আমেৰিকা যুক্তৰাষ্ট্ৰৰ প্ৰাক্তন ৰাষ্ট্ৰপতি ডনাল্ড ট্ৰাম্পৰ প্ৰাক্তন পত্নী ইভানা ট্ৰাম্পৰ মৃত্যু ৷ আমেৰিকা যুক্তৰাষ্ট্ৰৰ প্ৰাক্তন ৰাষ্ট্ৰপতিগৰাকীয়ে জনোৱা মতে ইভানাই নিউয়ৰ্ক চহৰত থকা তেওঁৰ বাসগৃহত মৃত্যুবৰণ কৰে।ইভানা ট্ৰাম্প আছিল ডনাল্ড ট্ৰাম্পৰ প্ৰথম পত্নী। তেওঁলোকৰ তিনিটা সন্তান ক্ৰমে ডনাল্ড জুনিয়ৰ, ইভাঙ্কা আৰু এৰিক ট্ৰাম্প।
ট্ৰাম্পৰ সন্তান সকলে এক বিবৃতিত কয় যে তেওঁলোকৰ মাতৃ এগৰাকী অসাধাৰণ মহিলা আছিল – যি ব্যৱসায়ত এক শক্তি, এগৰাকী বিশ্বমানৰ খেলুৱৈ, এক আকৰ্ষণীয় ব্যক্তিত্বৰ অধিকাৰী আৰু যি সদায় এগৰাকী যত্নশীল মাতৃ আৰু বন্ধু ৷
আনহাতে বৃহস্পতিবাৰে আবেলি এৰিক ট্ৰাম্পে তেওঁৰ মাতৃৰ এপাৰ্টমেণ্ট ভৱনৰ পৰা ওলাই অহাৰ সময়ত তেওঁ সাংবাদিকসকলক কৈছিল যে এইটো এটা অতি দুখৰ দিন।
আৰক্ষীৰ সূত্ৰঅনুসৰি, ইভানা ট্ৰাম্পক তেওঁৰ এপাৰ্টমেণ্টৰ চিৰিৰ তলত অচেতন আৰু প্ৰতিক্ৰিয়াহীন অৱস্থাত পোৱা গৈছিল।
উল্লেখযোগ্য যে ইভানা আৰু ট্ৰাম্পৰ ১৯৯২ চনত বিবাহ বিচ্ছেদ হৈছিল। প্ৰাক্তন ৰাষ্ট্ৰপতিগৰাকীৰ মাৰ্লা মেপলছৰ সৈতে সম্পৰ্ক থকাৰ কথা প্ৰকাশ হোৱাৰ পিছতে তেওঁলোকৰ বিবাহ বিচ্ছেদ হয় ৷
২০১৭ চনত এবিচি নিউজৰ এমি ৰোবাখৰ সৈতে হোৱা এক সাক্ষাৎকাৰত, ইভানা ট্ৰাম্পে কৈছিল যে তেওঁ তেওঁৰ পূৰ্বৰ স্বামীক ক্ষমা কৰিছিল। আনহাতে তেওঁ তেওঁৰ সন্তানক ডনাল্ড ট্ৰাম্পৰ সৈতে ডাঙৰ-দীঘল কৰাৰ গঠনমূলক বছৰবোৰো বৰ্ণনা কৰিছিল।
