তালিবানৰ নিষ্ঠুৰতা-বৰ্বৰতাক প্ৰত্যাহ্বানঃ অন্যায়ৰ প্ৰতিবাদেৰে সহস্ৰ মহিলাৰ কণ্ঠস্বৰ হৈ পৰিছে আফগানিস্তানৰ ক্ৰিষ্টেল বায়াট

তালিবানৰ আফগানিস্তান দখলৰ লগে লগে সমগ্ৰ বিশ্ববাসীৰ বাবে উদ্বেগৰ বিষয় হৈ পৰিছিল আফগান মহিলাৰ অধিকাৰৰ প্ৰসংগ। আৰু এই কথাক সঁচা প্ৰমাণিত কৰি অতি স্বাভাৱিকভাৱেই ৰাষ্ট্ৰ দখল কৰি তালিবানে ঘোষণা কৰিলে, বিগত সময়ছোৱাত আফগানী মহিলাই লাভ কৰা স্বাধীনতা নীতিবিৰুদ্ধ আৰু এয়া সভ্যতাৰ পৰিপন্থী!

আমেৰিকান সেনাই আফগানিস্তানত অভিযান চলাই ৰখা কুৰিটা বছৰত মহিলাসকলে মুকলিভাৱে উশাহ ল’বলৈ আৰম্ভ কৰিছিল আৰু ক্ৰমান্বয়ে তেওঁলোকৰ সপোনবোৰে পাখি মেলিছিল। কিন্তু মাৰ্কিন সেনাৰ প্ৰত্যাৱৰ্তনে আফগান মহিলাসকলক পুনৰ আন্ধাৰ ভৱিষ্যতলৈ ঠেলি দিলে।

তালিবানীৰ নিষ্ঠুৰতা আৰু নৃশংসতাৰ সৈতে সমগ্ৰ বিশ্ব পৰিচিত। মহিলাসকল তেওঁলোকৰ দৃষ্টিত যেন ইতৰ প্ৰাণীতকৈও নগণ্য। ক্ষমতা দখল কৰিয়েই তালিবানে মহিলাসকলক বোৰ্খা, গোড়ামি আৰু গৃহবন্দীৰ আওতাত বন্দী কৰি পেলাইছে। 

কিন্তু তালিবানৰ ভয়াবহ আইনলৈও ভয় নকৰি একাংশ মহিলাৰ প্ৰতিবাদেৰে মুখৰ হৈ পৰিছে আফগানিস্তানৰ ৰাজপথ। এই প্ৰতিবাদৰ নেতৃত্ব দিছে ক্ৰিষ্টেল বায়াট নামৰ এগৰাকী ২৪ বছৰীয়া যুৱতীয়ে। বিশ্বৰ বিভিন্ন সংবাদ মাধ্যমৰ দৃষ্টি আকৰ্ষণ কৰা বায়াটে মৃত্যুভয়কো অতিক্ৰম কৰি কাবুলৰ ৰাজপথত থিয় দি সশস্ত্ৰ তালিবান যোদ্ধাৰ আগত দাবী কৰিছে নিজৰ অধিকাৰ।

যোৱা ১৭ আগষ্টত বায়াটৰ নেতৃত্বত কাবুলৰ ৰাজপথত চাৰিগৰাকী মহিলা নিজৰ অধিকাৰ বিচাৰি থিয় হৈছিল। আনহাতে আফগানিস্তানৰ স্বাধীনতা দিৱসৰ ৰেলীতো ক্ৰিষ্টেলৰ নেতৃত্বত বহুকেইগৰাকী মহিলাই প্ৰতিবাদ সাব্যস্ত কৰিছিল।

উল্লেখযোগ্য যে বায়াটে দিল্লী বিশ্ববিদ্যালয়ৰ দৌলতৰাম কলেজৰ পৰা স্নাতক ডিগ্ৰী লাভ কৰি দিল্লীৰে ইউনাইটেড নেচনছ ইনষ্টিটিউটৰ পৰা স্নাতকোত্তৰ ডিগ্ৰীও লাভ কৰে। চিকিৎসক মাতৃ আৰু আফগান চৰকাৰৰ গৃহ মন্ত্ৰণালয়ৰ এগৰাকী বিষয়াৰ কন্যা বায়াটে শিক্ষা গ্ৰহণৰ অন্তত ২০১৯ চনত নিজ দেশলৈ।উভতি যায়।

আফগানিস্তান দখল কৰাৰ পাছতে তালিবানে মহিলাসকলৰ অধিকাৰ সংকুচিত কৰি আনিবলৈ বিভিন্ন নিৰ্দেশনা জাৰী কৰে। নাৰীৰ কৰ্মক্ষেত্ৰ ত্যাগৰ নিৰ্দেশনা, শিক্ষাগত অৰ্হতাৰ প্ৰমাণ-পত্ৰ নষ্ট কৰাৰ নিৰ্দেশৰ লগতে বোৰ্খাৰ আঁৰৰ বন্দী জীৱনৰ পোষকতা কৰে তালিবানে।

কিন্তু বিনা প্ৰতিবাদে এই দাসত্ব স্বীকাৰ কৰিবলৈ অমান্তি হৈ ক্ৰিষ্টেলে তালিবানৰ বিৰুদ্ধে মহিলাসকলক সংগঠিত কৰিবলৈ চেষ্টা কৰে। তেওঁ হোৱাট্‌ছএপৰ জৰিয়তে মহিলাসকলক একত্ৰিত কৰি প্ৰতিবাদৰ বাবে প্ৰেৰণা জগাবলৈ যত্ন কৰে। 

অৱশ্যে তালিবানৰ নৃশংস ইতিহাসৰ আগত নতজানু অধিকাংশ নাৰীয়েই প্ৰতিবাদ কৰিবলৈ সাহস গোটাব নোৱাৰিলে। কিন্তু তথাপিও থমকি ৰোৱা নাই ক্ৰিষ্টেল বাৰাট। তেওঁৰ ভাষাৰে সকলোৰে হৈ এই প্ৰতিবাদ কৰিব লাগিব। কাৰণ তালিবানসকল জয়ী হ’লে যোৱা বিশটা বছৰত মহিলাই লাভ কৰা অগ্ৰগতি অথলে যাব। মহিলাসকল অৰ্থনৈতিক, প্ৰশাসনিক আৰু ৰাজনৈতিক প্ৰক্ৰিয়াৰ অংশ হ’ব লাগিব বুলিও তেওঁ মন্তব্য কৰিছিল।

সমগ্ৰ বিশ্বৰ দৃষ্টি বাৰাটৰ কাৰ্যাৱলীত নিবদ্ধ। আনহাতে তালিবানে বাবে বাৰে ভীতিগ্ৰস্ত কৰি তেওঁৰ প্ৰতিবাদক বাধা আৰোপ কৰিব বিচাৰিছে। তালিবানৰ সংবিধানত মহিলাৰ অধিকাৰৰ প্ৰসংগই হাস্যকৰ আৰু ভিত্তিহীন।

আফগানিস্তানৰ পৰা প্ৰাণৰ মমতাত পলায়ন কৰিব বিচৰা সহস্ৰজনৰ তুলনাত বায়াটৰ সাহসৰ কাহিনীয়ে সকলোকে অনুপ্ৰাণিত কৰিছে। ক্ৰিষ্টেল বায়াটৰ প্ৰতিবাদৰ পৰিণতি কোনেও নাজানে। কিন্তু এই প্ৰতিবাদৰ কাহিনী নতুন আফগানিস্তান গঠনৰ ইতিহাসত সোণালী আখৰেৰে যে লিপিবদ্ধ হৈ ৰ’ব সেয়া নিশ্চিত।