ঋতু পৰ্ণ শৰ্মা,নগাঁও,২৪ছেপ্টেম্বৰ:–মহাপুৰুষ শ্ৰীমন্ত শংকৰদেৱৰ ৫৭৫ সংখ্যক জন্মজয়ন্তীৰ দিনটোত অৰ্থাৎ ৰবিবাৰে মুখ্যমন্ত্রী ড° হিমন্ত বিশ্ব শৰ্মাই শ্রীশ্রীবটদ্ৰৱা থান দৰ্শন কৰি আশিস গ্ৰহণৰ লগতে বটদ্ৰৱা থান চৌহদৰ উন্নয়নৰ বাবে ৰাজ্য চৰকাৰে গ্ৰহণ কৰা অভিলাষী পদক্ষেপৰ অধীনত প্রায় ২২ কোটি টকা ব্যয়ৰে নিৰ্মাণ কৰা সত্ৰীয়া চ’ৰা,সভাঘৰ,দামোদৰ আতা যাত্রী নিবাস আৰু কাৰ্যালয় ভৱনৰ শুভ উদ্বোধন কৰে । উল্লেখ্য যে শ্ৰীশ্ৰীবটদ্ৰৱা থানৰ এই নিৰ্মাণ কাৰ্যৰ আধাৰশিলা ২০২২ চনৰ ১৬ এপ্ৰিলত স্থাপন কৰা হৈছিল আৰু ১৭ মাহৰ ভিতৰতে এই নির্মাণকার্য সম্পূৰ্ণ কৰি তোলা হৈছে ।
মুখ্যমন্ত্ৰীয়ে মহাপুৰুষ শ্ৰীমন্ত শংকৰদেৱৰ ৫৭৫ সংখ্যক জন্মজয়ন্তী উৎসৱ উদযাপনৰ বৰ্ষজোৰা কাৰ্যসূচীৰো আনুষ্ঠানিক ভাৱে শুভাৰম্ভণি কৰে । এই উপলক্ষে প্ৰদান কৰা ভাষণত মুখ্যমন্ত্ৰী ড° শৰ্মাই মহাপুৰুষ শ্ৰীমন্ত শংকৰদেৱ অসমীয়া জাতিৰ প্রাণ প্রতিষ্ঠাতা আছিল বুলি মন্তব্য কৰে। তেওঁ লগতে কয় যে অসম চৰকাৰে বিগত কেইটামান বছৰত বটদ্রৱা থানৰ বিকাশৰ বাবে বহু কেইটা প্রচেষ্টা হাতত লৈছে । ইয়াৰ অংশ হিচাপে আজি সত্ৰীয়া চ’ৰা,সভাঘৰ, দামোদৰ আতা যাত্রী নিবাস আৰু কাৰ্যালয় ভৱন উদ্বোধন কৰা হৈছে । পৰৱৰ্তী পৰ্যায়ত থানখনৰ চৌহদত যাত্ৰীৰ সুবিধাৰ্থে ৰন্ধনশালা,থান চৌহদত থকা দুয়োটা পুখুৰীৰ সৌন্দৰ্যবৰ্ধন, যান-বাহন ৰখাৰ ব্যৱস্থা,যাত্ৰীৰ সুবিধার্থে স্নানাগাৰ,প্ৰস্ৰাৱগাৰ আদি নিৰ্মাণৰ কাম শীঘ্ৰে আৰম্ভ কৰা হ’ব বুলিও সদৰি কৰে । মুখ্যমন্ত্ৰীয়ে কয় যে ৰাজ্য চৰকাৰে শ্ৰীশ্ৰীবটদ্ৰৱা থানক এক ঐতিহ্য ক্ষেত্ৰ হিচাপে চিহ্নিত কৰি থানখনৰ পৰা ৮ কিল’মিটাৰৰ ভিতৰত খিলঞ্জীয়া লোকৰ বাহিৰে আন লোকক ভূমি ক্রয়-বিক্ৰয়ত নিষেধাজ্ঞা আৰোপৰ অর্থে এখন আইন প্রণয়নৰ প্ৰচেষ্টা লৈছে ।
ৰাজ্য চৰকাৰৰ এই পদক্ষেপে থানখনৰ বাবে এক সুৰক্ষা কৱচ হিচাপে কাম কৰিব বুলি মন্তব্য কৰে । এই আইনখন প্রণয়ন নোহোৱা পৰ্যন্ত বটদ্ৰৱা থানৰ পৰা ৮ কিল’মিটাৰলৈকে সমগ্ৰ অঞ্চলটোত থলুৱা লোকৰ বাহিৰে আন লোকক ভূমি ক্রয়-বিক্রয়ত অনুমতি নিদিবলৈ ইতিমধ্যে জিলা আয়ুক্তক কোৱা হৈছে বুলিও তেওঁ জানিবলৈ দিয়ে। ড° শৰ্মাই লগতে কয় যে প্রস্তাৱিত এই আইনখন সন্দৰ্ভত ৰাজ্য চৰকাৰে বটদ্ৰৱা থান পৰিচালনা সমিতিৰ সৈতেও আলোচনাত মিলিত হ’ব। বটদ্ৰৱা থানৰ চৌহদত থকা সংগ্ৰহালয়টো সুন্দৰকৈ নিৰ্মাণৰ বাবে ভৱিষ্যতে পদক্ষেপ লোৱা হ’ব বুলিও কয় ।
ভাষণ প্ৰসংগত মুখ্যমন্ত্ৰীগৰাকীয়ে বটদ্ৰৱা থান চৌহদৰ বাহিৰত ৰাজ্য চৰকাৰে নিৰ্মাণ কৰি থকা আনটো বৃহৎ অভিলাষী প্রকল্পৰ প্ৰথম পৰ্যায়ৰ কাম দ্ৰুতগতিত আগবাঢ়িছে বুলিও সদৰি কৰে। তেওঁ ২০২১ চনৰ ১৫ ছেপ্টেম্বৰত প্ৰশাসনিক অনুমোদন জনোৱা আৰু প্ৰায় ৫০ কোটি টকা ব্যয় সাপেক্ষ এই প্ৰকল্পটোৰ প্ৰথম পৰ্যায়ৰ কাম বৰ্তমানলৈকে ৮১ শতাংশ সম্পূৰ্ণ হৈছে। অহা বছৰৰ ফেব্ৰুৱাৰী মাহত এই প্ৰকল্পটো উদ্বোধন কৰা হ’ব। ৰাজ্য চৰকাৰৰ এই অভিলাষী প্রকল্পটোৰ দ্বিতীয় পৰ্যায়ত প্ৰায় ১১৪ কোটি টকা ব্যয় হ’ব বুলি মন্তব্য কৰি তেওঁ কয় যে দ্বিতীয় পৰ্যায়ত প্ৰকল্পটোত ভগৱান শ্ৰীকৃষ্ণৰ জীৱনবৃত্তান্ত সম্পৰ্কীয় প্ৰদৰ্শনীৰ লগতে শ্ৰীকৃষ্ণৰ ওখ প্রতিমূর্তি স্থাপন, নাটক,ভাওনা আদি পৰিৱেশন কৰিব পৰাকৈ নাটঘৰ স্থাপন, পৰিবেশ্য কলাৰ বাবে কলাকেন্দ্ৰ, যাত্রী নিবাস আদি নিৰ্মাণ কৰা হ’ব ।
প্ৰসংগক্ৰমে মুখ্যমন্ত্ৰীয়ে কয় যে ৰাজ্য চৰকাৰে বটদ্ৰৱা থানৰ বিকাশৰ সমান্তৰালকৈ মহাপুৰুষ শ্ৰীমন্ত শংকৰদেৱৰ স্মৃতি বিজড়িত আন ২১ খন স্থান সুন্দৰকৈ গঢ়ি তোলাৰ উদ্দেশ্যে শ্রীমন্ত শংকৰদেৱ আধ্যাত্মিক যাত্রা শীর্ষক এটা প্রকল্প গ্ৰহণ কৰিছে। ইয়াৰ অধীনত জীৱন কালৰ বিভিন্ন সময়ত মহাপুৰুষগৰাকীয়ে কটোৱা এই ২১ খন স্থান সুন্দৰকৈ গঢ়ি তোলাৰ উদ্দেশ্যে শ্রীমন্ত শংকৰদেৱ আধ্যাত্মিক যাত্রা শীর্ষক এটা প্রকল্প গ্ৰহণ কৰিছে । ইয়াৰ অধীনত জীৱনকালৰ বিভিন্ন সময়ত মহাপুৰুষগৰাকীয়ে কটোৱা এই ২১ খন স্থান আন্তঃগাঁথনি আদি নির্মাণেৰে উন্নীত কৰা হ’ব আৰু ভক্ত-দর্শনাৰ্থীসকলৰ সুবিধার্থে অসম ৰাজ্যিক পৰিবহণ নিগমৰ সেৱাৰ দ্বাৰা বটদ্ৰৱা থানৰ পৰা মধুপুৰ সত্ৰলৈকে আটাইকেইখন পৱিত্ৰ ভূমি সংযোজিত হ’ব। ভাষণ প্ৰসংগত মুখ্যমন্ত্ৰীয়ে অসমবাসীৰ শান্তি আৰু সমৃদ্ধিৰ বাবে গুৰুজনাৰ আশীৰ্বাদ কামনা কৰে। মুখ্যমন্ত্ৰীগৰাকীয়ে শ্ৰীশ্ৰীবটদ্ৰৱা থান চৌহদত এজুপি কাঞ্চন গছো ৰোপণ কৰে । এই অনুষ্ঠানত শ্ৰীশ্ৰীশ’লগুৰি সত্ৰৰ সত্ৰাধিকাৰ যোগেন্দ্ৰ নাৰায়ণ দেৱ মহন্ত আৰু শ্ৰীশ্ৰীনৰোৱা সত্ৰৰ সত্ৰাধিকাৰ দেৱানন্দ দেৱ গোস্বামীৰ উপৰি নগাঁও সদৰ সমষ্টিৰ বিধায়ক ৰূপক শৰ্মা,বঢ়মপুৰ সমষ্টিৰ বিধায়ক জিতু গোস্বামী,ৰহা সমষ্টিৰ বিধায়ক শশীকান্ত দাস, শ্ৰীমন্ত শংকৰদেৱ কলাক্ষেত্ৰৰ সচিব সুদৰ্শন ঠাকুৰকে ধৰি বহু গণ্য-মান্য ব্যক্তি উপস্থিত থাকে ।
