গাখীৰৰ লগত কি মিহলাব লাগে জানে নে
ৰাতি টোপনি যোৱাৰ আগতে গাখীৰ খোৱাৰ অভ্যাস বহুতৰেই আছে। চিকিৎসকৰ মতে, টোপনি যোৱাৰ আগতে চাহ বা কফি খোৱাতকৈ গাখীৰ খোৱা বেছি উপকাৰী। যদি গাখীৰৰ লগত অলপমান গুড় মিহলাই লোৱা হয় তেনেহলে বহুতো ৰোগ নিৰাময় কৰাত সহায়ক হয়। আয়ুৰ্বেদ শাস্ত্ৰত সকলো পুষ্টি গুণ সম্পন্ন খাদ্যৰ ভিতৰত গুড় আৰু গাখীৰৰ স্হান অন্যতম। ৰাতি টোপনি যোৱাৰ আগতে এগিলাচ গাখীৰৰ লগত এক চামোচ গুড় মিহলাই খাবলৈ পৰামৰ্শ দিয়ে চিকিৎসকে। আয়ুৰ্বেদ শাস্ত্ৰ অনুসৰি গাখীৰৰ লগত গুড় মিহলাই খালে কি কি উপকাৰ হয় জানো আহকচোন এই প্ৰতিবেদন যোগে
১)। গাখীৰত ট্ৰিপট’ফেন নামৰ এমাইন’ এচিড থাকে, যিয়ে ছেৰ’ট’নিন আৰু মেলাট’নিন হ’ৰমনৰ ক্ষৰণ বৃদ্ধি কৰিব পাৰে। এই দুই হ’ৰমনৰ প্ৰভাৱতেই মনৰ চাপ, দুঃচিন্তা আদি কমি যায়। টোপনিও ভাল হয়। অনিদ্ৰাৰ সমস্যা থাকিলে বা ৰাতি টোপনি কমকৈ হ’লে ৰাতি টোপনি যোৱাৰ আগতে গাখীৰৰ লগত গুড় মিহলাই খালে উপকাৰ পোৱা যায়।
২)। গাখীৰক সুষম খাদ্য বুলি কোৱা হয়। গাখীৰত কেলচিয়াম, আইৰণ, পটাছিয়াম, জিঙ্ক আদি খনিজ থাকে। আনহাতে গুড়ত আইৰণ, কেলচিয়াম, মেগনেচিয়াম, তাম আৰু ফচফৰাছৰ দৰে খনিজ থাকে। গতিকে গাখীৰৰ লগত গুড় মিহলাই খালে শৰীৰত খনিজ উপাদান বোৰৰ অভাৱ হ’বলৈ নিদিয়ে।
৩)। ৰক্তহীনতাৰ সমস্যা থাকিলে গাখীৰ আৰু গুড় খালে উপকাৰ পাব পাৰি। তাৰোপৰি গাখীৰত থকা ভিটামিন বি১২, আৰু ভিটামিন ডি’ য়ে স্নায়ুৰ উত্তেজনা প্ৰশমন কৰিব পাৰে ।
৪)। গাখীৰ আৰু গুড় মিহলাই খালে হাড় শক্তিশালী হোৱাৰ লগতে শৰীৰৰ ৰোগ প্ৰতিৰোধ ক্ষমতাও বৃদ্ধি পায়। বাঢ়ি অহা শিশুক গাখীৰৰ লগত চেনী মিহলাই নিদি গুড় মিহলাই খোৱালে পুষ্টি গুণ পোৱাৰ লগতে বৃদ্ধিও সোনকালে হয়।
৫)। গাখীৰৰ লগত গুড় মিহলাই খালে হজম শক্তি বৃদ্ধি হোৱাৰ লগতে পেটৰ সমস্যা থাকিলে ভাল হয়।
৬)। ৰাতি টোপনি যোৱাৰ আগতে একগিলাচ গাখীৰত গুড় মিহলাই খালে গেছ, অম্বল, কোষ্ঠকাঠিন্য,পেট ফোলাৰ নিচিনা সমস্যা নোহোৱা হয়।
৭)। গুড়ত থকা পটাছিয়ামে শৰীৰত জমা হৈ থকা ফেট কমাব পাৰে আৰু বেয়া কলেষ্টেৰেলৰ পৰিমাণ কমাব পাৰে।
৮)। ঋতুস্ৰাৱৰ সময়ত পেটৰ অসহ্য যন্ত্ৰনা হ’লে গাখীৰৰ লগত গুড় মিহলাই খালে উপকাৰ পোৱা যায়।
৯)। গাখীৰ আৰু গুড় চুলি আৰু ছালৰ বাবেও উপকাৰী। শালমণ ,ফোঁহা, আৰু ছালৰ এলাৰ্জিৰ পৰা সকাহ দিব পাৰে গাখীৰ আৰু গুড়ে।
গতিকে ৰাতি টোপনি যোৱাৰ আগতে এগিলাচ গাখীৰৰ লগত এক চামোচ গুড় মিহলাই খোৱাৰ অভ্যাস গঢ়ি তুলিলে শৰীৰ সুস্থ হৈ থকাৰ উপৰিও বহুতো ৰোগৰ পৰা হাত সাৰি থাকিব পাৰি।
