অসামৰিক বিমান পৰিবহণ নিয়ন্ত্ৰক অসামৰিক বিমান পৰিবহণ সঞ্চালকালয়ে দেশৰ উত্তৰ-পূর্বাঞ্চললৈ নূন্যতম সংখ্যক বাধ্যতামূলক বিমান চলাচল নকৰাৰ বাবে আগশাৰীৰ বিমান পৰিবহন সংস্থাএয়াৰ ভিষ্টাৰাৰ বিৰুদ্ধে ৭০ লাখ টকা জৰিমনা বিহে। ২০২২ চনৰ এপ্ৰিল মাহত নিয়ম মানি নচলাৰ বাবে যোৱা বছৰৰ অক্টোবৰ মাহত এই জৰিমনা বিহা হৈছিল।
ইতিমধ্যে বিমান সংস্থাটোৱে জৰিমনা আদায় দিছে বুলি ডিজিচিএৰ এগৰাকী বিষয়াই জানিবলৈ দিয়ে। এই সন্দৰ্ভত প্ৰত্যুত্তৰ দি ভিষ্টাৰাৰ এগৰাকী মুখপাত্ৰই কয়, “বিগত কেইবাবছৰ ধৰি ভিষ্টাৰাই আৰডিজি (ৰুট ডিচপাৰ্চেল গাইডলাইন) নিৰপেক্ষভাৱে মানি চলি আহিছে।“
কিন্তু মুখপাত্ৰগৰাকীয়ে স্বীকাৰ কৰে যে বাগডোগ্ৰা বিমানবন্দৰ বন্ধ হোৱাৰ বাবে কিছুমান বিমান বাতিল কৰিবলগীয়া হৈছিল, যাৰ ফলত ২০২২ চনৰ এপ্ৰিল মাহত প্ৰয়োজনীয় সংখ্যক বিমানৰ অভাৱ মাত্ৰ ০.০১ শতাংশহে হ্ৰাস পাইছিল।
অসামৰিক বিমান পৰিবহণ মন্ত্ৰালয়ৰ ফ্লেগশ্বিপ কাৰ্যসূচী আঞ্চলিক সংযোগ আঁচনি উড়ানে ইতিমধ্যে পাঁচ বছৰ সম্পূৰ্ণ কৰিছে। ২০১৭ চনৰ এপ্ৰিল মাহত প্ৰথমখন বিমান এই আঁচনিৰ অধীনত আৰম্ভ হৈছিল।
সাধাৰণ নাগৰিকৰ আকাংক্ষা পূৰণৰ উদ্দেশ্যেৰে ২০১৬ চনৰ অক্টোবৰ মাহত এই আঁচনিখন আৰম্ভ কৰা হৈছিল ৷ য’ত দ্বিতীয় আৰু তৃতীয় স্তৰৰ চহৰসমূহত বিমান পৰিবহণৰ আন্তঃগাঁথনি আৰু বিমান সংযোগ বৃদ্ধি কৰা হৈছিল।
