উত্তৰাখণ্ড ভাৰতবৰ্ষৰ সকলোতকৈ আকৰ্ষণীয় ৰাজ্যসমূহৰ ভিতৰত অন্যতম ৰাজ্য ৷ অপৰূপ প্ৰাকৃতিক সৌন্দৰ্য্যৰে ভৰা হিমালয়ৰ বুকুত অৱস্থিত এই পাহাৰীয়া ৰাজ্যখনে প্ৰতিবছৰেই ৯নৱেম্বৰত উদযাপন কৰে ৰাজ্যখনৰ প্ৰতিষ্ঠা দিৱস ৷ কাইলৈ উত্তৰাখণ্ডে উদযাপন কৰিব ৰাজ্যখনৰ ২২সংখ্যক প্ৰতিষ্ঠাদিৱস ৷
এই উত্তৰাখণ্ড দিৱসৰ ইতিহাস-
‘উত্তৰাখণ্ড’ আচলতে এটা সংস্কৃত শব্দ যাৰ আক্ষৰিক অৰ্থ ‘উত্তৰৰ চহৰ’। দৰাচলতে ১৯৫০ চনত ভাৰতৰ সংবিধান বলবৎ হোৱাৰ পাছত সংযুক্ত প্ৰদেশক উত্তৰ প্ৰদেশৰ নাম দিয়া হৈছিল। জনসংখ্যাৰ হিচাপত ই আছিল দেশৰ সৰ্ববৃহৎ ৰাজ্য। হয়তো এইবোৰ কাৰণতে ৰাজ্য চৰকাৰে ৰাজ্যবাসীৰ সকলো মৌলিক প্ৰয়োজন পূৰণ নিশ্চিত কৰিব পৰা নাছিল। সকলো সম্পদ উপলব্ধ হোৱাৰ পিছতো ৰাজ্যত দৰিদ্ৰতা, নিবনুৱা সমস্যা, প্ৰয়োজনীয় সম্পদৰ অভাৱ আছিল আৰু সেয়েহে এই সমস্যাসমূহৰ মোকাবিলা কৰিবলৈ উত্তৰাখণ্ড ক্ৰান্তি দলৰ জন্ম হৈছিল। যি পাহাৰীয়া অঞ্চলৰ জনসাধাৰণৰ প্ৰত্যাহ্বান আৰু মৌলিক প্ৰয়োজনীয়তাৰ ওপৰত গুৰুত্ব আৰোপ কৰি উত্তৰ প্ৰদেশৰ পৰা পৃথক,স্বাধীন ৰাষ্ট্ৰৰ দাবী উত্থাপন কৰিছিল। ১৯৯৪ চনৰ ২ অক্টোবৰত সুকীয়া ৰাজ্যৰ বাবে এক বৃহৎ হিংসাত্মক আন্দোলন আৰম্ভ হয় আৰু অৱশেষত ৬ বছৰীয়া আন্দোলনৰ অন্তত ২০০০ চনৰ ৯ নৱেম্বৰত পাহাৰীয়া ৰাজ্য উত্তৰাখণ্ডে বিশেষ ৰাজ্যৰ মৰ্যাদা লাভ কৰে। এই ৰাজ্যক ২০০৭ চনৰ ১ জানুৱাৰীত উত্তৰাখণ্ড নামেৰে নামাকৰণ কৰা হয়।
উত্তৰাখণ্ডৰ প্ৰাকৃতিক সম্পদ-
উত্তৰাখণ্ডৰ উত্তৰে তিব্বত, পূবে নেপাল, পশ্চিমে হিমাচল প্ৰদেশ আৰু দক্ষিণে উত্তৰ প্ৰদেশ। এই ৰাজ্যখন দেৱভূমি নামেৰেও জনপ্ৰিয় কাৰণ বহুকেইখন পৌৰাণিক স্থানৰ লগতে হিন্দু ধৰ্মৰ আটাইতকৈ পবিত্ৰ আৰু বৃহৎ নদী গংগা আৰু যমুনা নদীৰ উৎপত্তিস্থল এই উত্তৰাখণ্ড। প্ৰচুৰ প্ৰাকৃতিক সম্পদেৰে সমৃদ্ধ এই ৰাজ্যখনত আছে নদী, ঘন অৰণ্য আৰু বৰফেৰে আবৃত পৰ্বতমালা যিয়ে ৰাজ্যখনক প্ৰদূষণমুক্ত কৰি তোলাত গুৰুত্বপূৰ্ণ ভূমিকা পালন কৰে।
চাৰি ধাম –
‘দেৱ ভূমি’ নামেৰে পৰিচিত এই ৰাজ্যখনৰ বদ্ৰীনাথ, কেদাৰনাথ, গংগোত্ৰী আৰু যমুনোত্ৰী নামৰ চাৰিখন পৱিত্ৰ ধাম আছে যাক উত্তৰাখণ্ডৰ ‘চাৰি ধাম’ বুলিও কোৱা হয়। আনহাতে হৰিদ্বাৰৰ হৰ কি পৌৰীৰ গংগা ঘাটত প্ৰতিদিনে সূৰ্যাস্তৰ পিছত গংগা আৰতি অনুষ্ঠিত হয়, য’ত প্ৰতিদিনেই বৃহৎ সংখ্যক ভক্ত উপস্থিত থাকে।
প্ৰতিষ্ঠা দিৱস-
সাধাৰণতে উত্তৰাখণ্ড ৰাজ্যৰ মুখ্যমন্ত্ৰীৰ দ্বাৰা এসপ্তাহৰ বাবে প্ৰতিষ্ঠা দিৱস পালন কৰে য’ত ৰাজ্যখনৰ উন্নয়নৰ প্ৰেক্ষাপটত বিভিন্ন কাৰ্যসূচী আৰু আঁচনি ৰূপায়ণ কৰা হয়। বিভিন্ন স্থানত সৰু-বৰ মেলা, শিবিৰ আৰু মঞ্চৰ আয়োজন কৰা হয় যাৰ যোগেদি ৰাজ্যখনৰ প্ৰতিজন বাসিন্দাই গৌৰৱ অনুভৱ কৰে। এই উপলক্ষে ৰাজ্যৰ মুখ্যমন্ত্ৰী কাৰ্যালয়ৰ দ্বাৰা ৰাজ্যৰ ইতিহাস, গুৰুত্ব আৰু উন্নয়ন সম্পৰ্কীয় বৈশিষ্ট্যসমূহ দেখুৱাবলৈ এক বৃহৎ অনুষ্ঠানৰ আয়োজন কৰা হয়, যাতে ৰাজ্যৰ যুৱক-যুৱতীসকলে নিজৰ ৰাজ্যৰ বিষয়ে আৰু অধিক জানিব পাৰে আৰু ইয়াৰ উন্নয়নত সদায় অৰিহণা যোগায় ৷
