কেন্দ্ৰীয় তদন্তকাৰী সংস্থাই ইউ পি এৰ শাসনৰ সময়ছোৱাত নৰেন্দ্ৰ মোদীৰ নাম প্ৰকাশৰ বাবে হেঁচা প্ৰয়োগ কৰিছিল কেন্দ্ৰীয় গৃহ মন্ত্ৰী অমিত শ্বাহক। কেন্দ্ৰীয় গৃহমন্ত্ৰী শ্বাহে বুধবাৰে কেন্দ্ৰীয় তদন্তকাৰী সংস্থাসমূহৰ অপব্যৱহাৰৰ অভিযোগ সন্দৰ্ভত এই মন্তব্য কৰে। তেওঁ দাবী কৰে যে কংগ্ৰেছ নেতৃত্বাধীন ইউ পি এ চৰকাৰৰ দিনত এটা গোচৰত চি বি আইয়ে তেওঁক জেৰাৰ বাবে মাতিছিল। গুজৰাটত সংঘটিত হোৱা ভুৱা এনকাউণ্টাৰৰ সৈতে নৰেন্দ্ৰ মোদী জড়িত বুলি ক’বলৈ ‘হেঁচা’ দিছিল চিবিআইৰ বিষয়াসকলে। বুধবাৰে তৃণমূলৰ সৰ্বভাৰতীয় সাধাৰণ সম্পাদক অভিষেক বেনাৰ্জীৰ ভাষণতো একেটা বিষয়ৰ কথা আহিছিল।
বুধবাৰে বিয়লি শ্বহীদ মিনাৰৰ সমীপত এখন বৈঠকত চিবিআইৰ বিৰুদ্ধে একেধৰণৰ অভিযোগ উত্থাপন কৰে তৃণমূলৰ সাংসদ অভিষেক। তেওঁ কয় যে যেতিয়া দলটোৰ দুই নেতা মদন মিত্ৰ আৰু কুনাল ঘোষ জেলত আছিল তেতিয়া তেওঁলোকৰ ওপৰত অভিষেকৰ নাম উচ্চাৰণৰ বাবে ‘চাপ’ৰ সৃষ্টি কৰিছিল। তেওঁ ক’লে, “মদনদা জেলত আছিল।কুনাল ঘোষো জেলত আছিল। মোৰ নাম ল’লে মুকলি কৰি দিয়া হ’ব বুলি কোৱা হৈছিল ৷”
লগতে অভিষেকে আজিৰ দিনটোত বিৰোধী দলপতি শুভেন্দু অধিকাৰী আৰু বিজেপিৰ সাংসদ দিলীপ ঘোষৰ বিৰুদ্ধে দুৰ্নীতিৰ অভিযোগ উত্থাপন কৰে। তেওঁ দাবী কৰে যে বিজেপি নেতা দুগৰাকীৰ বিৰুদ্ধে দুৰ্নীতিৰ অভিযোগ উত্থাপন হ’লেও কেন্দ্ৰীয় তদন্তকাৰী সংস্থাই তেওঁলোকৰ বিৰুদ্ধে কোনো ব্যৱস্থা গ্ৰহণ কৰা নাই।
বুধবাৰে নিউজ ১৮ৰ এক অনুষ্ঠানত অংশগ্ৰহণ কৰে শ্বাহে। তাত বিৰোধীৰ বিৰুদ্ধে কেন্দ্ৰীয় তদন্তকাৰী সংস্থাসমূহৰ ‘অপব্যৱহাৰ’ৰ অভিযোগ সন্দৰ্ভত সোধাত তেওঁ আত্মনিৰীক্ষণৰ কথা উল্লেখ কৰে ৷ শ্বাহে কয়, ‘মোদীৰ নাম ল’বলৈ চিবিআইয়ে মোক হেঁচা দিছিল। ইয়াৰ পিছতো বিজেপিয়ে কেতিয়াও হুলস্থুল কৰা নাছিল।”
একে সময়তে শ্বাহে বৰ্তমানৰ কেন্দ্ৰীয় চৰকাৰৰ বিৰুদ্ধে ইডি-চিবিআইৰ দৰে সংস্থাৰ ‘অপব্যৱহাৰ’ৰ অভিযোগ খণ্ডন কৰে।তেওঁ কয় –“ আমি কেতিয়াও কাকো কোনো কামৰ বাবে দোষাৰোপ কৰা নাছিলো। কংগ্ৰেছ চৰকাৰৰ দিনত নিৰীহ আৰক্ষী বিষয়াক জেলত ভৰোৱা হৈছিল। বিৰোধীয়ে অভিযোগ কৰিছে বুলি আমি দুৰ্নীতিৰ বিৰুদ্ধে যুঁজ দিয়া বন্ধ কৰিমনে? যদি অভিযুক্তজন ৰাজনৈতিক ব্যক্তি হয়, তেন্তে আমি কাম কৰা উচিত নহয়নে?”
