পৃথিৱীত মানুহ ভেদে বিভিন্ন প্ৰকাৰৰ চখ থাকে। তাৰে ভিতৰতএবিধ হৈছে সোণৰ প্ৰতি থকা মানুহৰ দুৰ্বলতা আৰু চখ। ভাৰতীয় মূলৰ গায়ক বাপ্পী লাহিড়ী নিজৰ গায়কীতকৈ তেঁও পৰিধান কৰা অতিমাত্ৰা সোণৰ অলংকাৰৰ বাবেহে বিখ্যাত।
এইবাৰ আন এজন গায়কে সংবাদ মাধ্যমৰ শিৰোনাম দখল কৰিছে তেঁওৰ সোণৰ প্ৰতি থকা চখ আৰু দুৰ্বলতাৰ বাবে।গায়কজন কিন্তু ভাৰতৰ নহয়। গায়কজনৰ নাম ডান ছুৰ । মেক্সিকোৰ এই ৰেপ ছং পৰিবেশন কৰা গায়কজনৰ ডিঙিত নহয়, মূৰতহে চুলিৰ ঠাইত উলমি আছে অসংখ্য সোণৰ চেইন।
ৰেপ গায়কসকলক প্ৰায়ে নিজৰ অভিনৱ সাজ-পোচাক আৰু ষ্টাইলৰ বাবে সংবাদ মাধ্যমৰ শীৰ্ষস্থানত থকা দেখা পোৱা যায়। এইক্ষেত্ৰত মূৰত চুলিৰ সলনি সোণৰ চেইন ইমপ্লান্ট কৰোৱা গায়কৰ ভিতৰত ডান ছুৰেই প্ৰথম। উল্লেখ্য যে এই কাৰ্য কৰাৰ আগতে ডানৰ আছিল একোচা ঘন কলা চুলি। কিন্তু এতিয়া নতুনকৈ সোণৰ চেইনৰ চুলি লগোৱাৰ পাছত গায়কজন ৰূপেই সলনি হৈ গৈছে।
উল্লেখ্য যে ২৩ বছৰ বয়সীয়া এই মেক্সিকান গায়কজনৰ মূৰত লগোৱা হৈছে বিভিন্ন ডিজাইনৰ সোণৰ চেইন। বিগত এপ্ৰিল মাহত এক অক্সোপ্ৰচাৰৰ জৰিয়তে এই কাৰ্য কৰা হয়। সামাজিক মাধ্যমত তেঁও অনুৰাগীসকলৰ আগত এই কথা প্ৰকাশ কৰে। আৰু ইয়াৰ পাছতেই এই খবৰ সমগ্ৰ বিশ্বতে বিয়পি পৰে। জানিবলৈ পোৱা মতে সৌন্দৰ্য আৰু প্ৰসাধনৰ ক্ষেত্ৰত ডেন সদায়ে আনতকৈ পৃথক।
