আজি মহাবীৰ লাচিত বৰফুকনৰ ওপজা দিন । ১৬২২ চনৰ আজিৰ দিনটোতে তেওঁৰ জন্ম হৈছিল । তেওঁ আছিল আহোম সাম্ৰাজ্যৰ নৱমগৰাকী ফুকনলূং বা বৰফুকন । ১৬৭১ চনত গুৱাহাটীৰ শৰাইঘাটত মোগল বাহিনীৰ বিৰুদ্ধে লগা তয়া-ময়া ৰণত সেনাপতি হিচাপে আহোম সেনাৰ নেতৃত্ব দি তেওঁ মোগলক শোচনীয়ভাৱে পৰাস্ত কৰিছিল । যুদ্ধৰ সময়ত তেওঁৰ গাত তীব্ৰ জ্বৰ আছিল আৰু নৰীয়া গাৰেই তেওঁ যুদ্ধ কৰিছিল । যুদ্ধ জয়ৰ কিছুদিন পিছতেই তেওঁৰ মৃত্যু হয় । যোৰহাটৰ হোলোঙাপাৰত জাতীয় বীৰগৰাকীৰ মৈদাম আছে । বীৰগৰাকীলৈ আমাৰ প্ৰণাম ।
আজি উপন্যাস সম্ৰাট ৰজনীকান্ত বৰদলৈৰ ওপজা দিন । ১৮৬৭ চনৰ আজিৰ দিনটোতে গুৱাহাটীত তেওঁৰ জন্ম হৈছিল । ১৮৯০ চনত তেওঁ গুৱাহাটীৰ উপায়ুক্তৰ কাৰ্যালয়ত কেৰাণীৰ চাকৰিৰে কৰ্মজীৱনৰ পাতনি মেলি ১৮৯১ চনত ছাব ডেপুটী কালেক্টৰ হয় । গেইট চাহাবে History of Assam গ্ৰন্থখন লিখোঁতে তেওঁ নানা সমল গোটাই দিছিল । তেওঁ অসমৰ বিভিন্ন ঠাইলৈ বদলি হৈ ১৯০৯ চনত নগাঁৱৰ উপায়ুক্ত হয় । ১৯১৮ চনত চাকৰিৰ পৰা অৱসৰ গ্ৰহণ কৰে । ছাত্ৰাৱস্থাত তেওঁ অসমীয়া ভাষা উন্নতি সাধিনী সভাৰ সৈতে জড়িত হয় । তেওঁৰ বিখ্যাত উপন্যাসসমূহৰ ভিতৰত মিৰি জীয়ৰী, মনোমতী, নিৰ্মল ভকত আদি অন্যতম । গা ধন, প্ৰেমৰ উপাসক আদি তেওঁৰ গল্পপুথি । অন্যান্য গ্ৰন্থ জ্ঞান-সপোন, মনোবিজ্ঞান আদি । ভোলাই শৰ্মা নামেৰে তেওঁ অনেক ধেমেলীয়া ৰচনাও লিখিছিল । তেওঁ অসম প্ৰদীপিকা (১৯২৫) নামৰ এখন আলোচনীও সম্পাদনা কৰিছিল । ১৯২৫ চনত নগাঁৱত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । সাহিত্যিকগৰাকীলৈ আমাৰ প্ৰণাম ।
আজি সাহিত্য কাণ্ডাৰী পদ্মনাথ গোহাঞি বৰুৱাৰ ওপজা দিন । ১৯৭১ চনৰ আজিৰ দিনটোতে উত্তৰ লক্ষীমপুৰৰ নকাড়ী গাঁৱত তেওঁৰ জন্ম হয় । তেওঁ আছিল একাধাৰে কবি, ঔপন্যাসিক, জীৱনীকাৰ, প্ৰবন্ধকাৰ তথা সাংবাদিক । কলিকতা বিশ্ববিদ্যালয়ৰ পৰা বি এ ডিগ্ৰী লৈ তেওঁ কোহিমা মধ্য ইংৰাজী বিদ্যালয়ত তেওঁ প্ৰধান শিক্ষক হিচাপে নিযুক্ত হয় । কোহিমাত থাকোতেই তেওঁ অসমীয়া ভাষা উন্নতি সাধিনী সভা আৰু কোহিমা সাহিত্য সভা প্ৰতিষ্ঠা কৰে । পিছলৈ তেওঁ তেজপুৰৰ নৰ্মাল স্কুল, তেজপুৰ চৰকাৰী হাইস্কুল, যোৰহাট চৰকাৰী হাইস্কুল আদিত কাম কৰে । ১৯১৭ চনত অসম চৰকাৰে তেওঁক দ্বিতীয় শ্ৰেণীৰ আৰু ১৯৪১ চনত প্ৰথম শ্ৰেণীৰ দণ্ডাধীশ হিচাপে নিযুক্তি দিয়ে । তেতিয়াৰ ব্ৰিটিছ চৰকাৰে তেওঁক ৰায় চাহাব আৰু ৰায় বাহাদুৰ উপাধি প্ৰদান কৰে । কলিকতাত পঢ়ি থাকোঁতে তেওঁ জোনাকী আলোচনীৰ সংস্পৰ্শলৈ আহে । পিছলৈ তেওঁ বিজুলী আলোচনীৰ সম্পাদক হয় । তেওঁ আসাম বন্তি আৰু ঊষা আলোচনীৰো সম্পাদনা কৰে । তেওঁৰ মুঠ প্ৰকাশিত গ্ৰন্থৰ সংখ্যা ৩০ খন । তেওঁ ৰচনা কৰা ভানুমতী অসমীয়া সাহিত্যৰ প্ৰথমখন উপন্যাস । ১৯০৬ চনত ইংৰাজ চৰকাৰে তেওঁক সাহিত্যিক পেঞ্চন প্ৰদান কৰে । সাহিত্যিক পেঞ্চন লাভ কৰা তেওঁ আছিল প্ৰথমগৰাকী অসমীয়া সাহিত্যিক । ১৯১৭ চনত শিৱসাগৰত অনুষ্ঠিত অসম সাহিত্য সভাৰ প্ৰথমখন অধিৱেশনত তেওঁ সভাপতিত্ব কৰিছিল । এইগৰাকী মহান সাহিত্যিকলৈ আমাৰ প্ৰণাম ।
আজি কবি, গীতিকাৰ গীতা হাতীকাকতিৰ স্মৃতি দিৱস । তেওঁ আকাশবাণীৰ স্বীকৃত গীতিকাৰ আছিল । সাত বছৰ বয়সতে তেওঁ বনগুটি আৰু আকাশ নামৰ দুটা কবিতা লিখিছিল । এখনি পানচৈ উটি যাওঁ আহা, তৰাৰ আখৰে কবিতা লিখি, অ পৰিণীতা তোৰ হেনো বিয়া, নিলগতে থাকা নাহিবা কাষলে আদি তেওঁৰ জনপ্ৰিয় গীত ।তেওঁ গীত, গল্প, কবিতাকে ধৰি বিভিন্ন বিষয়ৰ ঊনৈশখন গ্ৰন্থ লিখি থৈ গৈছে । আমাৰ সোণসেৰীয়া গীতৰ গীতিকাৰসকল তেওঁৰ এখন গুৰুত্বপূৰ্ণ গ্ৰন্থ । ২০০৪ চনত তেওঁ সাহিত্যিক পেঞ্চন লাভ কৰে । ২০১৬ চনত অসম চৰকাৰে তেওঁক শিল্পী বঁটাৰে সন্মানিত কৰে । ২০২০ আজিৰ দিনটোতে গুৱাহাটীত তেওঁৰ দেহাৱসান ঘটে । গীতিকাৰগৰাকীলৈ আমাৰ প্ৰণাম ।
