১৮ মাহ বয়সত দুবাৰকৈ হাৰ্ট এটেক হোৱাৰ পিছত অৱশেষত চেন্নাইত নতুন জীৱন লাভ কৰিলে বুলগেৰিয়াৰ এটি শিশুয়ে। শিশুটিৰ পিতৃ-মাতৃয়ে হৃদ চিকিৎসাৰ বাবে বুলগেৰিয়াৰ পৰা চেন্নাইত উপস্থিত হৈছিল ।যাত্ৰাৰ সময়ত এবাৰ বিমানত আৰু আনবাৰ চেন্নাইৰ এখন চিকিৎসালয়ত হাৰ্ট এটেকত আক্ৰান্ত হৈছিল শিশুটি । অৱশেষত চিকিৎসকৰ প্ৰচেষ্টাত চেন্নাইত শিশুটিৰ ‘অপেন হাৰ্ট ট্ৰান্সপ্লাণ্ট’ অস্ত্ৰোপচাৰ সফল হ’ল।
প্ৰথম অৱস্থাত চিকিৎসকসকলে ‘বাৰ্লিন হাৰ্ট’ ব্যৱহাৰ কৰাৰ পৰিকল্পনা কৰিছিল। ‘বাৰ্লিন হাৰ্ট’ হৈছে এটা বিকল্প হাৰ্ট মেচিন যিয়ে বাহ্যিক আৰ্টিকুলেটেড পাম্প হিচাপে কাম কৰে। কিন্তু অৱশেষত চিকিৎসালয়খনে মুম্বাইৰ পৰা এটা কেঁচুৱাৰ হৃদপিণ্ড লাভ কৰিলে। যিটো পোৱাটো যথেষ্ট কঠিন কাম আছিল।সেয়া লাভ কৰাৰ পিছত এই বুলগেৰিয়ান শিশুটিৰ শৰীৰত হৃদযন্ত্ৰটো অস্ত্ৰোপচাৰৰ দ্বাৰা সংৰোপণ কৰা হয়। চিকিৎসকৰ মতে এই অস্ত্ৰোপচাৰ যথেষ্ট বিপদজনক। কিন্তু তেওঁলোক সফল হ’ল, কণমানিটো সুস্থ হৈ পৰে । অস্ত্ৰোপোচাৰৰ দায়িত্বত থকা চিকিৎসক বালকৃষ্ণনে কয়- “সেই সময়ত শিশুটিৰ শৰীৰৰ অৱস্থা যথেষ্ট সংকটজনক আছিল। আমি বিভিন্ন ধৰণে পৰিস্থিতি স্বাভাৱিক কৰিবলৈ চেষ্টা কৰি আছিলো। সেই মুহূৰ্ততে মুম্বাইৰ পৰা হস্পিতাললৈ ফোন আহিল। আমাৰ ওচৰলৈ খবৰ আহিল যে মুম্বাইত ১৮ মহীয়া শিশুৰ হৃদযন্ত্ৰ পোৱা গৈছে। এই সংযোগ আচৰিত বুলি ক’লে ভুল নহ’ব। ইমান সৰু ল’ৰা-ছোৱালীৰ অংগসমূহ সাধাৰণতে উপযুক্ত ৰোগী নথকাৰ বাবে ব্যৱহাৰ কৰা নহয়। এই ক্ষেত্ৰত সেইটোৱেই শিশুটিক উপকৃত কৰিলে ৷”
যি শিশুৰ হৃদযন্ত্ৰ পোৱা গৈছিল, সেই শিশুটিৰ বুলগেৰিয়াৰ শিশুটিৰ সৈতে তেজৰ গ্ৰুপৰ মিল নাছিল। চিকিৎসালয়ৰ সূত্ৰৰ পৰা জানিব পৰা মতে, চিকিৎসকে ‘এবিঅ ইনকম্পেটিবল ট্ৰান্সপ্লাণ্টেচন’ পদ্ধতিৰে অস্ত্ৰোপচাৰ কৰে ৷
৬ জুলাইত বুলগেৰিয়াৰ পৰা চেন্নাইত উপস্থিত হৈছিল ১৮ মহীয়া ক্ৰীছি আৰু তেওঁৰ মাতৃ ইভানজেলিনা। ইভানজেলিনাই কয় –“এই যাত্ৰা মোৰ বাবে আছিল অতি প্ৰত্যাহ্বানজনক। চিকিৎসাৰ ব্যৱস্থা কৰাটো যথেষ্ট সময়সাপেক্ষ আছিল। কিন্তু মোৰ হাতত সময় খুব কম আছিল। যাত্ৰাৰ সময়ছোৱাত ক্ৰীছিৰ হৃদযন্ত্ৰই দুবাৰকৈ ভেণ্টিলেটৰত কাম কৰা বন্ধ কৰি দিছিল। তেওঁৰ বয়সৰ এটি শিশুৰ হৃদযন্ত্ৰ চেন্নাইত উপস্থিত হোৱাৰ মাত্ৰ সাত দিনৰ ভিতৰতে পোৱাটো মোৰ বাবে সঁচাকৈয়ে আচৰিত।”
