হৃদৰোগত আক্ৰান্ত জনপ্ৰিয় বলীউড অভিনেতা আমিৰ খানৰ মাতৃ জিনাত হুছেইন ৷ দীপাৱলীৰ সময়ৰ পৰাই মুম্বাইৰ ব্ৰিচ ক্যাণ্ডি হাস্পতালত ভৰ্তি কৰোৱা হৈছে অভিনেতা গৰাকীৰ মাতৃক ৷ দীপাৱলী উপলক্ষে পুত্ৰ আমিৰ খানৰ পঞ্চগনিৰ বাংলোলৈ গৈছিল জিনাত হুছেইন আৰু তাতেই অসুস্থ হৈ পৰাৰ পিছত তেওঁক চিকিৎসালয়ত ভৰ্তি কৰোৱা হয় ৷
তাহিৰ হুছেইন আৰু জিনাতৰ সন্তান জনপ্ৰিয় বলীউড অভিনেতা আমিৰ খান ৷ ফয়জল খান আমিৰৰ ভাতৃ ৷ এই বছৰ জুনত মাতৃৰ জন্মদিন উদযাপন কৰিছিল অভিনেতা আমিৰে ৷ য’ত সংগ দিছিল আমিৰৰ প্ৰাক্তন পত্নী কিৰণ ৰাও আৰু পুত্ৰ আজাদ ৰাও খানে ৷ জন্মদিন উদযাপনৰ এটি ভিডিঅ’ত মাতৃ জিনাতৰ সৈতে একেলগে দেখা গৈছিল তেওঁলোক সকলোকে ৷
শেহতীয়াকৈ কৰা মাতৃ দিৱস উদযাপনত অভিনেতা গৰাকীয়ে ব্যক্ত কৰিছিল যে তেওঁৰ জীৱনত তেওঁৰ মাতৃৰ স্থান আটাইতকৈ গুৰুত্বপূৰ্ণ ৷ আনহাতে এটি সাক্ষাৎকাৰত অভিনেতা গৰাকীয়ে কৈছিল যে মাতৃয়েই তেওঁৰ জীৱনক সকলোতকৈ বেছিকৈ প্ৰভাৱিত কৰিছে ৷ তেওঁ ডাঙৰ হৈ অহাৰ সময়ছোৱাত মাতৃ জিনাতেই আছিল তেওঁৰ সকলোতকৈ প্ৰিয় ব্যক্তি আৰু আজিলৈকে মাতৃৰ প্ৰতি থকা সেই ভালপোৱা সেই অনুভূতি সলনি হোৱা নাই অভিনেতা তথা জিনাত পুত্ৰ আমিৰ খানৰ ৷
