প্ৰশান্ত মহাসাগৰৰ গভীৰতাত সোণালী কণী, আচৰিত হ’ল বিজ্ঞানীসকলো

যোৱা মাহত গভীৰ সাগৰত অজ্ঞাত ঠাই অন্বেষণ কৰিবলৈ প্ৰশান্ত মহাসাগৰক বাছি লৈছিল এটা অন্বেষকৰ দলে।য’ত তেওঁলোকে আৱিষ্কাৰ কৰিলে অভূতপূৰ্ব এনে এক বস্তু যি আশ্চৰ্য্যচকিত কৰিছে সকলোকে ।
প্ৰশান্ত মহাসাগৰৰ অটল তলিত দেখা গৈছে সোণালী ৰঙৰ এক অণ্ডাকাৰ বস্তু । বস্তুটো একে ঠাইত স্থিৰ হৈ থাকিলেও অৱশ্যে বিজ্ঞানীসকলে সন্দেহ কৰিছে যে সেয়া নিশ্চয় কোনো অজ্ঞাত প্ৰাণীহে।
আমেৰিকাৰ ৰাষ্ট্ৰীয় মহাসাগৰীয় আৰু বায়ুমণ্ডল প্ৰশাসনে (NOAA) প্ৰশান্ত মহাসাগৰত অন্বেষণ কৰিবলৈ এজন গৱেষক আৰু অভিযাত্ৰীক পঠিয়াইছিল।তেওঁলোকৰ মূল লক্ষ্য আছিল আলাস্কা উপসাগৰৰ গভীৰতা অন্বেষণ কৰা আৰু তাত লুকাই থকা ৰহস্যসমূহ উদঘাটন কৰা। সেই বিজ্ঞানীসকলে সাগৰত প্ৰবাল আৰু অন্যান্য বহু বস্তুৰ উপস্থিতি আৰু আগ্নেয়গিৰিৰ উপস্থিতিৰ বিষয়েও পৰীক্ষা নিৰীক্ষা কৰি আছে।
আগষ্ট মাহত এন অ’ এ এৰ এই গৱেষণা দলটো প্ৰশান্ত মহাসাগৰলৈ ৰাওনা হয়। তেওঁলোকৰ এই যাত্ৰা আৰম্ভ হৈছিল আলাস্কাৰ উপকূলৰ পৰা। ২৪ দিনীয়া এই অভিযানটোত সাগৰৰ চাৰি মাইল গভীৰতালৈ যোৱাৰ পৰিকল্পনা কৰা হৈছিল।
এক বাংলা সংবাদ মাধ্যমৰ প্ৰতিবেদনত প্ৰকাশ কৰা অনুসৰি ৩০ আগষ্টত আলাস্কাৰ দক্ষিণ উপকূলৰ পৰা প্ৰায় ৪০০ কিলোমিটাৰ দূৰত্বত সাগৰৰ তলত এই ৰহস্যময় সোণালী ‘কণী’ উদ্ধাৰ কৰে এই অভিযানৰ অভিযানকাৰীসকলে। উল্লেখনীয় যে লাইভ টেলিকাষ্ট কৰা হৈছিল তেওঁলোকৰ এই অভিযান ।
গৱেষকসকলে কয় যে ডিম্বাকৃতিৰ এই বস্তুটোৰ এটা অংশত মাত্ৰ এটা লিকহে দেখা গৈছে। তাৰ পৰাই তেওঁলোকৰ এটা ধাৰণা হয় যে ই এটা অজ্ঞাত সাগৰীয় প্ৰাণী হ’ব পাৰে। যাৰ মাত্ৰ কঠিন খোলাটোহে বাহিৰৰ পৰা দেখা যায়।
মিডিয়া গাৰ্ডিয়ানৰ প্ৰতিবেদন অনুসৰি সাগৰৰ এই ৰহস্যজনক বস্তুটো কি সেই বিষয়ে জানিবলৈ ইতিমধ্যে পৰীক্ষা-নিৰীক্ষা আৰম্ভ হৈছে। আনহাতে চলি আছে ‘কণী’ৰ বিশ্লেষণো ।
অন্বেষকসকলৰ ডুব যোৱাৰ পৰা প্ৰতিফলিত হোৱা পোহৰৰ বাবেই এই বস্তুটো সোণালী যেন দেখা গৈছিল বুলি বিজ্ঞানীসকলে দাবী কৰিছে। আন বিভিন্ন ছবি পৰীক্ষা কৰাৰ পিছত বিজ্ঞানীসকলৰ সামূহিক সিদ্ধান্ত হ’ল যে বস্তুটোৰ ৰং আচলতে হালধীয়া-বাদামী।
প্ৰাথমিক পৰ্যবেক্ষণৰ অন্তত বিজ্ঞানীসকলে কয় যে ডিম্বাকৃতিৰ বস্তুটো ছালৰ কলাৰ দৰে পদাৰ্থৰে গঠিত। অন্ততঃ বাহিৰৰ পৰা দেখাত এনেকুৱাই।
পৰীক্ষাৰ বাবে বস্তুটোৰ লগত ৰিম’ট কণ্ট্ৰ’ল কৰা বাহু এটা সংলগ্ন কৰা হৈছিল। ইয়াৰ লগত এটা নলীও সংযোগ কৰা হয়। এতিয়া ৰহস্যময় ‘কণী’টোক লৈ থকা ব্যস্ততাৰ অন্ত নাই।
জানিব পৰা মতে এই অণ্ডাকাৰ বস্তুটোৰ ব্যাস চাৰি ইঞ্চি।যাৰ সচৰাচৰ দেখা পোৱা কোনো প্ৰাণীৰ বৈশিষ্ট্যৰ সৈতে মিল নাই।
উল্লেখযোগ্য যে প্ৰশান্ত মহাসাগৰত বহু নতুন জীৱ-জন্তু আৱিষ্কাৰ হৈছে।

এন অ’ এ এৰ এজন বিষয়াই সংবাদ মাধ্যমক জনোৱা মতে, পৰীক্ষাগাৰত ভালদৰে পৰ্যবেক্ষণ নকৰিলে এই আচৰিত বস্তুটোৰ বিষয়ে সম্পূৰ্ণৰূপে প্ৰকাশ কৰাটো সম্ভৱ নহয়।
প্ৰশান্ত মহাসাগৰৰ সোণালী ‘কণী’ৰ ৰহস্য সমাধানৰ বাবে বিজ্ঞানী আৰু সামুদ্ৰিক জীৱবিজ্ঞানীসকলৰ পৰামৰ্শ লৈছে এন অ’ এ এয়ে।আনহাতে এই ৰহস্য অতি সোনকালে সমাধান হ’ব বুলি আশাবাদী বিজ্ঞানীসকল।