অসহ্য গৰমত ভাগৰি পৰিলেও কামৰ উদ্দেশ্যে ঘৰৰ বাহিৰলৈ যোৱাটো বন্ধ কৰিব নোৱাৰি। গৰমৰ দিনতো ঘৰে ঘৰে চৰ্দি, জ্বৰ, পেটৰ সমস্যা বাঢ়িবলৈ ধৰিছে ৷ চিকিৎসকৰ মতে যিসকলে নিয়মিতভাৱে উচ্চ ৰক্তচাপৰ ঔষধ, হৃদৰোগৰ ঔষধ বা যিকোনো দীৰ্ঘদিনীয়া ৰোগৰ ঔষধ গ্ৰহণ কৰে, তেওঁলোকৰ সমস্যা গ্ৰীষ্মকালত বৃদ্ধি পাব পাৰে। ৰ’দত ওলাই নাহিলে ভাল। আৰু যদি ব্যক্তিগতভাৱে ওলাই যাব লাগে তেন্তে অতিৰিক্ত সাৱধানতা অৱলম্বন কৰিব লাগিব।সেয়েহে প্ৰচণ্ড গৰমত ওলাই যাবলগীয়া হ’লে তলৰ কথাকেইটা মনত ৰখা উচিত ৷
১) পানীৰ বটল লগত ৰাখিবলৈ নাপাহৰিব। মাজে মাজে পানী সেৱন কৰিব ৷ পানীৰ উপৰিও ডাবৰ পানী, সতেজ ফলৰ ৰস, দৈ আদি পানীয়ও লৈ যাব পাৰে।
২) গাঢ় ৰঙৰ কাপোৰ পৰিহাৰ কৰিব লাগে। পাতল ৰঙৰ, ঢিলা কপাহী কাপোৰ পিন্ধক। ছানগ্লাছ, টুপী, স্কাৰ্ফ, ছাতি লগত ৰাখিব লাগিব। বাসগৃহৰ পৰা ওলাই আহিবলৈ বগা কপাহী ওৰণিৰে মূৰ আৰু মুখ ঢাকি ৰাখক।
৩) গৰমৰ দিনত চাহ, কফি, শীতল পানীয়, চোডা ড্ৰিংকছৰ পৰা বিৰত থাকিব লাগে। এনেধৰণে পানীয়ই শৰীৰত জ্বৰ চর্দি আদি সমস্যাৰ সৃষ্টি কৰিব পাৰে ৷ দীৰ্ঘদিনীয়া বৃক্কৰ ৰোগ বা হৃদযন্ত্ৰৰ সমস্যা থকা লোকে পৰিমিত পৰিমাণে পানী খাব লাগে। অসুবিধা হ’লে চিকিৎসকক অসুবিধাৰ বিষয়ে অৱগত কৰক।
৪) গৰমৰ দিনত অতিৰিক্ত প্ৰটিন আৰু প্ৰচেছড খাদ্য নাখালে ভাল। বাহিৰৰ তেলযুক্ত খাদ্য পৰিহাৰ কৰক, ঘৰতে লঘু খাদ্য খাব।
৫) গ্ৰীষ্মকালত যদি ছালৰ সংক্ৰমণৰ পৰা হাত সাৰিব বিচাৰে তেন্তে ছানস্ক্ৰীণ প্ৰয়োগ নকৰাকৈ বাহিৰলৈ নাযাব।
৬) তাপমাত্ৰা দুপৰীয়া ২ বজালৈকে সৰ্বাধিক। এই সময়ত বাহিৰলৈ ওলাই গ’লে অসুস্থ হোৱাৰ আশংকা থাকে। গতিকে দুপৰীয়া ১২ বজাৰ পৰা বিয়লি ৩ বজাৰ ভিতৰত অফিচত বা ঘৰত থাকিবলৈ চেষ্টা কৰক।
৭) গৰম বতৰত প্ৰচুৰ ঘাম ওলায়, চকুৰেআন্ধাৰ দেখা পায় বা উশাহ-নিশাহ লোৱাত অসুবিধা হয় তেন্তে পলম নকৰাকৈ চিকিৎসকৰ ওচৰলৈ যাব লাগে। গৰমৰ দিনত ৰখাই থোৱা গাড়ীত বহি থকাটো বিপদজনক। বিশেষকৈ পোহনীয়া জন্তু আৰু শিশুক গাড়ীত বহু সময় আবদ্ধ কৰি ৰাখিব নালাগে।
৮) গ্ৰীষ্মকালত শৰীৰ শীতল কৰি ৰাখিবলৈ দৈ অতি উপকাৰী । ৰাতিপুৱা হওক বা দুপৰীয়া হওক দৈ খাবলৈ নাপহৰিব ৷
৯) হঠাৎ মূৰ ঘূৰোৱা, মূৰৰ বিষ, ডাঠ আৰু দুৰ্গন্ধযুক্ত প্ৰস্ৰাৱ, সময়ে সময়ে প্ৰস্ৰাৱ বন্ধ হোৱা, মুখ আৰু নাক শুকান হোৱা, ছাল অজ্ঞান হোৱা আৰু দুৰ্বলতাৰ লগত বমি হোৱা আদিয়ে শৰীৰত পানী নোহোৱা হোৱাৰ ইংগিত দিয়ে। শৰীৰত জলশূণ্য হোৱাৰ লক্ষণ যিমান সোনকালে চিনাক্ত হ’ব সিমানেই ৰোগীৰ বাবে ভাল।
১০) চিকিৎসকে গৰমৰ দিনত দিনটোত তিনি-চাৰিবাৰ গা ধুবলৈ পৰামৰ্শ দিয়ে। সাৱধান হওক যাতে শৰীৰত ঘাম শুহি নাযায়। বাহিৰলৈ ওলাই গ’লে ওৱেট টিচু লগত ৰাখিব লাগে।
