পত্নীৰ সৈতে বিবাহ বহিৰ্ভূত প্ৰেমৰ সম্পৰ্ক স্থাপন কৰাৰ বাবেই মহিলা গৰাকীৰ স্বামীয়ে এজন যুৱকৰ ডিঙি কাটি তেজ পান কৰা ঘটনাই কর্ণাটকত তীব্ৰ চাঞ্চল্যৰ সৃষ্টি কৰিছে ৷ কেৱল সেয়াই নহয়, অভিযুক্ত ব্যক্তিজনে সমগ্ৰ ঘটনাৰ ভিডিঅ’কৰি সামাজিক মাধ্যমত প্ৰচাৰ কৰে ৷ কৰ্ণাটকৰ চিকবল্লাপুৰা জিলাত এই নৃশংস ঘটনা সংঘটিত হয় ৷এই ভিডিঅ’টো ছ’চিয়েল মিডিয়াত ভাইৰেল হোৱাৰ পিছতে আৰক্ষীয়ে তদন্ত আৰম্ভ কৰে। অভিযুক্তক গ্ৰেপ্তাৰ কৰা হৈছে। বৰ্তমান আক্ৰমণৰ বলি হোৱা যুৱকজন আৰোগ্য লাভ কৰিছে বুলিও জানিব পৰা গৈছে ৷
আৰক্ষীৰ সূত্ৰ অনুসৰি কৰ্ণাটকৰ চিকবল্লাপুৰা জিলাৰ চিন্তামণি তালুকত বিজয় নামৰ এজন লোকে মৰেশ নামৰ এজন লোকৰ ডিঙিৰ এটা অংশ কাটি পেলায়। বিজয় নামৰ ব্যক্তিজনে তেওঁৰ ওপৰত জপিয়াই তেজ পান কৰা দেখা গৈছে।
প্ৰাপ্ত তথ্য অনুসৰি ১৯ জুনত বিজয় বন্ধু এজনৰ সৈতে স্থানীয় হাবিলৈ যায়। মৰেশক তালৈ মাতি অনা হ’ল। বিজয়ে যেতিয়া মৰেশৰ ডিঙি কাটি তেজ পান কৰিছিল তেতিয়া বন্ধুজনে সমগ্ৰ ঘটনাটো ভিডিঅ’ কৰি আছিল। অৱশ্যে ডিঙিত আঘাত পোৱাৰ পিছতো আহত যুৱকজন ৰক্ষা পৰে। স্থানীয় চিকিৎসালয়ত ভৰ্তি কৰোৱা হয় তেওঁক । সুস্থ হোৱাৰ পিছত তেওঁক ডিচচাৰ্জ দিয়া হয়। আৰক্ষীয়ে গোচৰ ৰুজু কৰি ঘটনাৰ তদন্ত আৰম্ভ কৰিছে। লগতে অভিযুক্তক গ্ৰেপ্তাৰ কৰা হৈছে।
