‘গিনিজ বুক অৱ ৱৰ্ল্ড ৰেকৰ্ড’ৰ যোগেদি বিভিন্ন সময়ত বিভিন্ন জনে নিজৰ কৰ্ম দক্ষতাক সমগ্ৰ বিশ্বৰ আগত তুলি ধৰিবলৈ সক্ষম হৈছে ৷ নতুন অভিলেখ সৃষ্টি কৰা নাইবা আগৰ অভিলেখ ভংগ কৰি নতুন অভিলেখ সৃষ্টি কৰাও মানুহৰ এক নিচা হৈ পৰিছে ৷ এইবাৰ বিশেষকৈ পাহাৰ অঞ্চলত পথ সুৰক্ষাৰ গুৰুত্বক ৰাইজৰ আগত ডাঙি ধৰিবলৈ দেওবাৰে ‘সৰ্ববৃহৎ হেলমেট বাক্য’ গঠন কৰি গিনিজ বুক অৱ ৱৰ্ল্ড ৰেকৰ্ডত স্থান লাভ কৰিবলৈ সক্ষম হয় অৰুণাচল প্ৰদেশৰ টাৱাং জিলা ।
সীমান্ত জিলাখনৰ গ্যালৱা ছাংয়াং গ্যাটছ’ উচ্চ উচ্চতাৰ ষ্টেডিয়ামত মুঠ ২৩৫০টা হেলমেট ব্যৱহাৰ কৰি লিখা হয় ‘জয় হিন্দ’ বাক্যটো।
অৰুণাচলৰ মুখ্যমন্ত্ৰী পেমা খাণ্ডুৱে পুৱাতেই হুইচেল বজাই হেলমেট গঠনৰ কাম আৰম্ভ কৰে। পুৱা ৮ বজাৰ ভিতৰত খাণ্ডুৰ সৈতে টাৱাং আৰু পশ্চিম কামেং জিলাৰ বিধায়কসকলৰ সৈতে হেলমেটেৰে বাক্য গঠনৰ কাম সম্পূৰ্ণ হয় ।
‘আমেজিং নমস্তে ফাউণ্ডেচন’ৰ উদ্যোগত আৰু ৰাজ্য চৰকাৰৰ সহযোগত বিশ্ব অভিলেখ গঢ়ি পথ সুৰক্ষাৰ ক্ষেত্ৰত সজাগতা সৃষ্টিৰ বাবে অনুষ্ঠিত কৰা হয় এই ‘লক্ষ্য’ শীৰ্ষক অনুষ্ঠান ।এই অনুষ্ঠানৰ পিছতেই খাণ্ডু আৰু ‘আমেজিং নমস্তে ফাউণ্ডেশ্যন’ৰ অধ্যক্ষ অতুল কুলকাৰ্ণীয়ে যৌথভাৱে গিনিজ বুক অৱ ৱৰ্ল্ড ৰেকৰ্ডছৰ প্ৰতিনিধি স্বপ্নীল ডাংগোৰিকাৰৰ পৰা নিশ্চিতকৰণৰ প্ৰমাণ পত্ৰ লাভ কৰে।
এই উপলক্ষে বক্তব্য প্ৰদান কৰি ৰাজ্যখনৰ মুখ্যমন্ত্ৰী খাণ্ডুৱে কয় যে পাহাৰত পথৰ উন্নতিৰ লগে লগে পথ সুৰক্ষা ব্যৱস্থাৰ সজাগতা আৰু যান-বাহন নিয়ম মানি চলাটো অধিক গুৰুত্বপূৰ্ণ হৈ পৰিছে। এই সন্দৰ্ভত তেওঁ কয় যে মানুহে, বিশেষকৈ বাইক চলোৱা যুৱক-যুৱতীসকলে ভাল পথত দ্ৰুত আৰু বেগেৰে গাড়ী চলোৱাৰ প্ৰৱণতা থাকে। দেখা গৈছে যে অতিমাত্ৰা বেগ দুৰ্ঘটনাৰ প্ৰধান কাৰণ। গতিকে এই অনুষ্ঠান আৰু বিশ্ব অভিলেখ সৃষ্টিয়ে সকলোৰে দৃষ্টি আকৰ্ষণ কৰাৰ লগতে পথ সুৰক্ষা আৰু দুচকীয়া বাহন চলোৱাৰ সময়ত হেলমেটৰ বাধ্যতামূলক ব্যৱহাৰৰ প্ৰতি ৰাইজৰ মনোযোগ আকৰ্ষণ কৰিব।
চৰকাৰে কৰা এক সমীক্ষাত ইংগিত পোৱা গৈছে যে ভাৰতত পথ দুৰ্ঘটনাত বছৰি প্ৰায় ডেৰ লাখ লোকে প্ৰাণ হেৰুৱাইছে। পথৰ নেটৱৰ্ক আৰু উন্নত বাহনৰ উন্নতিৰ লগে লগে যান-বাহন অনুশাসনৰ লগতে গাড়ী চলোৱাৰ নীতি-নিয়ম সমূহ মানি চলিবলৈ আৰোহী, চালক আৰু সাধাৰণ জনতাৰ মাজত সজাগতা সৃষ্টিৰ প্ৰয়োজনীয়তা আহি পৰিছে।
খাণ্ডুৱে লগতে কয় যে সৰ্বাধিক হেলমেটেৰে গঠিত ‘জয় হিন্দ’ৰে গিনিজ বুক অৱ ৱৰ্ল্ড ৰেকৰ্ডত স্থান পোৱাটো, কেৱল অৰুণাচলৰ মানুহৰ বাবেই নহয়, এই পাহাৰীয়া ৰাজ্যখন পৰিদৰ্শন কৰিবলৈ অহা আৰু ইয়ালৈ অহা সমগ্ৰ ভাৰতৰ লোকসকলৰ বাবে এক বাৰ্তা ৷ সেয়েহে তেওঁ সকলোকে ট্ৰেফিক নিয়ম মানি চলিবলৈ আৰু হেলমেট ব্যৱহাৰ কৰিবলৈ অনুৰোধ জনায় ।
এই অনুষ্ঠান উপলক্ষে আৰু পথ সুৰক্ষাৰ ওপৰত সজাগতা সৃষ্টিৰ বাবে এখন বাইক ৰেলীও আয়োজন কৰা হয় ৷ বিখ্যাত টাৱাং মঠৰ পৰা আৰম্ভ হৈ মাৰাঠা খেলপথাৰৰ মাজেৰে ষ্টেডিয়ামত শিখৰত উপনীত হয় এই ৰেলী । ৰাজ্যৰ বিভিন্ন প্ৰান্তৰ প্ৰায় ২০০ ৰাইডাৰ আৰু চি আৰ পি এফ জোৱানেৰে গঠিত এই ৰেলীত যোগদান কৰে ৰাজ্যখনৰ মুখ্যমন্ত্ৰী গৰাকীয়েও। বাইকাৰসকলৰ অংশগ্ৰহণৰ শলাগ লৈ আৰু পথ সুৰক্ষাৰ সন্দৰ্ভত সজাগতা সৃষ্টিত অৰিহণা যোগোৱাত তেওঁ বাইক চালক সকলক স্মৃতিগ্ৰন্থ প্ৰদান কৰে।
অনুষ্ঠানত টাৱাঙৰ বিধায়ক চেৰিং তাছি আৰু পশ্চিম কামেং জিলাৰ ফূৰ্পা চেৰিং (দিৰাং), কুমছি ছিদিছ’ (থ্ৰিজিনো-বুৰাগাঁও), ডংগ্ৰু ছিয়ংজু (বোমডিলা) আৰু দাৰ্জী ৱাংদি খাৰ্মা (কলাকটাং)কে ধৰি চাৰিওজন বিধায়ক আৰু টাৱাং জিলা প্ৰশাসনৰ বিষয়াসকল উপস্থিত থাকে ।
জিলাখনৰ এই আনন্দৰ বাতৰিয়ে গৌৱৰান্বিত কৰিছে উত্তৰ-পূৰ্বাঞ্চলৰ সকলোকে ৷
