মহানগৰীৰ স্মার্ট আৰক্ষীয়ে এতিয়াও নিয়ন্ত্ৰণলৈ আনিব পৰা নাই চিলনী চোৰক ৷ মহানগৰীত অব্যাহত আছে চিলনী চোৰৰ উপদ্ৰৱ ৷ পুনৰ মহিলাৰ ডিঙিৰ পৰা সোণৰ চেইন কাঢ়ি নিয়াৰ চেষ্টা চলালে চিলনী চোৰে ৷ এই ঘটনা সংঘটিত হ’ল মহানগৰীৰ লাষ্টগেটত ৷ অৱশ্যে মহিলা গৰাকীৰ ডিঙিৰ পৰা সোণৰ চেইনডাল কাঢ়ি নিয়াত ব্যর্থ হয় চিলনী চোৰটো ৷
প্ৰাপ্ত তথ্য অনুসৰি দেওবাৰে নিশা ভুক্তভোগী মহিলা গৰাকী আত্মীয়ৰ ঘৰৰ পৰা নিজৰ ঘৰলৈ ওভতি অহাৰ সময়তে এই ঘটনা সংঘটিত হয় ৷ এখন বাইকত অহা এজন যুৱকে মহিলা গৰাকীৰ ডিঙিৰ চেইন কাঢ়ি নিবলৈ চেষ্টা কৰে ৷ লগে লগে মহিলাগৰাকীৰ কন্যাই বাইকখন থাপ মাৰি বগৰাই দিয়ে ৷ লগতে যুৱকজনক ঠেলা মাৰি নলাত পেলাই দিয়ে ৷ আনকি যুৱতী গৰাকীয়ে চোৰটোক টানি ৰাখিবলৈ চেষ্টা কৰে ৷ কিন্তু নিশা প্ৰায় ১০ বজাৰ আশেপাশে এই ঘটনা সংঘটিত হোৱাৰ সময়ত ঘটনাস্থলীৰ ওচৰে পাজৰে কোনো লোক উপস্থিত নাছিল ৷ যাৰ বাবে যুৱকজনে হেলমেটেৰে যুৱতী গৰাকীক আক্ৰমণ কৰি সেই স্থানৰ পৰা পলায়ন কৰে ৷ অৱশ্যে যুৱকজনে ঘটনাস্থলীতে এৰি থৈ যায় বাইকখন ৷
পৰৱর্তী সময়ত ভুক্তভোগী মহিলা গৰাকী দিছপুৰ আৰক্ষী থানাৰ কাষ চাপে ৷ দিছপুৰ আৰক্ষীয়ে বাইক খন জব্দ কৰি তদন্ত অব্যাহত ৰাখিছে ৷ উল্লেখ্য যে চিলনী চোৰৰ উপদ্ৰৱে মহানগৰীত সন্ত্ৰাসৰ সৃষ্টি কৰিছে ৷ অকলশৰীয়া মহিলা একপ্ৰকাৰ ওলাব নোৱাৰাৰ দৰে হৈছে চিলনী চোৰৰ উপদ্ৰৱ ৷
