শিৱসাগৰ, ২৩ নৱেম্বৰঃ শীত আগমনৰ সময়তে অসম গ্ৰন্থমেলাৰ আয়োজনে শিৱসাগৰত জ্ঞান চৰ্চাৰ আনন্দদায়ক পৰিৱেশ গঢ়ি তুলিছে ৷ ইয়াৰ ঐতিহ্যমণ্ডিত ব’ৰ্ডিং খেলপথাৰত এলানি বৰ্ণিল কাৰ্যসূচীৰে অসম প্ৰকাশন পৰিষদ আৰু সদৌ অসম পুথি প্ৰকাশক আৰু বিক্ৰেতা সংস্থাৰ যৌথ উদ্যোগত অনুষ্ঠিত অসম গ্ৰন্থমেলাই আজি পঞ্চম দিন অতিক্ৰম কৰিলে ৷ পূৰ্ব নিৰ্ধাৰিত কাৰ্যসূচী অনুসৰি আজি বিয়লি ২ বজাৰ পৰা গ্ৰন্থমেলাৰ বাকৰিত অনুষ্ঠিত হয় “লেখক-পাঠক সমাৰোহ ” ৷ বিশিষ্ট লেখক, শিৱসাগৰ বাণিজ্য মহাবিদ্যালয়ৰ অধ্যক্ষ ড° সৌমাৰজ্যোতি মহন্তই এই অনুষ্ঠান সঞ্চালনা কৰে ৷ তেওঁ বক্তব্যত কয়— “ভাষা-সাহিত্যৰ উত্তৰণত লেখক আৰু পাঠক উভয়ৰে ভূমিকা গুৰুত্বপূৰ্ণ ৷
অসমীয়া ভাষী মানুহ প্ৰায় ১’৫ কোটি ৷ কিন্তু সেই অনুপাতে কাকত-আলোচনীৰ প্ৰচালনৰ পৰিসংখ্যা সন্তোষজনক হয়নে ? পৃথিৱীত এনে বহু জাতি আছে যাৰ ভাষিক জনসাধাৰণৰ সংখ্যা অসমীয়া ভাষা কোৱা মানুহৰ তুলনাত কম ৷ এই ক্ষেত্ৰত ভাৰতৰে কোংকিনী ভাষাৰ নাম ল’ব পাৰি ৷ সংখ্যাত তাকৰ হ’লেও সেই ভাষিক জনসমষ্টিয়ে নিজৰ ভাষাৰ অস্তিত্বক লৈ শংকিত হোৱা নাই ৷ কাৰণ সেই ভাষা নিজৰ মাজত বিশুদ্ধৰূপত প্ৰচুৰ পৰিমাণে ব্যৱহৃত হয় লিখা-পঢ়া তথা সৃষ্টিশীল কৰ্মত ৷ অসমীয়াভাষী জনগনৰ বাবে এয়া আশাব্যঞ্জক উদাহৰণ হ’ব পাৰে ৷ লেখক-পাঠকৰ মত বিনিময়ৰ এনে অনুষ্ঠানত এনেবোৰ প্ৰসংগৰ উত্থাপনে সঠিক পথৰ সন্ধান দিব পাৰে ৷”তেওঁ লগতে কয় যে চতুৰ্থ উদ্যোগিকৰণৰ জটিল সন্ধিক্ষণত উপনীত হৈছে আমাৰ সমাজ ৷ এই তীব্ৰ স্ৰোতত ভাষা-সাহিত্য আৰু বিদ্যালয়তনিক ক্ষেত্ৰক মজবুত কৰি ৰাখিবলৈ আমি নিজকে শক্তিশালী কৰিবই লাগিব ৷ ইয়াৰ বাবে নিজৰ ভাষাক নিজৰ সংস্কৃতি আৰু সমাজ-জীৱনক ভাল পাবই লাগিব ৷ ইয়াতে নিহিত হৈ থাকিব লাগিব ভাষাৰ প্ৰতি, জাতীয়-জীৱনৰ প্ৰতি আৰু দেশৰ প্ৰতি নিঃস্বাৰ্থ প্ৰেম ৷
লেখক-পাঠকৰ সমাৰোহত ভালেকেইগৰাকী কবি-সাহিত্যিক, নিৱন্ধকাৰ-নাট্যকাৰে অংশগ্ৰহণ কৰি ভাষা-সাহিত্য, লোক-সংস্কৃতি,গদ্যশিল্প,নাট্যধাৰা আদি ভিন্ন বিষয়ত মতামত আগবঢ়ায় ৷চিন্তাগধুৰ বক্তব্যৰে অনুষ্ঠানটোক গাম্ভীৰ্যপূৰ্ণ আৰু উপভোগ্য কৰি তোলা এইসকল লেখক-সাহিত্যিক হৈছে ড° সঞ্জীৱ কুমাৰ শৰ্মা, মাণিক আহমেদ, তুলিকা চেতিয়া য়েইন, চামচুল বাৰিক, কবিতা কৰ্মকাৰ, দীপান্বিতা বৰা, প্ৰশান্ত বৰগোহাঁই, মৌচুমী ৰেখা খাউণ্ড, মৌচুমী দুৱৰা, অসমী গগৈ, সংগীতা ৰুণুমী বৰুৱা,প্ৰশান্ত কুমাৰ নাথ, জিন্তু মেছ, ড° লিপি ফুকন, অশ্ৰুমণি দত্ত ঘোষ, সংগীতা ৰুণুমী বৰুৱা,দেৱযানী দীক্ষিতা , চিন্ময়ী বুঢ়াগোহাঁই, মধুমিতা মহন, মনোজ কুমাৰ, গগৈ, স্নেহা জোনাক দত্ত আদি ৷ ইয়াৰ পাছত সন্ধিয়া ৫ বজাৰ পৰা প্ৰবোধ দাসৰ পৰিচালনাত অনুষ্ঠিত হয় বৰ্ণিল সাংস্কৃতিক প্ৰতিযোগিতা ৷ উল্লেখ্য যে অসম গ্ৰন্থমেলা ,শিৱসাগৰতো এহেজাৰ টকাৰ গ্ৰন্থ ক্ৰয় কৰা সকলক এখনকৈ উপহাৰ কুপন দিয়াৰ ব্যৱস্থা কৰা হৈছে ৷ এই কুপনৰ লটাৰীৰ জৰিয়তে গ্ৰন্থমেলাৰ সামৰণী অনুষ্ঠানৰ দিনা সন্ধিয়া ৬ বজাত ১ লাখ টকাৰ নগদ পুৰস্কাৰ বিতৰণ কৰা হ’ব ৷
