টেলিভিছন জগতৰ বাবে আন এক দুঃখবৰ।সৰু পৰ্দাৰ জনপ্ৰিয় অভিনেতা আদিত্য সিং ৰাজপুতৰ মাত্ৰ ৩২ বছৰ বয়সতে অকাল মৃত্যু হয়। সোমবাৰে মুম্বাইৰ আন্ধেৰীৰ ফ্লেটৰ শৌচাগাৰৰ পৰা উদ্ধাৰ কৰা হয় অভিনেতাজনৰ মৃতদেহ। চিকিৎসালয়ত তেওঁক মৃত ঘোষণা কৰা হয়। ড্ৰাগছৰ অতিমাত্ৰা সেৱনৰ ফলত অভিনেতাজনৰ মৃত্যু হৈছে বুলি আশংকা কৰা হৈছে । কিন্তু মৰণোত্তৰ পৰীক্ষাৰ প্ৰতিবেদনতহে এই কথা স্পষ্ট কৰিছে ৷ আনহাতে, অভিনেতাজনৰ বন্ধুসকলে ড্ৰাগছ সেৱনৰ বাবে মৃত্যু হোৱা বুলি মানি ল’বলৈ অস্বীকাৰ কৰে।
১৭ বছৰ বয়সত দিল্লীৰ এইজন যুৱকে বহু সপোন লৈ মনোৰঞ্জনৰ জগতখনত ভৰি দিলে। তাৰ পৰাই আদিত্যই যাত্ৰা আৰম্ভ কৰিলে। দিল্লীৰ ‘গ্ৰীণ ফিল্ডছ স্কুল’ত অধ্যয়ন কৰি ১৭ বছৰ বয়সতে মডেল হিচাপে ৰেম্পত ভৰি দিছিল আদিত্যই। আদিত্যই বহু বিখ্যাত কোম্পানীৰ বিজ্ঞাপনত কাম কৰি আহিছে। বলীউডৰ তাৰকা ঋত্বিক ৰোশন আৰু ক্ৰিকেট তাৰকা সৌৰভ গাংগুলীৰ সৈতে বিজ্ঞাপনত অভিনয় কৰা দেখা গৈছিল। বিজ্ঞাপনৰ জগতখনত সফলতা অৰ্জন কৰাৰ পিছত বলীউডৰ অভিনেতা হোৱাৰ সপোন সাধন কৰিবলৈ আদিত্যই মায়ানগৰীলৈ গুচি আহে। তেওঁ মুম্বাইলৈ আহি কেইবাটাও ৰিয়েলিটি শ্ব’ত অংশ লৈছিল। স্প্লিটছভিলাও আছিল তাৰ ভিতৰত অন্যতম। ৰিয়েলিটি শ্ব’ৰ উপৰিও আদিত্যই য়েহ হায় আশিকীৰ দৰে জনপ্ৰিয় যুৱ নাটকত অভিনয় কৰিছে। ‘কোড ৰেড’ৰ সৌজন্যত তেওঁ দৰ্শকৰ মাজত স্বীকৃতি লাভ কৰে।
কেৱল টেলিভিছনেই নহয়, আদিত্য সিং ৰাজপুতে বলীউডৰ কেইবাটাও প্ৰজেক্টত কাম কৰিছিল। অশোক পণ্ডিতৰ পৰিচালনাত নিৰ্মিত ‘ময়োনে গান্ধী কো নাহি মাৰা’ ছবিত অভিনয় কৰিছিল আদিত্যই। আনকি, তেওঁক ‘ইউ মি ঔৰ হাম’ ছবিখনত অমন মেহৰাৰ চৰিত্ৰত দেখা গৈছিল বলীউডৰ দুই অভিনেতা অজয় দেৱগন আৰু কাজলৰ সৈতে ।
অভিনয়ৰ উপৰিও শেহতীয়াকৈ আদিত্যই ব্যৱসায়ৰ প্ৰতিও মনোযোগ আকৰ্ষণ কৰে। নিজাকৈ কাপোৰৰ ব্ৰেণ্ড ‘পপ কালচাৰ ক্লথিং’ আৰম্ভ কৰে। প্ৰয়াত অভিনেতাগৰাকীয়ে তেওঁৰ কাপোৰৰ ব্ৰেণ্ডৰ বাবে ছ’চিয়েল মিডিয়াতো ব্যাপক সঁহাৰি লাভ কৰে।
এনে এক আশাব্যঞ্জক প্ৰতিভাৰ অকাল মৃত্যুত মৰ্মাহত হৈ পৰিছে মায়ানগৰী। কষ্টিউম ডিজাইনাৰ ৰোহিত বাৰ্মা, পৰিচালক অনীৰ, অশোক পণ্ডিতৰ দৰে চেলিব্ৰিটিয়ে ছ’চিয়েল মিডিয়াত শোক প্ৰকাশ কৰিছে। মঙলবাৰে মৰণোত্তৰ পৰীক্ষাৰ অন্তত আদিত্য সিং ৰাজপুতৰ শেষকৃত্য সম্পন্ন কৰা হয় ৷
