কেইমাহমান আগতে কৰ্ণাটকত নির্বাচনত পৰাজিত হৈছিল বিজেপি ৷ ৰাজস্থান আৰু মধ্যপ্ৰদেশকে ধৰি পাঁচখন ৰাজ্যৰ বিধানসভা নিৰ্বাচন চমু চাপি আহিছে । আৰম্ভ হৈছে লোকসভা নির্বাচনৰো কুচকাৱাজ ৷ আগন্তুক নির্বাচনসমূহৰ প্ৰতি লক্ষ্য ৰাখি মোডী চৰকাৰে ৰন্ধন গেছৰ চিলিণ্ডাৰৰ মূল্য হ্ৰাস কৰাৰ কথা চিন্তা কৰিবলৈ বাধ্য হৈছে। কেন্দ্ৰীয় চৰকাৰৰ সুত্ৰৰ মতে, শীঘ্ৰে এই সিদ্ধান্ত লোৱা হ’ব পাৰে। কেৱল সেয়াই নহয়, ভোটদানৰ প্ৰতি লক্ষ্য ৰাখি পেট্ৰ’ল-ডিজেলৰ মূল্য আংশিকভাৱে হ’লেও সহ্ৰাস কৰাৰ বাবে উৎপাদন শুল্ক কৰ্তন কৰা হ’ব পাৰে বুলিও চৰকাৰী সূত্ৰই ইংগিত দিছে।
দেশত ঘৰুৱা গেছ চিলিণ্ডাৰৰ মূল্য বর্তমান ১১০০ টকাৰো অধিক। বিজেপিৰ ৰাজ্যিক নেতাসকলে কেন্দ্ৰীয় নেতৃত্বক জনাইছে যে নৰেন্দ্ৰ মোডীৰ ‘অনুগত্য’ মহিলা ভোট বেংক এই উচ্চ মূল্যত অসন্তুষ্ট। তাৰ ওপৰত ৰাজস্থানৰ কংগ্ৰেছ চৰকাৰে ৫০০ টকাৰ দামত গেছ চিলিণ্ডাৰ প্ৰদান কৰিছে । মধ্যপ্ৰদেশতো যদি কংগ্ৰেছ ক্ষমতালৈ আহে তেন্তে একে দামত চিলিণ্ডাৰ পোৱাৰ প্ৰতিশ্ৰুতি দিছে। এই হেঁচাত গেছৰ মূল্য হ্ৰাসৰ ধাৰণাটোৱে ৰাজস্থান, মধ্যপ্ৰদেশ, ছত্তীশগড়, তেলেংগানা আৰু অহা বছৰৰ লোকসভা নিৰ্বাচনকে মনত ৰাখিছে।
যোৱা তিনি বছৰত ৰন্ধন গেছৰ চিলিণ্ডাৰৰ দাম প্ৰায় দুগুণ বৃদ্ধি পাইছে। সাধাৰণতে আন্তঃৰাষ্ট্ৰীয় বজাৰত গেছৰ দামৰ সৈতে মিল ৰাখি দেশত গেছ চিলিণ্ডাৰৰ মূল্য নিৰ্ধাৰণ কৰা হয়। দেশত প্রয়োজনীয় এল পি জি-ইৰ প্রায় ৬০ শতাংশই বিদেশৰ পৰা আনিব লগা হৈছে৷ কিন্তু যোৱা কেইবছৰমানৰ পৰা ৰন্ধন গেছৰ দাম প্ৰায় দুগুণ বৃদ্ধি পোৱাৰ লগে লগে বিজেপিৰ নেতৃত্বই অনুভৱ কৰিছে যে তেওঁলোকে মূল্য দিব লাগিব আৰু ৰাজনৈতিকভাৱে এই কাম কৰি আছে। ইয়াৰ ফলত কৰ্ণাটকৰ বিধানসভা নিৰ্বাচনত প্ৰভাৱ পৰিছে। লগতে কংগ্ৰেছ শাসিত ৰাজ্যসমূহে ৰাজসাহায্য অনুসৰি ৫০০ টকাত চিলিণ্ডাৰ দিবলৈ আৰম্ভ কৰাৰ লগে লগে বিজেপিৰ ওপৰত হেঁচা অধিক বৃদ্ধি পাইছে ৷
এতিয়া ৰন্ধন গেছৰ সাধাৰণ সংযোগ চিলিণ্ডাৰত নামমাত্ৰ ৰাজসাহায্য দিয়ে মোডী চৰকাৰে। প্ৰধানমন্ত্ৰী উজ্জ্বলা যোজনাৰ অধীনত বিনামূলীয়া গেছ সংযোগ দিয়া প্ৰায় ৯.৫ কোটি পৰিয়ালকহে প্ৰতি চিলিণ্ডাৰত ২০০ টকা ৰাজসাহায্য দিয়া হয়। কিন্তু তেতিয়াও দৰিদ্ৰ পৰিয়ালৰ বাবে ৯০০ টকাতকৈ অধিক মূল্যত চিলিণ্ডাৰ কিনাটো কঠিন হৈ পৰে। এনে পৰিস্থিতিত কেন্দ্ৰীয় পেট্ৰলিয়াম মন্ত্ৰী হৰদীপ সিং পুৰীয়ে প্ৰত্যক্ষ মূল্য কৰ্তনৰ কথা নক’লেও মোডী চৰকাৰে জনসাধাৰণৰ ওপৰত বোজা কমাবলৈ প্ৰতিশ্ৰুতিবদ্ধ বুলি দাবী কৰে।
ইফালে খুচুৰা বজাৰত মূল্যবৃদ্ধিৰ হাৰ জুলাই মাহত ৭.৪৪ শতাংশ হৈছেগৈ। যিটো ১৫ মাহৰ ভিতৰত সৰ্বাধিক। মূল্যবৃদ্ধিৰ এই হাৰ ৰোধ কৰিবলৈ পেট্ৰল-ডিজেলৰ আবকাৰী শুল্ক হ্ৰাস কৰাৰ কথাও মোডী চৰকাৰে চিন্তা কৰিছে। শেষবাৰৰ বাবে মুদ্ৰাস্ফীতিৰ হাৰ ইমান বেছি আছিল ২০২২ চনৰ এপ্ৰিল মাহত। সেই সময়ত মুদ্ৰাস্ফীতিৰ হাৰ আছিল ৭.৭৯ শতাংশ। ইয়াৰ পিছত মে’ মাহত পেট্ৰ’ল-ডিজেলৰ আবকাৰী শুল্ক হ্ৰাস কৰা হয়। কিন্তু তাৰ পিছৰ পৰা আৰু কোনো শুল্ক কৰ্তন কৰা হোৱা নাই।
বিত্ত মন্ত্ৰালয়ৰ সূত্ৰই জনোৱা মতে, সেই সময়ত পেট্ৰ’লত প্ৰতি লিটাৰত ৮ টকা আৰু ডিজেলত প্ৰতি লিটাৰত ৬ টকালৈ শুল্ক হ্ৰাস কৰা হৈছিল। কিন্তু ইয়াৰ বাবে চৰকাৰে প্ৰায় ১ লাখ কোটি ৰাজহ হেৰুৱাবলগীয়া হৈছে। চৰকাৰী সূত্ৰৰ মতে, যদি এতিয়াই ইন্ধনৰ দাম কমি যায়, তেন্তে ৰাজকোষত হেঁচা পৰিলেও সাধাৰণ লোকে সকাহ পাব । মূল্যবৃদ্ধিৰ বোজা কমি যাব। পৰিবহণৰ খৰচো হ্ৰাস পাব। ইয়াৰ সুফল মূল্যবৃদ্ধিৰ হাৰতো দেখা যাব। বিৰোধী শিবিৰৰ দাবী যে খাৰুৱা তেলৰ মূল্য হ্ৰাস পোৱাৰ পাছতো বহু দিন ধৰি অধিক উৎপাদন শুল্কৰ বাবে দেশৰ সাধাৰণ জনতাৰ বাবে পেট্ৰ’ল-ডিজেলৰ মূল্য অধিক হৈ আহিছে।
