প্ৰায় এমাহৰ উত্তেজনা-ভিৰ-উন্মাদনাৰ অন্তত নিজম পৰিল কাটাৰৰ ৰাজপথ ৷ বিভিন্ন দেশৰ পৰা অহা পর্যটকসকলে এৰিছে কাটাৰ ৷ ইয়াৰ লগে লগে কাটাৰত কোটি কোটি টকা খৰচ কৰি নির্মাণ কৰা ষ্টেডিয়ামবোৰৰ কি হ’ব! তাৰোপৰি কাটাৰত বিশ্বকাপ চাবলৈ যোৱা পর্যটকৰ বাবে নির্মাণ কৰা অসংখ্য হোটেলৰ কি হ’ব! কাটাৰৰ দ্বাৰা আয়োজিত ফুটবল বিশ্বকাপৰ বাবে ব্যয় কৰা হৈছে ১৭,৬৮,১৯০ কোটি টকা। বিশ্বকাপৰ ইতিহাসতে এয়া এক অভিলেখ ৷ হিচাপ অনুসৰি ১৯৯৪ চনৰ পৰা ২০১৮ চনলৈকে ৭ খন ফুটবল বিশ্বকাপৰ মুঠ খৰচৰ চাৰিগুণতকৈও অধিক খৰচ কেৱল কাটাৰত বিশ্বকাপৰ আয়োজনত কৰা হৈছিল।
এই খৰচৰ সিংহভাগেই ব্যয় কৰা হৈছে ষ্টেডিয়াম নিৰ্মাণত। বিশ্বকাপৰ বাবে কাটাৰত নিৰ্মাণ কৰা হৈছে ৭খন নতুন ষ্টেডিয়াম। ফুটবলাৰসকলেও অনুশীলনৰ বাবে সুকীয়া খেলপথাৰৰ ব্যৱস্থা কৰা হৈছিল ৷ ইয়াৰ ভিতৰত লুচাইল ষ্টেডিয়ামো আছে। কিন্তু বিশ্বকাপ শেষ হোৱাৰ লগে লগে এই ষ্টেডিয়ামবোৰৰ আৰু প্ৰয়োজন নাইকিয়া হ’ল। এতিয়া বিশ্বকাপৰ বাবে কাটাৰে নিৰ্মাণ কৰা ৭ খন ষ্টেডিয়ামৰ ভিতৰত ১ খন ষ্টেডিয়াম প্ৰতিযোগিতাৰ পিছত চিৰদিনৰ বাবে কাটাৰ এৰি যাব।
ষ্টেডিয়াম ৯৭৪। কাটাৰত নিৰ্মিত ৭ খন ষ্টেডিয়ামৰ ভিতৰত এখন। কাটাৰৰ ৰাছ আবু আবুদ অঞ্চলত নিৰ্মিত এই ষ্টেডিয়ামত ৪৪ হাজাৰতকৈ অধিক আসন আছে। পুনঃব্যৱহৃত কাৰ্গো ষ্টীলৰ পাত্ৰৰ পৰা নিৰ্মিত এই ষ্টেডিয়ামখন। এই অস্থায়ী ষ্টেডিয়ামখন নিৰ্মাণৰ বাবে ৯৭৪টা জাহাজ কণ্টেইনাৰ ব্যৱহাৰ কৰা হৈছিল। কাটাৰৰ আন্তঃৰাষ্ট্ৰীয় ডায়েলিং ক’ডো হৈছে +৯৭৪। সেয়েহে ষ্টেডিয়ামখনৰ নাম ৯৭৪ ৰখা হৈছিল।বিশ্বকাপৰ মাজভাগৰ পৰা আৰম্ভ হৈছে ৯৭৪ নং ষ্টেডিয়াম ভাঙি পেলোৱাৰ কাম। ইতিমধ্যে মডিউলাৰ ষ্টেডিয়ামৰ এটা অংশ মুকলি কৰা হৈছে। ২০২১ চনৰ ৩০ নৱেম্বৰত এই ষ্টেডিয়ামখন উদ্বোধন কৰা হয়। বিশ্বকাপৰ সময়ত এই খেলপথাৰত মুঠ ৭খন খেল অনুষ্ঠিত হৈছে। ৫ ডিচেম্বৰত ব্যৱহাৰৰ বাবে বন্ধ কৰি দিয়া হৈছিল ষ্টেডিয়ামখন।এই ষ্টেডিয়ামসমূহৰ ভঙা অংশ দুৰ্বল আন্তঃগাঁথনি থকা দেশসমূহলৈ প্ৰেৰণ কৰা হ’ব । অনুমান কৰা হৈছে যে ষ্টেডিয়ামৰ খণ্ড খণ্ড অংশ আফ্ৰিকাৰ এখন দেশলৈ প্ৰেৰণ কৰা হ’ব। তাত ক্ৰীড়াৰ বাবে নতুন ধৰণে নিৰ্মাণ কৰা হ’ব এই ষ্টেডিয়াম।
কিন্তু বাকী ষ্টেডিয়ামবোৰৰ কথা কি ক’ব? কাটাৰৰ প্ৰশাসনে জনোৱা মতে, লুছাইল ষ্টেডিয়ামত এখন বিদ্যালয় আৰু কেইবাখনো দোকান আৰু কেফে নিৰ্মাণ কৰা হ’ব। ষ্টেডিয়ামত ক্ৰীড়াৰ বাবেও যথেষ্ট ঠাই থাকিব। ষ্টেডিয়ামৰ স্থানত এখন চিকিৎসালয় আৰু কমিউনিটি হলও নিৰ্মাণ কৰা হ’ব। বিশ্বকাপৰ স্মৃতিত এখন সংগ্ৰহালয় নিৰ্মাণৰ পৰিকল্পনাও কৰা হৈছে। আল বেইট ষ্টেডিয়ামত মুকলি হ’ব এখন বিলাসী হোটেল, শ্বপিং মল আৰু ঔষধৰ দোকান। মূলতঃ খেলৰ সময়ত প্ৰয়োজনীয় ঔষধ আৰু অত্যাৱশ্যকীয় চিকিৎসা সামগ্ৰী ঔষধৰ দোকানত উপলব্ধ হ’ব ।
২ খন ষ্টেডিয়াম ব্যৱহাৰ কৰিব ২ টা স্থানীয় ফুটবল ক্লাবে। আল ৰায়ানে আহমেদ বিন আলী ষ্টেডিয়ামত আৰু আল ৱাক্ৰাহে আল জানুব ষ্টেডিয়ামত খেলিব।২০২৬ চনৰ বিশ্বকাপৰ বাবে যোগ্যতা অৰ্জন কৰিবলৈ এতিয়াৰ পৰা অনুশীলন আৰম্ভ কৰিব কাটাৰৰ জাতীয় ফুটবল দলে। আৰু সেই প্ৰশিক্ষণৰ বাবে খলিফা আন্তঃৰাষ্ট্ৰীয় ষ্টেডিয়াম ব্যৱহাৰ কৰা হ’ব। বাকী ষ্টেডিয়ামসমূহ পুনৰ নিৰ্মাণ কৰা হ’ব। কাটাৰ প্ৰশাসনৰ সূত্ৰ অনুসৰি এই ষ্টেডিয়ামসমূহ ২০২৪ চনৰ জানুৱাৰী মাহৰ পৰা আৰম্ভ হ’বলগীয়া এছিয়ান কাপৰ বাবে ব্যৱহাৰ হ’ব পাৰে। বিশ্বকাপৰ বাবে নিৰ্মাণ কৰা হোটেলবোৰ সৰু সৰু থকাৰ ব্যৱস্থালৈ ৰূপান্তৰিত হ’ব পাৰে। কেইখনমান হোটেল ওখ আৰু বহুমহলীয়া কৰা হ’ব ৷
২০২১ চনৰ হিচাপ অনুসৰি এই ক্ষুদ্ৰ দেশখনৰ মুঠ জনসংখ্যা ২৯.৩ লাখ। ইয়াৰে কাটাৰৰ স্থায়ী বাসিন্দাৰ সংখ্যা ৩ৰ পৰা ৪ লাখ। বাকী লোকসকল আন দেশৰ পৰা উপাৰ্জন কৰাৰ আশাত সেই দেশতে বসতি স্থাপন কৰিছে। তেওঁলোকৰো ইতিমধ্যে থকাৰ ব্যৱস্থা আছে ৷ তেন্তে নতুন আৱাসগৃহত কোনে থাকিব? সেয়াও আন এক প্ৰশ্ন ?
