বহিঃৰাজ্যত পুনৰ ৰহস্যজনক অৱস্থাত উদ্ধাৰ হ’ল অসমৰ এজন যুৱকৰ মৃতদেহ ৷ জামুগুৰিহাটৰ এজন যুৱকৰ মৃতদেহ উদ্ধাৰ কৰা হৈছে গোৱাত ৷ মৃতদেহ উদ্ধাৰ হোৱা যুৱকজন হৈছে জামুগুৰিহাটৰ কৰতিপাৰাৰ ইন্দ্ৰ নাথ ৷ কর্মসংস্থাপন বিচাৰি গোৱালৈ গৈছিল ইন্দ্ৰ ৷ কোনো লোকে গোৱাত তেওঁক হত্য়া কৰা বুলি স্থানীয় লোকসকলে সন্দেহ প্ৰকাশ কৰিছে ৷
কর্মস্থলীৰ সমীপৰ পৰা এখন জংঘলত যুৱকজনৰ মৃতদেহ উদ্ধাৰ কৰা হয় ৷ যুৱকজনৰ মুখমণ্ডলত আঘাতৰ চিন স্পষ্ট হৈ আছে বুলি জানিব পৰা গৈছে ৷ সন্ধানহীন হোৱাৰ দুদিন পাছত ইন্দ্ৰৰ মৃতদেহ উদ্ধাৰ কৰে তেওঁৰ বন্ধুবর্গই ৷ ইয়াৰ পাছতে ইন্দ্ৰৰ মৃত্যু হোৱা বুলি পৰিয়ালক খবৰ দিয়ে ৷ কালি যুৱকজনৰ মৃতদেহ নিজা ঘৰলৈ অনা হয় ৷ এই ঘটনাই সমগ্ৰ অঞ্চলটোতে শোকৰ ছাঁ পেলাইছে ৷ স্থানীয় ৰাইজে ইয়াৰ এক সঠিক তদন্ত কৰিবলৈ আহ্বান জনায় ৷
