৮ ঘণ্টা ধৰি ধাৰাবাহিকভাৱে জেৰাৰ অন্তত দেওবাৰে নিশা চিবিআইয়ে দিল্লীৰ উপ-মুখ্যমন্ত্ৰী মনীষ ছিছ’ডিয়াক গ্ৰেপ্তাৰ কৰে। সোমবাৰে বিয়লি তেওঁক আদালতত হাজিৰ কৰা হ’ব। অৰবিন্দ কেজৰিৱালৰ ‘ডেপুটি’ৰ বিৰুদ্ধে কেন্দ্ৰীয় তদন্তকাৰী সংস্থাই আবকাৰী দুৰ্নীতিৰ সৈতে জড়িত বুলি অভিযোগ উত্থাপন কৰিছে। কিন্তু তেওঁৰ দল আম আদমি পাৰ্টিয়ে ছিছ’ডিয়াক গ্ৰেপ্তাৰ কৰাৰ আঁৰত ৰাজনৈতিক চক্ৰান্ত লুকাই আছে বুলি উল্লেখ কৰিছে ৷ এই গ্ৰেপ্তাৰৰ প্ৰতিবাদত আপে সোমবাৰে সমগ্ৰ দেশতে প্ৰতিবাদী কাৰ্যসূচীৰ আহ্বান জনাইছে। দিল্লীৰ দীনদয়াল উপাধ্যায় মাৰ্গত বিজেপিৰ মুখ্য কাৰ্যালয় ঘেৰাও কৰিবলৈও আহ্বান জনাইছে কেজৰিৱালে।
দেওবাৰে নিশা আপৰ সাধাৰণ সম্পাদক সন্দীপ পাঠকে দলৰ এই কাৰ্যসূচী সন্দৰ্ভত টুইট কৰে। বিজেপিক আক্ৰমণ কৰি তেওঁ লিখিছে, “লাখ লাখ শিশুৰ ভৱিষ্যত সৃষ্টি কৰা ছিছ’ডিয়াৰ দৰে শক্তিশালী শিক্ষামন্ত্ৰীক মিছা অভিযোগত গ্ৰেপ্তাৰ কৰা হৈছিল। ইয়াৰ বিপৰীতে সোমবাৰে সমগ্ৰ দেশতে আপে পালন কৰিব ‘কলা দিৱস’।’ আপৰ সূত্ৰ অনুসৰি দিল্লী আৰু পঞ্জাৱ, গুজৰাটৰ গান্ধীনগৰ, হাৰিয়ানাত ৰোহটক, উত্তৰ প্ৰদেশৰ নয়দাত প্ৰতিবাদ প্ৰদৰ্শন কৰা হ’ব। বিভিন্ন ৰাজ্যৰ বিজেপিৰ কাৰ্যালয়ৰ সন্মুখত প্ৰতিবাদ সাব্যস্ত কৰাৰ পৰিকল্পনা কৰিছে।
কিন্তু জনশক্তি আৰু ক্ষমতাৰ ক্ষেত্ৰত আপৰ এই প্ৰতিবাদে দিল্লীত সৰ্বাধিক প্ৰভাৱ পেলাব বুলি ধাৰণা কৰা হৈছে। ঘোষিত কাৰ্যসূচীত নথকা সত্ত্বেও প্ৰতিবাদৰ আশংকাত সোমবাৰে পুৱাৰে পৰা চিবিআইৰ কাৰ্যালয়ৰ সন্মুখত বৃহৎ সংখ্যক আৰক্ষী মোতায়েন কৰা হয়। বিজেপিৰ কাৰ্যালয়ৰ বাহিৰতো এটা বিশেষ নিৰাপত্তা মণ্ডল সৃষ্টি কৰা হৈছে। বিজেপিৰ কাৰ্যালয়ত উপস্থিত হোৱাৰ বহু আগতেই আপ সমৰ্থকক বাধা দিয়া হ’ব পাৰে। ইয়াৰ পূৰ্বে আপে ছিছ’ডিয়াক গ্ৰেপ্তাৰক ‘গণতন্ত্ৰৰ বাবে ক’লা দিন’ বুলি অভিহিত কৰিছিল। ছিছ’ডিয়াই চিবিআইৰ কাৰ্যালয়ত প্ৰৱেশ কৰাৰ পূৰ্বেও কয় যে প্ৰধানমন্ত্ৰী মোদীয়ে আপৰ সফলতা আৰু জনপ্ৰিয়তাক লৈ ভয় কৰি প্ৰতিশোধৰ ৰাজনীতি কৰিছে। অৱশ্যে চিবিআইৰ সূত্ৰ অনুসৰি তদন্তত সহযোগ নকৰাৰ বাবে ছিছ’ডিয়াক গ্ৰেপ্তাৰ কৰা হৈছে।
