যুদ্ধবিধ্বস্ত ইজৰাইলত আৱদ্ধ হৈ থকা ৫ জন অসমৰ লোক সুকলমে ওভতি আহিছে ৷ ইতিমধ্যে ইজৰাইলৰ পৰা দিল্লীত উপস্থিত হৈছে অসমৰ ৫জন লোক। কেন্দ্ৰীয় চৰকাৰে আৰম্ভ কৰা অপাৰেচন অজয়ৰ অধীনত ২৩৫ জন ভাৰতীয়ক লৈ ইজৰাইলৰ পৰা দ্বিতীয়খন বিশেষ বিমানে আজি দিল্লীত অৱতৰণ কৰে।এই বিমানেৰে ওভতাই অনা হয় অসমৰ লোককেজনক ৷ আজি দিল্লীত উপস্থিত হোৱা অসমৰ লোককেইজন হৈছে সুৰজিত কলিতা, বিবেক চেত্ৰী, প্ৰীতম শৰ্মা, নাজিহা তাৰান্নম আৰু দেৱজিত।
ইয়াৰে ভিতৰত হিব্ৰু বিশ্ববিদ্যালয়ত পোষ্ট ডক্টৰ হিচাবে পঢ়ি থকা সুৰজিৎ কলিতা হৈছে পাঠশালা, বজালীৰ আৰু পিএইচডি কৰি থকা বিবেক চেত্ৰী হৈছে ৰুণিখাটা, চিৰাঙৰ, প্ৰীতম শৰ্মা হৈছে পকোৱা, নলবাৰীৰ বাসিন্দা ৷ ইতিমধ্যে তেওঁলোক দিল্লীৰ পৰা ঘৰ অভিমুখে ৰাওনা হোৱা বুলি জানিব পৰা গৈছে ৷
