আজি বিহগী কবি ৰঘুনাথ চৌধুৰীৰ স্মৃতি দিৱস । অসমীয়া সাহিত্যৰ ৰোমাণ্টিক যুগৰ এই কবিগৰাকীৰ কবিতাত প্ৰকৃতি আছিল মূল উপজীব্য । তেওঁ এগৰাকী মুক্তিযোদ্ধাও আছিল । বিভিন্ন সামাজিক, সাংস্কৃতিক আৰু সাহিত্য সংগঠনৰ সৈতেও তেওঁ জড়িত আছিল । গুৱাহাটীৰ প্ৰগতি সংঘ আৰু সবিতা সভাৰ তেওঁ অন্যতম প্ৰতিষ্ঠাপক আছিল । তেওঁৰ সৰহভাগ কবিতা জোনাকী, বাঁহী আদি আলোচনীত প্ৰকাশ পাইছিল । সাদৰী তেওঁৰ প্ৰথম কবিতা পুথি । তেওঁৰ আন দুখন কবিতা পুথি হ’ল কাৰবালা আৰু দহিকতৰা । নৱমল্লিকা তেওঁৰ কথা-কবিতা । কৰণি নামৰ এখন অপ্ৰকাশিত গল্প পুথিও আছিল । তেওঁ সত্যনাথ বৰা সম্পাদিত জোনাকীৰ সহকাৰী সম্পাদক আছিল । তদুপৰি মইনা, জয়ন্তী আৰু সুৰভিৰ সম্পাদনা কৰিছিল ।ন্যায়াধীশ হলিৰাম ডেকাই তেওঁক বিহগী কবি আখ্যা দিয়ে । ১৯৪৮ চনত তেওঁ শান্তি পৰিষদৰ অসম শাখাৰ সভাপতি নিৰ্বাচিত হৈছিল আৰু ১৯৫২ চনত কলিকতাত অনুষ্ঠিত সৰ্বভাৰতীয় শান্তি পৰিষদৰ অধিৱেশনত তেওঁ কৃষ্টি শাখাৰ সভাপতি আছিল । ১৯৩৬ চনত তেজপুৰত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । ভাৰত চৰকাৰে তেওঁক সাহিত্যক পেঞ্চন প্ৰদান কৰিছিল । ১৯৬৭ চনৰ আজিৰ দিনটোতে তেওঁৰ দেহাৱসান ঘটে । কবিগৰাকীলৈ আমাৰ প্ৰণাম ।
আজি বিশিষ্ট বিজ্ঞানী জিতেন্দ্ৰনাথ গোস্বামীৰ ওপজা দিন । ১৯৫০ চনৰ আজিৰ দিনটোতে যোৰহাটত তেওঁৰ জন্ম হৈছিল । ভাৰতৰ প্ৰথম চন্দ্ৰ অভিযান চন্দ্ৰযান-১ৰ তেওঁ মুখ্য বিজ্ঞানী আছিল । এই অভিযানৰ পৰিকল্পনা আৰু ৰূপায়ণৰ গুৰু দায়িত্ব তেওঁ পালন কৰিছিল । তেওঁ চন্দ্ৰযান-২ৰ সৈতেও জড়িত আছিল । ছাত্ৰ হিচাপে তেওঁ যোৰহাট চৰকাৰী উচ্চতৰ মাধ্যমিক আৰু বহুমুখী বিদ্যালয়, কটন কলেজ, গুৱাহাটী বিশ্ববিদ্যালয়ত শিক্ষা গ্ৰহণ কৰি গুজৰাট বিশ্ববিদ্যালয়ৰ পৰা পিএইছডি কৰে । পিএইছডিৰ পিছত তেওঁ বিভিন্ন সময়ত কেলিফৰ্ণিয়া বিশ্ববিদ্যালয়, ৱাশ্বিংটন বিশ্ববিদ্যালয়, হাষ্টন লুনাৰ এণ্ড প্লেনেটৰী ইনষ্টিটিউট আৰু মেক্সপ্লাংক ইনষ্টিটিউটত সৌৰজগত, পৃথিৱী আৰু গ্ৰহ বিজ্ঞানৰ বিষয়ে গৱেষণা কৰিছিল । তেওঁ ১৯৯৪ চনত শান্তি স্বৰূপ ভাটনগৰ বঁটাকে ধৰি অনেক সন্মান লাভ কৰে । অসম চৰকাৰে তেওঁক সৰ্বোচ্চ অসামৰিক সন্মান অসম ৰত্ন প্ৰদান কৰে । ভাৰত চৰকাৰে পদ্মশ্ৰী সন্মানেৰে সন্মানিত কৰে । বিজ্ঞানীগৰাকীক জনালোঁ ওপজা দিনৰ ওলগ ।
আজি ভাৰতৰ প্ৰাক্তন মুখ্য ন্যায়াধীশ ৰঞ্জন গগৈৰ ওপজা দিন । ১৯৫৪ চনৰ আজিৰ দিনটোতে ডিব্ৰুগড়ত তেওঁৰ জন্ম হয় । তেওঁ ভাৰতৰ উচ্চতম ন্যায়ালয়ৰ মুখ্য ন্যায়াধীশ হোৱা প্ৰথমগৰাকী অসমীয়া । ২০১৮ চনৰ ৩ অক্টোবৰত তেওঁ ভাৰতৰ এই সৰ্বোচ্চ ন্যায়িক পদত অধিষ্ঠিত হয় । বৰ্তমান তেওঁ ৰাজ্যসভাৰ ৰাষ্ট্ৰপতিৰ দ্বাৰা মনোনীত সদস্য । তেওঁৰ পিতৃ আছিল অসমৰ প্ৰাক্তন মুখ্যমন্ত্ৰী কেশৱ চন্দ্ৰ গগৈ । বিশিষ্ট ব্যক্তিগৰাকীক জনালোঁ ওপজা দিনৰ ওলগ ।
