মহাৰাষ্ট্ৰৰ সমৃদ্ধি মহামাৰ্গ এক্সপ্ৰেছৱে (মুম্বাই-নাগপুৰ এক্সপ্ৰেছৱে)ত সংঘটিত ভয়ংকৰ বাছ দুৰ্ঘটনাত ২৬ জন লোকৰ মৃত্যু হৈছে ৷ মৃতকৰ সংখ্যা আৰু বৃদ্ধি পোৱাৰ আশংকা কৰা হৈছে। শুকুৰবাৰে গভীৰ নিশা যাত্ৰীবাহী বাছখনত কেনেদৰে জুই লাগিছিল সেই সন্দৰ্ভত একাধিক বক্তব্য প্ৰকাশ পাইছে। অৱশ্যে জ্বলি থকা বাছখনৰ পৰা আত্মৰক্ষা কৰিবলৈ সক্ষম হোৱা কেইজনমানৰ ভিতৰত এজনে তেওঁলোকৰ ভয়ংকৰ অভিজ্ঞতাৰ কথা প্ৰকাশ কৰিছে । প্ৰত্যক্ষদৰ্শীয়েও এই ভয়ংকৰ অভিজ্ঞতা বর্ণনা কৰিছে ৷
জীৱিত অৱস্থাত উভটি অহা এজন যাত্ৰীয়ে কয় যে বাছখনৰ এটা টায়াৰ তীব্ৰ শব্দ কৰি ফাটি যায়। ইয়াৰ পিছত একো গম পোৱাৰ আগতেই বাছখন আগুৰি ধৰে জুইৰ লেলিহান শিখা। তিনি-চাৰিজন যাত্ৰীয়ে নিজৰ জীৱন ৰক্ষাৰ বাবে পিছফালৰ খিৰিকী এখন ভাঙি জাপ মাৰে । বাকীসকলে সেই প্ৰচেষ্টাত সফল নহ’ল। বাছখনৰ ভিতৰতে অগ্নিদগ্ধ হৈ তেওঁলোকৰ মৃত্যু হয়। সেই সময়ত পথৰ কাষেৰে পাৰ হৈ যোৱা গাড়ীবোৰক সহায়ৰ বাবে ৰখাবলৈ চেষ্টা কৰা হৈছিল। কিন্তু প্ৰত্যক্ষদৰ্শীয়ে দাবী কৰে যে কোনো বাহন ৰৈ যোৱা নাছিল।
এজন প্ৰত্যক্ষদৰ্শীৰ মতে, “সেই পথটোত আগতেও বহু দুৰ্ঘটনা সংঘটিত হৈছে। আমি উদ্ধাৰ কৰাত সহায় কৰিবলৈ লৰালৰি কৰিলোঁ। সহায়ৰ বাবে আন গাড়ী ৰখাবলৈ চেষ্টা কৰক। কিন্তু কোনো বাহন ৰৈ নগ’ল ।” আন এজন প্ৰত্যক্ষদৰ্শীৰ মতে, “বাছখনৰ ভিতৰত থকা যাত্ৰীসকলে খিৰিকী ভাঙিবলৈ চেষ্টা কৰিছিল। কিন্তু জুই এনেদৰে জ্বলি আছিল যে আমি বাছখনৰ ওচৰ পাব পৰা নাছিলো। চকুৰ সন্মুখত মানুহৰ মৃত্যু হোৱা দেখিলোঁ।”
সংবাদ সংস্থা এএনআইয়ে প্ৰকাশ কৰা অনুসৰি মহাৰাষ্ট্ৰৰ যৱতমলৰ পৰা পুনেলৈ গৈ আছিল বাছখন। বাছখনত প্ৰায় ৩৩ জন যাত্ৰী আছিল। শুকুৰবাৰে মাজনিশা প্ৰায় ২ বজাত হঠাৎ অগ্নিকাণ্ড সংঘটিত হয় বাছখনত। ইতিমধ্যে এই ঘটনাক লৈ শোক প্ৰকাশ কৰিছে প্ৰধানমন্ত্ৰী নৰেন্দ্ৰ মোডী আৰু মহাৰাষ্ট্ৰৰ মুখ্যমন্ত্ৰী একনাথ শিণ্ডে। আনহাতে মহাৰাষ্ট্ৰ চৰকাৰে নিহত পৰিয়ালক ৫ লাখ টকাৰ ক্ষতিপূৰণ দিয়াৰ কথাও ঘোষণা কৰিছে। আৰক্ষীৰ সূত্ৰ অনুসৰি শুকুৰবাৰে গভীৰ নিশা যাত্ৰীসহ বাছখন উভতি আহিছিল। হঠাৎ বাছখনৰ এটা টায়াৰ ফাটি যায় ৷ নিয়ন্ত্ৰণ হেৰুৱাই বাছখনে সন্মুখৰ খুঁটাত খুন্দা মাৰি বাগৰি পৰে।
