিও মন কৰিবলগীয়া যে উক্ত অগ্নিকাণ্ডটোত ইতিমধ্যে লক্ষাধিক টকাৰ সা- সম্পত্তি ভস্মীভূত হৈছে।
