অপেক্ষাৰ অন্ত পৰিল। ভাৰতীয় মহাকাশ গৱেষণা সংস্থাৰ চন্দ্ৰযান-৩ লেণ্ডাৰ বিক্ৰম বুধবাৰে চন্দ্ৰৰ মাটিত অৱতৰণ কৰিব ৷ ইয়াৰ জৰিয়তে ভাৰতে চন্দ্ৰৰ দক্ষিণ মেৰুৰ পৰিৱেশৰ অধ্যয়ন চলাব ৷
ইতিমধ্যে ইছৰোৱে ঘোষণা কৰিছে যে বুধবাৰে সন্ধিয়া ৬:০৪ বজাত বিক্ৰম চন্দ্ৰত অৱতৰণ কৰিব। মঙলবাৰে তেওঁলোকে টুইট কৰি কয় যে এতিয়ালৈকে সকলো পৰিকল্পনা অনুসৰি চলি আছে। বিক্ৰমৰ গতিবিধি অবিৰতভাৱে নিৰীক্ষণ কৰা হৈছে। বিক্ৰম সময়মতে অৱতৰণ কৰিবলৈ গৈ আছে বুলি আশাবাদী ইছৰো।
ইতিমধ্যে মূল মহাকাশযানৰ পৰা বিচ্ছিন্ন হৈছে লেণ্ডাৰ বিক্ৰম। বৰ্তমান ই চন্দ্ৰপৃষ্ঠৰ পৰা ২৫ কিলোমিটাৰ ওপৰেৰে উৰি আছে। বুধবাৰে পৰ্যায়ক্ৰমে হ্ৰাস পাব লেণ্ডাৰৰ উচ্চতা। ইয়াৰ লগত থকা ভাৰসাম্য অনুসৰি বিক্ৰমৰ গতি কমি যাব। বিক্ৰমৰ বৰ্তমানৰ স্থানৰ পৰা চন্দ্ৰত উপস্থিত হ’বলৈ ১৫ মিনিট সময় লাগিব।
- প্ৰথম পৰ্যায়ত বিক্ৰমক ৭.৪ কিলোমিটাৰ উচ্চতালৈ নমাই অনা হ’ব। এই সময়ত লেণ্ডাৰৰ গতি হ’ব প্ৰতি ছেকেণ্ডত ৩৫৮ মিটাৰ। পৰৱৰ্তী গন্তব্যস্থান চন্দ্ৰৰ পৰা ৬.৮ কিলোমিটাৰ ওপৰত। এই পদক্ষেপত বিক্ৰমৰ গতি আৰু অধিক হ্ৰাস কৰা হ’ব। তেতিয়া ইয়াৰ গতি হ’ব প্ৰতি ছেকেণ্ডত ৩৩৬ মিটাৰ।
- ইয়াৰ পিছত চন্দ্ৰৰ পৰা বিক্ৰমৰ উচ্চতা ৮০০ মিটাৰ হ্ৰাস পাব। তেতিয়া ইয়াৰ গতি আৰু অলপ কমি যাব। এই পৰ্যায়ত লেণ্ডাৰখনে লেজাৰ ৰশ্মি ব্যৱহাৰ কৰিব। বিক্ৰমে চেন্সৰৰ জৰিয়তে চন্দ্ৰৰ মাটিত লেজাৰ ৰশ্মি প্ৰেৰণ কৰি অৱতৰণৰ বাবে উপযুক্ত ভূমি বিচাৰিব। ইয়াৰ পিছত ক্ৰমান্বয়ে উচ্চতা কমি যাব। ৮০০ মিটাৰ উচ্চতাৰ পৰা ১৫০ মিটাৰ উচ্চতালৈ নামি অহাৰ পথত বিক্ৰমৰ গতিবেগ প্ৰতি ছেকেণ্ডত ৬০ মিটাৰ হ’ব। ইয়াৰ পিছত ১৫০ মিটাৰৰ পৰা ৬০ মিটাৰলৈ নামি অহাৰ সময়ত এই গতি প্ৰতি ছেকেণ্ডত ৪০ মিটাৰ হ’ব। ৬০ মিটাৰৰ পৰা ১০ মিটাৰলৈ নামি গ’লে বিক্ৰমৰ বেগ প্ৰতি ছেকেণ্ডত ১০ মিটাৰ হ’ব। ইয়াৰ পিছত লেণ্ডাৰখনে চন্দ্ৰত কোমল অৱতৰণ কৰিব। শেষ মুহূৰ্তত ইয়াৰ বেগ হ’ব ১.৬৮ মিটাৰ প্ৰতি ছেকেণ্ড।
অৱতৰণৰ এই শেষ পৰ্যায়টোৱেই আটাইতকৈ কঠিন আৰু গুৰুত্বপূৰ্ণ বুলি বিবেচিত হয়। চাৰি বছৰ আগতে ভাৰতৰ চন্দ্ৰ স্পৰ্শৰ সপোন ইয়াতেই ৰৈ গৈছিল ৷ চন্দ্ৰযান-২ বিফল হৈছিল । এইবাৰ অৱশ্যে সকলো সম্ভাৱনাকে মনত ৰাখি আগতীয়াকৈ প্ৰস্তুতি চলাইছে ইছৰ’ই। বিক্ৰমত বিশেষ চেন্সৰ স্থাপন কৰা হৈছে। ইছৰোৰ দাবী, চেন্সৰবোৰে কাম কৰা বন্ধ কৰিলেও বিক্ৰম চন্দ্ৰত অৱতৰণ কৰিব। লেণ্ডাৰখনৰ ডিজাইন এনেকৈয়ে কৰা হৈছে।
