অসমৰ এগৰাকী স্বনামধন্য কবি, ঔপন্যাসিক ৰীতা চৌধুৰীৰ আজি ওপজা দিন ৷ তেওঁৰ জন্ম হয় ১৯৬০ চনত অৰুণাচল প্ৰদেশৰ তিৰাপ জিলাৰ নামপঙত ৷ লেখক বিৰজা নন্দ চৌধুৰী আৰু সমাজকৰ্মী শ্ৰী মলিনা চৌধুৰীৰ কন্যা ৰীতা চৌধুৰী । তেওঁ উজনি হাফলং এল পি স্কুল আৰু মাৰ্ঘেৰিটা পাব্লিক হায়াৰ চেকেণ্ডাৰী স্কুলৰ পৰা স্কুলীয়া শিক্ষা গ্ৰহণ কৰিছিল।
অৱশ্যে অসম আন্দোলনৰ সময়ত ১৯৮০ চনত তেওঁলোকৰ পৰিয়াল গুৱাহাটীলৈ স্থানান্তৰিত হয় ৷ অসম আন্দোলনতো তেওঁ সক্ৰিয় ভাৱে জড়িত হৈ পৰিছিল আৰু কেইবাবাৰো কাৰাগাৰলৈ যাব লগীয়া হৈছিল ৷
তেওঁ ১৯৮২ চনত গুৱাহাটী বিশ্ববিদ্যালয়ৰ অধীনত কটন কলেজৰ পৰা ৰাজনীতি বিজ্ঞানৰ স্নাতক হৈছিল। তেওঁ ৰাজনীতি বিজ্ঞানত এমএ আৰু এলএলবি (১৯৯০) আৰু গুৱাহাটী বিশ্ববিদ্যালয়ৰ পৰা ২০০৫ চনত পিএইচডি সন্মান লাভ কৰিছিল ।
তেওঁ ১৯৮৯ চনৰ পৰা ১৯৯১ চনলৈ কাৰ্বি আংলঙৰ ডিফু চৰকাৰী মহাবিদ্যালয়ত ৰাজনীতি বিজ্ঞানৰ প্ৰবক্তা হিচাপে শিক্ষকতা জীৱন আৰম্ভ কৰিছিল। ১৯৯১ চনৰ পৰা ১৯৯৬ চনলৈ প্ৰবক্তা আৰু ১৯৯৬ চনৰ পৰা ২০০১ চনলৈ একেখন মহাবিদ্যালয়ত জ্যেষ্ঠ প্ৰবক্তা হিচাপে কাম কৰিছিল চৌধুৰীয়ে। আনহাতে ২০০১ চনৰ পৰা তেওঁ গুৱাহাটীৰ কটন কলেজৰ ৰাজনীতি বিজ্ঞান বিভাগত সহযোগী অধ্যাপক আছিল ৷
১৯৮১ চনত প্ৰকাশ পোৱা চৌধুৰীৰ প্ৰথম খন উপন্যাস আছিল অবিৰাতা যাত্ৰা যি অসম সাহিত্য সভাৰ দ্বাৰা অনুষ্ঠিত সাহিত্য প্ৰতিযোগিতাত প্ৰথম পুৰস্কাৰ লাভ কৰিছিল।
চৌধুৰীয়ে ১৯৮৮ চনত তীৰ্থভূমি, ১৯৯৩ চনত মহা জীৱনৰ আধাৰশিলাকে ধৰি কেইবাখনো উপন্যাস লিখিছিল ৷ ১৯৯৬ চনত নয়না তৰালী সুজাতা, ১৯৯৮ চনত পপীয়া তৰাৰ সাধু , ১৯৯৯ চনত ৰাগ-মালকোষ, ১৯৯৯ চনত জল-পদ্ম, ২০০৩ চনত হৃদয় নিৰূপায়, দেও লাংখুই , ২০১০ চনত মাকাম আৰু ২০১২ চনত মায়াবৃত্তৰ ৰচনাৰে তেওঁ অসমীয়া সাহিত্যলৈ যি অৱদান আগবঢ়াইছে সি অতুলনীয় ৷ তেখেতৰ প্ৰতিখন উপন্যাসেই সমাজৰ কিছুমান গুৰুত্বপূৰ্ণ দিশৰ চিত্ৰণ।
তেওঁ ২০০৮ চনত অসমৰ তিৱাসকলৰ ওপৰত আধাৰিত দেও লাংখুই উপন্যাস খনৰ বাবে সাহিত্য অকাডেমি বঁটা লাভ কৰিছিল। আনহাতে তেওঁৰ আন এখন জনপ্ৰিয় উপন্যাস মাকাম ইংৰাজীলৈও অনুবাদ কৰা হয় যাৰ শিৰোনাম হৈছে ‘চায়নাটাউন ডেজ’ ৷
চৌধুৰীৰ কল্পকাহিনীয়ে জীৱন আৰু সমাজৰ বাস্তৱতাক প্ৰতিফলিত কৰে। অৱশ্যে কেতিয়াবা ই সমসাময়িক আৰু কেতিয়াবা ই ঐতিহাসিক । তেওঁৰ বেছিভাগ উপন্যাস গৱেষণা-আধাৰিত।
আজি তেখেতৰ ওপজা দিনত লেখিকা গৰাকীলৈ যাচিলোঁ আন্তৰিক শুভকামনা ৷
