আমাৰ মগজুত এটা কম্পাছ থাকে, যিয়ে আমাক দিশ বিচাৰি উলিওৱাত সহায় কৰে।কোনে ক’লে এই কথা?

আমি কেনেকৈ দিশ নিৰ্ণয় কৰোঁ কেতিয়াবা ভাবি চাইছেনে?
আমাৰ চৌপাশৰ পৰিৱেশ, কেনেকৈ ক’লৈ যাব লাগে সেইটো আমি কেনেকৈ অনুমান কৰিব পাৰোঁ। কেনেকৈ স্বাভাৱিক দিশবোৰ আমাৰ মনলৈ স্বয়ংক্ৰিয়ভাৱে আহে। বিজ্ঞানীসকলৰ মতে আমাৰ মগজুত এটা কম্পাছ থাকে, যিয়ে আমাক দিশ নিৰ্ণয় কৰাত সহায় কৰে।
কম্পাছৰ কাম হ’ল মূল দিশ বিচাৰি উলিওৱা। সহজ ভাষাত ক’বলৈ গ’লে কম্পাছ হৈছে উত্তৰ, দক্ষিণ, পূব আৰু পশ্চিমৰ দৰে দিশ নিৰ্ণয় কৰা এটি যন্ত্ৰ।
নেচাৰ হিউমেন বিহেভিয়াৰ নামৰ আলোচনীখনত প্ৰকাশিত এক নতুন গৱেষণাৰ মতে, গৱেষকসকলে মগজুৰ কাৰ্য্যকলাপৰ এনে এক আৰ্হি চিনাক্ত কৰিছে যিয়ে আমাক দিশ নিৰ্ণয় কৰাত সহায় কৰে ।
বাৰ্মিংহাম বিশ্ববিদ্যালয় আৰু মিউনিখৰ লুডৱিগ মেক্সিমিলিয়ান বিশ্ববিদ্যালয়ৰ এটা দলে প্ৰথমবাৰৰ বাবে দেখুৱাবলৈ সক্ষম হৈছে যে আমাৰ শৰীৰ আৰু মগজুত স্নায়ু কম্পাছৰ দৰে এনেধৰণৰ কিবা এটা থাকে, যি মানুহৰ মগজুক দিশ নিৰ্ণয় কৰাত বা যিকোনো পৰিৱেশত মগজুৱে শৰীৰক পৰিচালনা কৰাত সহায় কৰে।
এই অধ্যয়নৰ প্ৰথম লেখক ড° বেঞ্জামিন জে. গ্ৰীফিথে কয় যে চৰাই, নিগনি আৰু বাদুলিৰ দৰে জীৱ-জন্তুৰ স্নায়ু বৰ্তনী থাকে যিয়ে ইহঁতক সঠিক পথত ৰাখে, কিন্তু বাস্তৱ জগতত মানুহৰ মগজুৱে ইয়াক কেনেকৈ পৰিচালনা কৰে সেই বিষয়ে আমি অতি কমেইহে জানো।
খোজ কঢ়াৰ সময়ত মানুহৰ স্নায়ুৰ কাৰ্য্যকলাপ জুখিব পৰা প্ৰত্যাহ্বান অতিক্ৰম কৰিবলৈ গৱেষকসকলে মোবাইল ইইজি ডিভাইচ আৰু মোচন কেপচাৰ প্ৰযুক্তি ব্যৱহাৰ কৰিছিল। ৫২ জন সুস্থ অংশগ্ৰহণকাৰীৰ এটা দলে গতি অনুসৰণৰ ধাৰাবাহিক পৰীক্ষাত অংশগ্ৰহণ কৰিছিল। তাৰ পিছত তেওঁলোকৰ মগজুৰ কাৰ্য্যকলাপ মূৰৰ ছালৰ ই ই জিৰ জৰিয়তে ৰেকৰ্ড কৰা হৈছিল।
গৱেষকসকলে কয় যে মগজুৱে প্ৰকৃততে গতি নকৰাকৈয়ে মগজুৰ কোনো আকাংক্ষিত দিশ অনুকৰণ কৰিবলৈ নিউৰন ব্যৱহাৰ কৰিব পাৰে। তেওঁলোকৰ মতে মূৰৰ দিশৰ কোষবোৰ এটা ভূমিকাৰ পৰা আন এটা ভূমিকালৈ সলনি হয়, যাতে এজন মানুহে নিজৰ লক্ষ্যলৈ বুলি দিশ অনুসৰণ কৰাৰ আগতে ক’ব পাৰে যে তেওঁ এতিয়া ক’ত আছে আৰু ক’লৈ গৈ আছে।
মগজুৰ এই ক্ষেত্ৰত কাৰ্য্যকলাপৰ শক্তি ব্যক্তিৰ দিশ নিৰ্ণয়ৰ দক্ষতাৰ সৈতে জড়িত। যিটো কিছুমানত কম আৰু আন কিছুমানত বেছি। এইটোৱেই হৈছে মগজুৰ সেই অংশ যিটো এলঝেইমাৰৰ দৰে ৰোগৰ দ্বাৰা প্ৰথম ক্ষতিগ্ৰস্ত হোৱা অংশৰ ভিতৰত অন্যতম, যিয়ে হয়তো বুজাব পাৰে যে কিয় হেৰাই যোৱা আৰু বিভ্ৰান্ত হোৱাটো ৰোগীৰ আৰম্ভণিতে হোৱা এটা সাধাৰণ সমস্যা।