শেহতীয়াকৈ ভাৰতৰ এগৰাকী জনপ্ৰিয় কণ্ঠশিল্পী নেহা কক্কৰৰ কণ্ঠত মুক্তি লাভ কৰা এটি জনপ্ৰিয় হিন্দী গীতৰ পুনঃসংস্কৰণক লৈ সমগ্ৰ দেশতে সৃ্ষ্টি হৈছে তীব্ৰ প্ৰতিক্ৰিয়াৰ ৷ জনপ্ৰিয় গীতটোৰ প্ৰকৃত গায়ক ফাল্গুনী পাঠকে নেহা কক্কৰৰ বিৰুদ্ধে ল’ব বিচাৰিছে আইনী ব্যৱস্থা ৷ শেহতীয়াকৈ নেহাৰ কণ্ঠৰ গীত ‘অ’ সজনা’ মুক্তি পোৱাৰ পিছৰে পৰা কিছু নেতিবাচক পৰিস্থিতিৰ সন্মুখীন হৈছে শিল্পীগৰাকী। অৱশ্যে, এইক্ষেত্ৰত অনুৰাগীসকলে সমৰ্থন কৰিছে তেওঁক।
এটা সময়ত জনপ্ৰিয় কণ্ঠশিল্পী ফাল্গণী পাঠকৰ কণ্ঠৰে নিগৰা ‘অ’ সজনা গীতটোৱে এসময়ত সমগ্ৰ ভাৰততে খলকনি তুলিছিল । যিটো গীতত বৰ্তমান কণ্ঠ নিগৰাইছে নেহা কক্কৰে। একে সময়তে, ধনশ্ৰী বাৰ্মা আৰু প্ৰিয়ংক শৰ্মাক নেহাৰ সৈতে দেখা গৈছে ভিডিঅ’টোত । কিন্তু নেহাৰ এই গানটো ৯০ ৰ দশকৰ ফাল্গুনী পাঠকৰ জনপ্ৰিয় আৰু হিট গীত ‘মেইনে পায়েল হে চনকাই’ৰ নতুন ৰূপ। শেহতীয়াকৈ গীতটোৰ ভিডিঅ’টোক লৈ ছ’চিয়েল মিডিয়াত সংগীত প্ৰেমী সকলে নেহাই পুৰণি গানটো নষ্ট কৰা বুলি মন্তব্য কৰিছে । আনহাতে নেহাক বহুতবাৰ ট্ৰ’ল কৰা হৈছে সামাজিক মাধ্যমত ।
আনহাতে ফাল্গুনী পাঠকেও একো নোকোৱাকৈ ছ’চিয়েল মিডিয়াত এটা পোষ্ট শ্বেয়াৰ কৰিছে, য’ত তেওঁৰ অনুৰাগী সকলে মন্তব্য কৰিছে যে নেহাই এই গানটোৰ জৰিয়তে ফাল্গুনীৰ প্ৰকৃত গানটো নষ্ট কৰিছে।
অৱশ্যে এই গানটোৰ বিষয়ে শেহতীয়াকৈ এটা সাক্ষাৎকাৰত ফাল্গুনীয়ে কয় যে নেহা বা নিৰ্মাতাসকলে গানটো মুকলি হোৱাৰ আগতে বা পিছত এই গানটোৰ পুনঃসংস্কৰণৰ বিষয়ে তেওঁৰ সৈতে কথা পতা নাছিল। গায়িকাগৰাকীয়ে লগতে কয় যে তেওঁ নেহাৰ বিৰুদ্ধে আইনী ব্যৱস্থা ল’ব বিচাৰে যদিও গানটোৰ অধিকাৰ নথকাৰ বাবে এনে কৰিব নোৱাৰে।
১৯৯৯ চনত মুক্তি দিয়া হৈছিল ফাল্গুনীৰ কণ্ঠৰ এই জনপ্ৰিয় গীতটো আৰু এই গীতটোৰ ভিডিঅ’ত এটা পুতলাৰ প্ৰদৰ্শনী দেখুওৱা হৈছিল। আনহাতে ১৯ ছেপ্টেম্বৰত ইউটিউবত প্ৰিমিয়াৰ হৈছিল নেহাৰ অ’ সজনা গীতটোৰ । এই গানটো ৰচনা কৰিছে পুৰণি হিন্দী গানবোৰ পুনৰ নিৰ্মাণ কৰা তানিষ্ক বাগচীয়ে ।
