আমেৰিকাৰ ষ্টক এজেন্সী হিণ্ডেনবাৰ্গ ৰিচাৰ্চৰ প্ৰতিবেদন পোহৰলৈ অহাৰ পিছতে দুৰ্যোগৰ সন্মুখীন হৈছে আদানি গ্ৰুপ। ২৪ জানুৱাৰীত সেই প্ৰতিবেদন ওলোৱাৰ পিছৰে পৰা আদানীৰ মুঠ সম্পত্তিৰ মূল্য প্ৰায় আধালৈ হ্ৰাস পাইছে। আদানী গোটৰ বিভিন্ন কোম্পানীৰ শ্বেয়াৰো নিম্নগামী হৈছে ৷ এছিয়া আৰু ভাৰতৰ আটাইতকৈ ধনী ব্যক্তিৰ পদৰ পৰাও বিচ্যুত হৈছে গৌতম আদানী। কিন্তু ইয়াৰ পাছতো এই ভাৰতীয় কোটিপতিগৰাকীৰ একাধিকসম্পত্তি আছে যিয়ে তেওঁক আটাইতকৈ ধনীসকলৰ ভিতৰত এজন হিচাপে চিহ্নিত কৰে।
২০২০ চনত আদানীয়ে ৪০০ কোটি টকাত দিল্লীত এটা প্ৰসাদোপাম বিল্ডিং ক্ৰয় কৰিছিল। ৩.৪ একৰ মাটিত বিস্তৃত এই ভৱনটোক আদানী গোটৰ অন্যতম ব্যয়বহুল অট্টালিকা হিচাপেও জনা যায়। অট্টালিকাটো ক্ৰয় কৰিবলৈ তেওঁ আগতীয়াকৈ ২৬৫ কোটি টকা আৰু বিধিগত খৰচ হিচাপে আৰু ১৩৫ কোটি টকা খৰচ কৰিবলগীয়া হৈছিল। এই ৰাজপ্ৰসাদৰ উপৰিও গুৰগাঁৱত আদানীৰ এটা বাংলোও আছে।
আহমেদাবাদতো আদানীৰ আন এটা অট্টালিকা আছে। তেওঁ বেছিভাগ সময় এই ঘৰতে থাকে। গৌতমে নিজৰ সম্পত্তি ব্যক্তিগতভাৱে ৰখাটো পছন্দ কৰাৰ বাবে ৰাজপ্ৰসাদৰ বিষয়ে বিশেষ একো জনা নাযায়। ৰাজপ্ৰসাদটোৰ চাৰিওফালে প্ৰকাণ্ড প্ৰকাণ্ড গছ-গছনি আছে। ইয়াৰ চাৰিওফালে মুকলি চোতালও আছে। গৌতমে পত্নী প্ৰীতি আদানী, দুই পুত্ৰ কৰ্ণ আদানী আৰু জীত আদানী আৰু বোৱাৰীৰ সৈতে এই ঘৰত থাকে।
আদানি গ্ৰুপৰ কেইবাখনো বিলাসী ব্যক্তিগত জেট আৰু হেলিকপ্টাৰ আছে। তেওঁ মূলতঃ নিজৰ ব্যক্তিগত জেট বিমানেৰে যাত্ৰা কৰে। তেওঁৰ ব্যক্তিগত জেট বিমানৰ তালিকাত আছে ‘বম্বাৰ্ডিয়াৰ’, ‘বিচক্ৰাফ্ট’ আৰু ‘হকাৰ’ ব্যক্তিগত জেট বিমান। বম্বাৰ্ডিয়াৰ প্ৰাইভেট জেট বিমানখনে সৰ্বাধিক ৮ জন যাত্ৰী লৈ উৰণ কৰিব পাৰিব। ৩৭ জন যাত্ৰীয়ে যাত্ৰা কৰিব পাৰে বিচক্ৰাফ্টত। আনহাতে, হকাৰ জেট বিমানখনত ৫০ জন যাত্ৰী কঢ়িয়াব পৰা ক্ষমতা আছে। খবৰ অনুসৰি ভাৰতৰ ভিতৰতে আদানীৰ সস্তীয়া প্ৰাইভেট জেট বিমানৰ দাম প্ৰায় ১৫.২ কোটি।
তিনিখন বিলাসী জেট বিমানৰ উপৰিও আদানিৰ তিনিখন হেলিকপ্টাৰ আছে। কিন্তু তেওঁক সঘনাই ‘অগুষ্টা ৱেটলেণ্ড ডব্লিউ ১৩৯’ হেলিকপ্টাৰত যাত্ৰা কৰা দেখা যায়। দুটা ইঞ্জিনেৰে চলা অগাষ্টা ৱেটলেণ্ড ডব্লিউ ১৩৯ হেলিকপ্টাৰত এবাৰত ১৫ জন যাত্ৰী বহিব পাৰিব। এই বাহনখন ঘণ্টাত প্ৰায় ৩১০ কিলোমিটাৰ বেগেৰে চলিব পাৰে।
হেলিকপ্টাৰ আৰু ব্যক্তিগত জেটৰ তুলনাত আদানীৰ মালিকানাধীন বিলাসী গাড়ীৰ তালিকা দীঘলীয়া। আদানীৰ হাতত আছে ৩.৫ কোটি টকাৰ ৰঙা ৰঙৰ ফেৰাৰী আৰু এখন বিলাসী বিএমডব্লিউ-৭। এই দুয়োখন গাড়ীয়েই তেওঁৰ তালিকাত আটাইতকৈ জনপ্ৰিয় গাড়ী।
ইয়াৰ উপৰিও এখন ৰ’লছ ৰয়ছ গোষ্ট গাড়ীৰ মালিক হৈছে আদানী। এই গাড়ীখনৰ বজাৰ মূল্য প্ৰায় ছয় নিযুত টকা। কেইবাটাও বাতৰিত কোৱা হৈছে যে এই গাড়ীখনেই তেওঁৰ গেৰেজত থকা আটাইতকৈ মূল্যৱান গাড়ী।
আদানি এণ্টাৰপ্ৰাইজ প্ৰায় ১৭খন জাহাজৰ মালিক। প্ৰায় প্ৰতিটো ব্যৱসায়িক খণ্ডতে বিপুল উপস্থিতিৰ বাবে আদানী গ্ৰুপে এই জাহাজসমূহ ব্যৱহাৰ কৰে। আদানীসকলে এই জাহাজবোৰ ইন্ধন আৰু অন্যান্য সামগ্ৰী পৰিবহণৰ বাবে ব্যৱহাৰ কৰে।
কিন্তু তেওঁৰ জাহাজখনৰ বিষয়ে কৌতুহলৰ সৃষ্টি হৈছিল ২০১৮ চনত। সেই সময়ত আদানীয়ে নতুনকৈ ক্ৰয় কৰা জাহাজ দুখনৰ নাম তেওঁৰ ভতিজী দুগৰাকীৰ নামেৰে ৰাখিছিল। মেগাৱাট ভাংশী আৰু মেগাৱাট ৰাহি। এই জাহাজ দুখন দক্ষিণ কোৰিয়াৰ হানজিন হেভি ইণ্ডাষ্ট্ৰীজ আৰু কনষ্ট্ৰাকচন কৰ্পৰেশ্যনে নিৰ্মাণ কৰিছে।
বিলাসী ব্যক্তিগত জেট আৰু জাহাজৰ বাবে আদানীৰ দেশজুৰি কেইবাটাও ব্যক্তিগত বিমানবন্দৰ আৰু বন্দৰ আছে। প্ৰতিবেদন অনুসৰি আদানীৰ মুঠ ১৩টা জাহাজ বন্দৰ আছে সমগ্ৰ দেশতে।
অষ্ট্ৰেলিয়াৰ অন্যতম বৃহৎ কয়লা খনি কাৰ্মাইকেলৰ মালিক আদানী। প্ৰতিবেদনত প্ৰকাশিত বাতৰি অনুসৰি অষ্ট্ৰেলিয়াৰ এই কয়লা খনিটোৱে আগন্তুক তিনিটা দশকলৈ বছৰি এক কোটি টন কয়লা যোগান ধৰিব পাৰিব।
কিন্তু তেওঁৰ মালিকানাধীন এই সকলোবোৰ স্থাৱৰ সম্পত্তিক লৈ প্ৰশ্ন উত্থাপন হৈছে। হিণ্ডেনবাৰ্গৰ প্ৰতিবেদনত কোৱা হৈছে যে আদানি গোটে এদশক ধৰি শ্বেয়াৰৰ মূল্যত ৰিগিং কৰি আহিছে। কোম্পানীটোৱে আদানীক আৰ্থিক প্ৰৱঞ্চনাৰ অভিযোগো উত্থাপন কৰে। হিণ্ডেনবাৰ্গৰ প্ৰতিবেদন ওলোৱাৰ পিছত আদানী গ্ৰুপে বহু প্ৰশ্নৰ সন্মুখীন হ’ল।
হিণ্ডেনবাৰ্গৰ প্ৰতিবেদনৰ পিছত আদানী গোটৰ ১০টা কোম্পানীৰ শ্বেয়াৰ কাৰ্যতঃ ভাঙি পৰে। এটা কোম্পানীৰ ষ্টক ১৭ শতাংশ হ্ৰাস পোৱাৰ বিপৰীতে এটা কোম্পানীৰ ষ্টক এবাৰত ৫১ শতাংশ পৰ্যন্ত হ্ৰাস পাইছে।
যোৱা বুধবাৰে চলিত বিত্তীয় বৰ্ষৰ কেন্দ্ৰীয় বাজেট দাখিল কৰাৰ দিনা আদানী গোটে সতেজ শ্বেয়াৰ ইছ্যু (এফ পি অ’) বাতিল কৰে। ২০ হাজাৰ কোটি টকাৰ এফ পি অ’ বাতিল হোৱাৰ পিছত আদানী গ্ৰুপৰ শ্বেয়াৰৰ মূল্য আৰু অধিক হ্ৰাস পাইছে।
বাণিজ্য আৰু অৰ্থনীতিৰ ৱেবছাইট ‘ফৰ্চুন’ৰ প্ৰতিবেদন অনুসৰি ২৪ জানুৱাৰীৰ প্ৰতিবেদন প্ৰকাশ পোৱাৰ পিছৰ পৰা ৪ ফেব্ৰুৱাৰীলৈকে ১০ দিনত আদানী গোটে মুঠ ১১,৮০০ কোটি ডলাৰ (ভাৰতীয় মুদ্ৰাত ৯,৭৩,৪০১ কোটি টকা) সংগ্ৰহ কৰিছে। মুঠতে আদানিৰ লোকচানৰ পৰিমাণ আকাশলংঘী।
