গুৱাহাটী স্মাৰ্ট চিটি লিমিটেডে (জিএছচিএল) অহা ১৫ আগষ্টৰ ভিতৰত মহানগৰীৰ উলুবাৰীত কমাণ্ড এণ্ড কণ্ট্ৰোল চেণ্টাৰৰ সৈতে চহৰখনৰ ২০ টা স্থানত এক নতুন ট্ৰেফিক ব্যৱস্থাপনা প্ৰণালী আৰম্ভ কৰিবলৈ প্ৰস্তুতি চলাইছে।
জানিব পৰা মতে প্ৰকল্পটোৰ জৰিয়তে চহৰখনৰ ৯৪ টা ট্ৰেফিক জংচনত চিগনেলযুক্ত পথচাৰী ক্ৰছিঙৰ সৈতে অভিযোজিত যান-বাহন নিয়ন্ত্ৰণ (এটিচিএছ) স্থাপন কৰাৰ পৰিকল্পনা কৰিছে। প্ৰকল্পটোৱে এই ৯৪ টা ট্ৰেফিক জংচনত যান-বাহন উলংঘন চিনাক্তকৰণ প্ৰণালী (টিভিডিএছ)ৰ ব্যৱস্থা কৰিব। প্ৰকল্পটোৰ অন্যান্য বিশেষত্ববোৰৰ ভিতৰত থাকিব কেমেৰা-আধাৰিত স্বয়ংক্ৰিয় নম্বৰ প্লেট চিষ্টেম (এএনপিআৰ), কেমেৰা-আধাৰিত ৰেড লাইট উলংঘন চিনাক্তকৰণ প্ৰণালী (আৰএলভিডি),১০ টা স্থানত কেমেৰা-আধাৰিত গতি উলংঘন চিনাক্তকৰণ প্ৰণালী (এছভিডি), অন্যান্য যান-বাহন উলংঘন চিনাক্তকৰণ যেনে দুচকীয়া বাহনৰ হেলমেট-বিহীন ৰাইডিং, ট্ৰিপল ৰাইডিং, চিট বেল্ট নথকা, ফোনত কথা পাতি গাড়ী চলোৱা ইত্যাদি। প্ৰকল্পটোৰ জৰিয়তে সকলো ট্ৰেফিক জংচন আৰু এছভিডি স্থানৰ ২৪এক্স ৭ ভিডিঅ’ নিৰীক্ষণৰ লগতে নিয়ম উলংঘনকাৰীসকলৰ বাবে ই-চালান প্ৰণালীৰো পৰিকল্পনা কৰা হৈছে।
প্ৰকল্পটো ‘টেকন’চিছ চিকিউৰিটি চিষ্টেমছ প্ৰাইভেট লিমিটেড’ৰ দ্বাৰা সম্পাদন কৰা হৈছে। ইয়াৰ উদ্দেশ্য হৈছে কেমেৰা-আধাৰিত বাহন চিনাক্তকৰণ প্ৰণালীৰ জৰিয়তে ৰাজ্যখনত যান-বাহনৰ প্ৰবাহ আৰু বাহনৰ উপস্থিতিৰ তথ্যৰ ওপৰত নিৰ্ভৰ কৰি যান-বাহন-প্ৰতিক্ৰিয়াশীল ৰণনীতি ব্যৱহাৰ কৰি ট্ৰেফিক চিগনেল নিৰীক্ষণ কৰা আৰু নিয়ন্ত্ৰণ কৰা।
