গো-সুৰক্ষা হিন্দুৰ মৌলিক অধিকাৰ: এলাহাবাদ হাইকোৰ্ট

অসমীয়া জনজীৱনত গৰুক লৈ চৰ্চাৰ অন্ত নাই। প্ৰবাদ-প্ৰবচন, ফকৰা-যোজনা, উপমা, ঠাট্টা-মস্কৰা সকলোতে মুঠতে গৰু ! শেহতীয়া কিছু বছৰজুৰি গৰু কেন্দ্ৰিক আলোচনাই ঘৰে-বাহিৰে সকলোতে মুখ্যস্থান লাভ কৰিছে।

অসমীয়া ফকৰা “যাৰ নাই গৰু, সি সবাতোকৈ সৰু” কথাষাৰ আজিৰ জীৱনধাৰাত খাপ নাখালেও হিন্দু ধৰ্মাৱলম্বী লোকৰ বাবে এতিয়া গৰু হৈ পৰিছে মান-সন্মান আৰু গৌৰৱৰ প্ৰতীক।

শেহতীয়াকৈ “গৰু”ৰ মহত্ব আৰু গুৰুত্ব সন্দৰ্ভত এলাহাবাদ হাইকোৰ্টত উত্থাপিত এক প্ৰসংগই গৰুপ্ৰেমীসকলকো ভাবিবলৈ বাধ্য কৰিছে গৰুৰ মূল্য আৰু প্ৰাধান্য!

এলাহাবাদ হাইকোৰ্টে বাঘ নহয়, গৰুক ৰাষ্ট্ৰীয় পশু হিচাপে স্বীকৃতি দিবলৈ পৰামৰ্শ আগবঢ়াইছে। বুধবাৰে ন্যায়াধীশ শেখৰ কুমাৰ যাদৱৰ এজনীয়া বিচাৰপীঠে গো হত্যা সম্বন্ধীয় এটা গোচৰত এনেধৰণৰ বিষয়ৰ অৱতাৰণা কৰে।

গৰু কটাৰ বাবে জাভেদ নামৰ এজন ব্যক্তিক ‘উত্তৰ প্ৰদেশ গো হত্যা বিৰোধী আইন’ৰ অধীনত গ্ৰেপ্তাৰ কৰা হৈছিল। জাভেদৰ জামিনৰ আবেদন নাকচ কৰি ন্যায়াধীশ শেখৰ যাদৱে মন্তব্য কৰে যে, গৰু সভ্যতাৰ সৈতে ওত:প্ৰোতভাৱে জড়িত। বেদ আৰু মহাভাৰতৰ দৰে ভাৰতীয় প্ৰাচীন গ্ৰন্থসমূহত গৰুক গুৰুত্বপূৰ্ণ অংশ হিচাপে দাঙি ধৰা হৈছে।

বিচাৰকজনে কৈছিল যে এইটো জাভেদৰ প্ৰথম অপৰাধ নহয়, তেওঁ আগতেও গৰু হত্যাত লিপ্ত হৈছে। ইয়াৰ ফলত সামাজিক বিভেদ সৃষ্টি হৈছিল আৰু যদি জাভেদক জামিনত মুকলি কৰা হয়, তেন্তে তেওঁ অপৰাধৰ পুনৰাবৃত্তি কৰাৰ সম্ভাৱনা আছে যাৰ ফলত অধিক উত্তেজনা সৃষ্টি হ’ব পাৰে।

ন্যায়াধীশ যাদৱৰ মতে গৰুৰ ভাল হ’লেহে দেশৰ ভাল হ’ব। তেওঁ লগতে কয় যে ভাৰতত নাগৰিকসকলৰ দৰে গৰুৰো মৌলিক অধিকাৰ থকা উচিত। তেখেতে ইয়াৰ বাবে সংসদত বিধেয়ক গৃহীত কৰি নতুন আইন প্ৰণয়নৰ পৰামৰ্শও দিয়ে।

পৰিস্থিতি বিবেচনা কৰি গৰুক ৰাষ্ট্ৰীয় পশু হিচাপে ঘোষণা কৰা উচিত আৰু গৰুৰ সুৰক্ষা ভাৰতৰ হিন্দুসকলৰ মৌলিক অধিকাৰৰ অংশ হোৱা উচিত বুলিও যাদৱে পৰামৰ্শ আগবঢ়ায়।

১৯৫৫ চনৰ উত্তৰ প্ৰদেশ গৰু হত্যা প্ৰতিৰোধ আইনখন ১৯৫৬ চনৰ ৬ জানুৱাৰীত ৰাজ্যখনত কাৰ্যকৰী কৰা হৈছিল। কেন্দ্ৰীয় চৰকাৰে মে ২০১৭ ত থলুৱা প্ৰজাতিবোৰ সংৰক্ষণ আৰু উন্নত কৰাৰ বাবে, আৰু গৰু, পোৱালী আৰু অন্যান্য দুগ্ধজাত গৰু হত্যা নিষিদ্ধ কৰিছিল।

২০১৭ চনতো ৰাজস্থান হাইকোৰ্টে গৰুক শীঘ্ৰেই ৰাষ্ট্ৰীয় পশু হিচাপে ঘোষণা কৰিব লাগে বুলি প্ৰস্তাৱ আগবঢ়াইছিল। ৰাজস্থান আদালতে আনকি গো হত্যাত দোষী সাৱ্যস্ত হ’লে যাৱজ্জীৱন কাৰাদণ্ডৰ শাস্তি দিয়াৰ দাবীও তুলিছিল।

শেহতীয়াকৈ অসমতো মন্দিৰৰ ৫ কিলোমিটাৰৰ ভিতৰত গো মাংস বিক্ৰী বন্ধ কৰা হৈছে। অসম বিধানসভাত গো সংৰক্ষণ বিধেয়ক গৃহীত কৰা হৈছে।