ডাৱৰ বিস্ফোৰণৰ ফলত ছিকিমত সৃষ্টি হোৱা অভূতপূর্ব বানত সন্ধানহীন হৈছে অসমৰ আন দুজন যুৱক ৷ছিকিমত দীপ নেৱাৰ নামৰ যুৱকজন সন্ধানহীন হৈ আছে বুলি জানিব পৰা গৈছে ৷ দীপ নেৱাৰ গোর্খা ৰেজিমেণ্টত কর্মৰত হৈ আছে ৷ আন এজন গুৱাহাটীৰ যুৱকো সন্ধানহীন হৈছে ছিকিমৰ বান পৰিস্থিতিত ৷ হীৰেন দেউৰী নামৰ যুৱকজন বর্তমানলৈ সন্ধানহীন হৈ আছে ছিকিমত ৷ সন্ধানহীন দীপ নেৱাৰ মৰাণৰ বাসিন্দা বুলি জানিব পৰা গৈছে ৷বর্তমানলৈ জোৱানজনৰ সৈতে কোনো যোগাযোগ কৰিব পৰা নাই পৰিয়ালৰ লোকে ৷ আনহাতে হীৰেন নামৰ যুৱকজন গেংটকৰ পৰা লাছুঙলৈ গৈছিল যুৱকজন ৷ পিতৃৰ সৈতে কথা পাতি থাকোতেই ফোনৰ যোগাযোগ বিছিন্ন হৈছিল ৷
পিতৃয়ে প্ৰকাশ কৰা অনুসৰি হীৰেণ দেউৰী ৰেল বিভাগত কর্মৰত ৷ প্ৰশিক্ষণৰ বাবে নিউ জলপাইগুৰিত আছিল হীৰেণ ৷ কিন্তু যোৱা ৩০ ছেপ্টেম্বৰত আন কেইবাজনো বন্ধুৰ সৈতে ছিকিমলৈ ফুৰিবলৈ গৈছিল ৷ মুঠ ৯ জন লোক গৈছিল যদিও ৭ জন ওভতি আহিছে ৷ কিন্তু হীৰেণ আৰু আন এজন বন্ধু এতিয়াও ওভতি অহা নাই ৷
ইপিনে ছিকিমত আৱদ্ধ হৈ আছে অসমৰ ১৬০ জন শিক্ষার্থী ৷ এই শিক্ষার্থীসসকলক উদ্ধাৰৰ বাবে ৰাজ্য চৰকাৰে ইতিমধ্যে ব্যৱস্থা গ্ৰহণ কৰিছে ৷
