সুগন্ধি পখিলাৰ কবি হীৰেন ভট্টাচাৰ্যৰ ওপজা দিনটো সদৌ অসম কবি সন্মিলনে ”শইচ আৰু শব্দৰ দিন” ৰূপে উদযাপন কৰি আহিছে । সেই অনুসৰি মৰিগাঁও জিলা কবি সন্মিলনৰ অন্তৰ্ভুক্ত কলং-কপিলী শাখা কবি সন্মিলনৰ উদ্যোগত বিগত বৰ্ষৰ দৰে এইবেলিও জাগী ভকতগাঁৱত ”শইচ আৰু শব্দৰ দিন” উদ্ যাপন কৰা হয় । কলং-কপিলী শাখা কবি সন্মিলনৰ প্ৰতিষ্ঠাপক সভাপতি অনিৰুদ্ধ ডেকাই কাব্যৰত্ন হীৰেন ভট্টাচাৰ্যৰ প্ৰতিচ্ছবিৰ সন্মুখত বন্তি প্ৰজ্বলন কৰি শ্ৰদ্ধাঞ্জলি নিবেদন কৰাৰ পাছতেই বাঁহী বাদক ভাৰত বৰাই ”হেৰৌ বাঁহী” গীতটিত বাঁহী বাদন কৰি অনুষ্ঠানৰ শুভাৰম্ভণি কৰে।
কলং-কপিলী শাখা কবি সন্মিলনৰ সভানেত্ৰী মিনতি দেৱীৰ বাসগৃহত আয়োজিত অনুষ্ঠানটিত উপস্থিত থাকি সদৌ অসম কবি সন্মিলনৰ কেন্দ্ৰীয় কাৰ্যনিৰ্বাহক তথা মৰিগাঁও জিলা কবি সন্মিলনৰ উপ সভাপতি ভবেন চন্দ্ৰ নাথে হীৰেন ভট্টাচাৰ্যৰ সান্নিধ্যৰ কথা সুঁৱৰি হীৰুদাৰ কবিতা পাঠকে ওঁঠত লৈ ফুৰে বুলি উল্লেখ কৰাৰ লগতে ”মোৰ দেশ” কবিতাটি আবৃত্তি কৰি অনুষ্ঠানটিৰ সৌষ্ঠৱ বৃদ্ধি কৰে । কলং-কপিলী শাখা কবি সন্মিলনৰ সম্পাদক জয়ন্ত সাগৰ শইকীয়াই আঁত ধৰা অনুষ্ঠানটিত বহুভাষিক কবি ৰাজুমনি শইকীয়াই কয় যে হীৰুদাই দুৰ্বোধ্যৰ বিপৰীতে স্বকীয় শৈলীৰে অসমীয়া কাব্য জগতত এটা সুকীয়া ধাৰাৰ সৃষ্টি কৰিছিল ।
হীৰুদাৰ সৃষ্টিৰাজিক বিভিন্ন ভাষালৈ অনুবাদ কৰিব লাগে বুলিও কবি ৰাজুমনি শইকীয়াই ভাষণ প্ৰসংগত উল্লেখ কৰে। জাগী ভকতগাঁও শাখা সাহিত্য সভাৰ প্ৰাক্তন সভাপতি হীৰেন শৰ্মাই হীৰেন ভট্টাচাৰ্যৰ কবিতাত বাণী আছে বাবেই তেওঁ সৰ্বস্তৰৰ পাঠকৰ প্ৰিয় কবি বুলি মন্তব্য কৰে । অনুষ্ঠানত কলং-কপিলী শাখা কবি সন্মিলনৰ প্ৰতিষ্ঠাপক সম্পাদক তথা মৰিগাঁও জিলা কবি সন্মিলনৰ সহকাৰী সম্পাদক ৰাজীৱ চহৰীয়া,জাগী ভকতগাঁও শাখা সাহিত্য সভাৰ প্ৰাক্তন সম্পাদক ৰণ্টুমণি শইকীয়া, সাহিত্যসেৱী ৰেণুধৰ কোঁৱৰ, শিক্ষক তথা কাব্যানুৰাগী জয়সিং বৰদলৈ,কলং-কপিলী শাখা কবি সন্মিলনৰ সভানেত্ৰী মিনতি দেৱী, কবি অঞ্জু বৈশ্য,সাংবাদিক হিমু বৰাই হীৰেন ভট্টাচাৰ্যক সুঁৱৰি চমু বক্তব্য প্ৰদান কৰে ।
অনুষ্ঠানটিত শিল্পী লাচিত ডেকাই হীৰেন ভট্টাচাৰ্য ৰচিত এটি গীত পৰিবেশন কৰি প্ৰেম আৰু ৰ’দালিৰ কবিগৰাকীক ওপজা দিনত স্মৰণ কৰে । সদৌ অসম কবি সন্মিলনৰ কাব্য মন্ত্ৰৰে অনুষ্ঠানটিৰ সামৰণি পৰে ।
