অসমীয়া সংগীত জগতত গভীৰ শূণ্যতাৰ সৃষ্টি কৰি ইহসংসাৰ ত্যাগ কৰিলে বিশিষ্ট বাদ্যযন্ত্ৰী- সংগীত পৰিচালক ভূপেন উজীৰে ৷ মঙলবাৰে নিশা নেমকেয়াৰ হাস্পতালত শেষ নিশ্বাস ত্যাগ কৰে শিল্পী গৰাকীয়ে ৷ ৬জানুৱাৰীত তেওঁক ভৰ্তি কৰোৱা হৈছিল হাস্পতালত। শ্বাস-প্ৰশ্বাসজনিত ৰোগত আক্ৰান্ত হৈছিল শিল্পীগৰাকী। প্ৰয়াত ভূপেন উজিৰৰ মৃত্যু অসমীয়া সংগীত জগতৰ বাবে অপূৰণীয় ক্ষতি হৈ ৰ’ব।
ভূপেন উজীৰে ১৯৫৩ চনৰ ৫ এপ্ৰিলত যোৰহাটত জন্মগ্ৰহণ কৰিছিল। শিল্পী গৰাকীয়ে যোৰহাটত শৈশৱ পাৰ কৰিছিল। প্ৰথমে গীটাৰিষ্ট হিচাপে জীৱন আৰম্ভ কৰা ভূপেন উজীৰে ভূপেন হাজৰিকা-জয়ন্ত হাজৰিকাৰ সৈতেও গীটাৰ বজাইছিল ৷ পৰৱর্তী সময়ত তেওঁ অসমীয়া ছবিৰ সংগীত পৰিচালনা কৰি খ্যাতি অর্জন কৰে ৷
আজি পুৱা তেওঁৰ নশ্বৰদেহ মহানগৰীৰ মঠঘৰীয়াস্থিত বাসগৃহলৈ অনা হয় ৷ ইয়াতে তেওঁক গুণমুগ্ধই শেষ শ্ৰদ্ধা জ্ঞাপন কৰে ৷ আজি বিয়লিৰ ভাগত তেওঁৰ অন্তিম সংস্কাৰ নৱগ্ৰহত সম্পন্ন কৰা হ’ব ৷ মৃত্যুৰ সময়ত পত্নী শান্তা উজীৰ আৰু দুই কন্যা প্ৰীতিস্মিতা উজীৰ খানুজা আৰু কীৰ্তিকা উজীৰ শৰ্মাক ইহসংসাৰত এৰি যায় ৷
উল্লেখ্য যে ভূপেন উজীৰে সুৰ কৰা বা সংগীতেৰে সজোৱা অসমীয়া গীতৰ তালিকা যথেষ্ট দীঘলীয়া। সংগীত পৰিচালক, সুৰকাৰ, গীটাৰবাদক, শব্দযন্ত্ৰী, গীতিকাৰ, বাদ্যযন্ত্ৰী হিচাপে অনন্য আছিল শিল্পী ভূপেন উজীৰ। ২০ খনৰো অধিক ছবিত তেওঁ সংগীত পৰিচলনা কৰিছিল। জীৱন সুৰভি, ব’হাগৰ দুপৰীয়া, প্ৰতিদান, জখম, উৰ্বশী, এই মৰম তোমাৰ বাবে, পূজা, পিতা পুত্ৰ, ভাই ভাই, যৌৱনে আমনি কৰে, বুকুৰ মাজত জ্বলে, অঘৰী আত্মা, বৰদৈচিলা আদিকে ধৰি কেইবাখনো জনপ্ৰিয় ছবিৰ সংগীত পৰিচালনা কৰিছিল ভূপেন উজীৰে। তেওঁ সংগীত পৰিচালনা কৰা প্ৰথমখন ছবি আছিল দেৱী। পত্নী শান্তা আৰু ভূপেন উজীৰৰ যুটী অসমীয়া সংগীত জগতৰ বাবে এক অনবদ্য অৱদান। সংগীত পৰিচালক জিতু তপনৰ দ্ৱাৰা পৰিচালিত অৰ্কেষ্ট্ৰাত গীটাৰ বজাইছিল ভূপেন উজীৰে।
তেওঁ ভাৰতীয় খাদ্য নিগমত চাকৰিত যোগদান কৰিলেও সংগীতৰ সাধনা এৰি দিয়া নাছিল। এসময়ত সংগীত যাত্ৰা ব্যাহত হোৱা বাবে এফচিআইৰ চাকৰি ত্যাগ কৰিছিল শিল্পীগৰাকীয়ে। গীতানগৰৰ ভাড়াঘৰত ভূপেন উজীৰে আৰম্ভ কৰিছিল অডিটেক নামৰ নিজৰ ষ্টুডিঅ’টো। এটা ছেকেণ্ডহেণ্ড শব্দগ্ৰহণ যন্ত্ৰ ক্ৰয় কৰি তেওঁ অডিটেক আৰম্ভ কৰিছিল।এই ষ্টুডিঅ’তে নবীন প্ৰবীন বহু শিল্পীয়ে গীত ৰেকর্ডিং কৰিছিল ৷
ভূপেন উজীৰৰ দেহাৱসানত মুখ্যমন্ত্ৰী ড০ হিমন্ত বিশ্ব শৰ্মাই শোক প্ৰকাশ কৰিছে ৷এক শোকবার্তাত মুখ্যমন্ত্ৰী গৰাকীয়ে কয় -এগৰাকী সংগীতকাৰ হিচাপে দীৰ্ঘদিন ধৰি সুৰৰ সাধনাৰে তেখেতে অসমৰ সাংস্কৃতিক জগতখনলৈ অনবদ্য অৱদান আগবঢ়াই থৈ গ’ল। কেইবাটাও প্ৰজন্মক সংগীতৰ জৰিয়তে মোহাচ্ছন্ন কৰি ৰখা ভূপেন উজীৰ ডাঙৰীয়াৰ বিয়োগ আমাৰ সাংস্কৃতিক জগতখনৰ বাবে অপূৰণীয় ক্ষতি। তেখেতৰ বিদেহ আত্মাৰ চিৰশান্তি কামনাৰ লগতে উজীৰ ডাঙৰীয়াৰ শোকসন্তপ্ত পৰিয়াল তথা গুণমুগ্ধসকলক গভীৰ সমবেদনা জ্ঞাপন কৰিলো ৷
